މަގުމަތީގައި ފްރިޖެއް ބެހެއްޓި ބިދޭސީއަކު ޖޫރިމަނާކޮށްފި
މާލޭ މަގުމަތީގައި ފްރިޖެއް ބެހެއްޓި ބިދޭސީއަކު ޖޫރިމަނާކޮށްފި އެވެ.
ފްރިޖު ނެރުނު ބިދޭސީ މީހާގެ ވީޑިއޯ ހިއްސާކޮށް ސޯޝަލް މިޑިއާގައި ކުރި ޕޯސްޓެއްގައި ސިޓީ ކައުންސިލުން ބުނީ އަނޯނާ ގޯޅިން މަގުމައްޗަށް ފްރިޖެއް ނެރުނު ބިދޭސީއެއް ހުއްޓުވާފައިވާ ކަމަށެވެ.
އަދި އެމީހާ ޖޫރިމަނާކޮށް އަދި މަގުމަތިން ފްރިޖް ނަގުވާފައިވާ ކަމަށެވެ.
މާލެ ތެރެ ރީތިކޮށް ބޭއްވުމަށްޓަކައި ކައުންސިލުން ކުރަމުން އަންނަ މަސައްކަތުގެ ތެރެއިން މި އަހަރު ފެބްރުއަރީ މަހުން ފެށިގެން ސީސީޓީވީގެ އެހީގައި ކުނިއަޅާ މީހުން ހޯދައި ޖޫރިމަނާކުރަން ވަނީ ފަށައިފަ އެވެ. މަގުމަތީގެ ޕޭވްމަންޓު ގައި މުދާ ބަހައްޓައިގެން ވިއްކާތީ އެ ފަރާތްތައް ހުއްޓުވާ ޖޫރިމަނާވެސް ދަނީ ކުރަމުންނެވެ. ގަވާއިދާ ހިލާފަށް ކުނިއަޅާ މީހުން ޖޫރިމަނާ ކުރަނީ 500 ރުފިޔާއިންނެވެ.
އަދި މާލޭގެ ބަނދަރުތައް ޗެކުކޮށް ހުއްދަ ނުނަގާ، ފަޅުގައި އަޅާފައި ހުރި އުޅަނދުތަކުގައި ސްޓިކާ ޖެހުމުގެ މަސައްކަތްވެސް ސިޓީ ކައުންސިލުން އެބަކުރެއެވެ. ދިޔަދޮވި އަދި އޭސީތަކުން މަގުމައްޗަށް ފެންފައިބާ މައްސަލަ ހައްލުކުރުމުށް ކައުންސިލުން ފިޔަވަޅުތަކެއް އަޅަން ވަނީ ފަށައިފަ އެވެ.
