ބާވެ، ވެއްޓެން ކައިރިވެފައި ހުރި ރަބީއުވިލާ ގޭގައި ރޯވި އަލިފާންގަނޑު ނިއްވާލައިިފި
މިރޭ މ. ރަބީއުވިލާ ގޭގައި ރޯވި އަލިފާންގަނޑު އެމްއެންޑީއެފުން ކޮންޓްރޯލް ކޮށްފިއެވެ.
އަލިފާން ރޯވީ އެ ގޭގެ ހަތަރު ވަނަ ފަންފިލާގައެވެ.
ގާތްގަނޑަކަށް 8:30 ހާއިރު ރޯވި އަލިފާންގަނޑު މިހާރު ކޮންޓްރޯލް ކޮށްފައިވާ ކަމަށް އެމްއެންޑީއެފުން މައުލޫމާތުދެއެވެ. ހާދިސާގައި އެއްވެސް މީހަކަށް އަނިޔާވެފައިވާކަން މިހާތަނަށް އެނގިފައިނުވާ ކަމަށް އެމްއެންޑީއެފުން ބުންޏެވެ.
ރަބީއުވިލާ ގޭގެ ވެރިފަރާތުން ''ނުކުތާ'' އާ ވާހަކަ ދައްކަމުން ބުނީ، އެ އިމާރާތުގައި ބަޔަކު ނުޅޭތާ ހަ ވަރަކަށް އަހަރު ވެދާނެ ކަމަށެވެ. އެތަން ބޭނުންކޮށް އުޅެނީ މަސްތުވާތަކެތި ބޭނުންކުރާ މީހުން ކަމަށް ރާއްޖެއިން ބޭރުގައި އާއިލާއާއެކު އުޅޭ އެމީހާ ތުހުމަތު ކުރިއެވެ. ބުނީ ބޮޑަށް ލަފާކުރެވެނީ ބަޔަކު ރޯކޮށްލި ކަމަށެވެ.
''އެތަނުގައި އުޅެނީ ޕާޓެއިން، އެއްވެސް ފަންގިފިލާއެއްގައި އަޅުގަނޑުމެންގެ އާއިލާގެ އެއްވެސް މީހަކު ނޫޅޭނޭ، ދެން ޕާޓެއިން އުޅޭ ނޫޅޭއެއް ނޭގެ އަޅުގަނޑުމެންނަކީ ރާއްޖެއިން ބޭރުގައި އުޅޭބައެއް'' އެމީހާ ބުންޏެވެ.
އޭނާ ބުނީ އެއީ 40 އަހަރުވެފައިވާ އިމާރާތެއް ކަމަށެވެ. އެ އިމާރާތް ތަޅާލައިދޭން ކުރީ ސަރުކާރުގައިވެސް އެދުނު ކަމަށެވެ. ނަމަވެސް އެކަން ކޮށްދީފައިނުވާ ކަމަށެވެ.
Ads by STO
