ކޮވިޑް19: ވިޒިޓް ލާމު އެޓޯލް މިހާރު ބުނަނީ ފަހުން ލާމަށް ދިޔުމަށް ، މިހާރު ގޭގައި މަޑު ކުރެއްވުމަށް
މުޅި ދުނިޔެއަށް ވެސް މިހާރު ހަލުވިކަމާއެކު ފެތުރެމުން އަންނަ އަދި ދިވެހިރާއްޖެއިން ވެސް 13 މީހުން ފައްސިވެފައިވާ ކޮރޯނާ ވައިރަހުގެ ސަބަބުން ވިޒިޓް ލާމު އެޓޯލްގެ ''މެސެޖު'' ވެސް ބަދަލު ކޮށްފިއެވެ.
ލާމު އަތޮޅުގެ އާސާރީ ތަންތަނާއި ގުދުރަތީ ރީތިކަން ޕްރޮމޯޓްކޮށް އެއަތޮޅަށް ޒިޔާރަތް ކުރާ މީހުން އިތުރުކުރުމުގެ މަޤްޞަދުގައި ހަރަކާތްތެރިވަމުން އަންނަ ވިޒިޓް ލާމު އެޓޯލްގެ މިހާރުގެ މެސެޖަކީ ''ފަހުން ވެސް ލާމަށް އާދެވިދާނެ!''، މިވަގުތު ގޭގައި ތިއްބެވުމަށް ދޭ މެސެޖެވެ. އަދި ކޮރޯނާ ވައިރަހުން ސަލާމަތްވެ ތިބުމަށް ރައްކާތެރިކަމުގެ ފިޔަވަޅު އެޅުމަށާއި މި ބަލިމަޑުކަމުން އަރައިގަނެވުމުން ލާމު އަތޮޅުން ބައްދަލުވާން އެދޭ ކަމަށް ވިޒިޓް ލާމުން ހާމަކޮށްފައިވެއެވެ. ވިޒިޓް ލާމު އެޓޯލްގެ ފޭސްބުކް ޕޭޖްގައި އެފަރާތުން އާންމުކޮށްފައިވާ މެސެޖު ބަލައިގަނެ ވަރަށް ގިނަ ބަޔަކު ޝެއަރކޮށްފައި ވެއެވެ.
''ދެން''އާއި ވާހަކަ ދައްކަމުން ވިޒިޓް ލާމުގެ އެއް ފައުންޑަރ މުޙައްމަދު އަރީޙް ބުނީ ، މިހާރު ކުރިމަތިވެފައިވާ ކޮވިޑް19އިގެ ސަބަބުން ލާމު އަތޮޅު ޕްރޮމޯޓް ކުރުމަށް އެ ޖަމްއިއްޔާއިން ކުރަމުން އައި މަސައްކަތް ވެސް މިވަގުތަށް ހުއްޓާލާފައިވާ ކަމަށެވެ.
''އަފޭން ވެސް މިހާރު މިތިބޫ މަސައްކަތް ހުއްޓާލައިން، ކޮރޯނާގެ ކަންތެއް ފެށެނަ އިރު ވިޒިޓް ލާމުގެ ލަވައިގެ ވީޑިއޯ ވެސް ޝޫޓް ކެރަމުން ދިޔާ ، އެކަން ވެސް މިހާރު ހުއްޓާލައިފީމު'' އަރީހް ބުންޏެވެ.
ކޮރޯނާ ވައިރަސް ނުވަތަ ކޮވިޑް19 ގެ ބިރުވެރިކަން ރާއްޖެއަށް ވެސް ފެތުރިފައިވާތީ ޞިއްޙީ ޚިދުމަތްތެރީން މިހާރު އިރުޝާދު ދެއްވަނީ އިޖުތިމާއީ ގައިދުރުކަމަށް އިސްކަންދީ ގޭގައި ތިއްބެވުމަށެވެ. މި އިރުޝާދާއި ގުޅިގެން ހުރިހާ ހަރަކާތެއްހެން މެދުކަނޑާލިއިރު އެކި ޖަމްއިއްޔާ ޖަމާޢަތްތަކުން ދަނީ ހޭލުންތެރިކަމުގެ ޕްރޮގްރާމްތައް ހިންގާ އެފަދަ މެސެޖުތައް ދެމުންނެވެ.
Ads by STO
