އެސްޓީއޯގެ ހިއްސާއަކަށް 80 ރުފިޔާ ބަހަން ފާސްކޮށްފި

މިދިޔަ އަހަރު އެ ކުންފުންޏަށް ލިބުނު ފައިދާއިން ހިއްސާއަކަށް 80 ރުފިޔާ ބެހުމަށް ސްޓޭޓް ޓްރޭޑިން އޯގަނައިޒޭޝަން (އެސްޓީއޯ) އިން ފާސްކޮށްފި އެވެ.

Ads by STELCO

ވެލާނާ އިންޓަނޭޝަނަލް އެއާޕޯޓު (ވީއައިއޭ) ގެ ނޫވިލު ސީޕްލޭން ޓާމިނަލުގެ ނީރި ލައުންޖުގައި މިރޭ ބޭއްވި ޖަލްސާގައި އެސްޓީއޯގެ ހިއްސާއަކަށް 80 ރުފިޔާ ބަހަން ފާސްކޮށްފައި ވަނީ ޖަލްސާގައި ބައިވެރިވި ހިއްސާދާރުންގެ 99 އިންސައްތަ ވޯޓުންނެވެ. އަހަރީ އާންމު ޖަލްސާއަށް 120 ހިއްސާދާރުން ހާޒިރުވިއިރު، 69 ހިއްސާދާރުން ޕްރޮކްސީ މެދުވެރިކޮށް މި ޖަލްސާގައި ބައިވެރިވި އެވެ.

މިދިޔަ އަހަރު އެސްޓީއޯއަށް ލިބުނު ފައިދާއިން ހިއްސާއަކަށް 80 ރުފިޔާ ބެހުމަށް ފާސްކުރިއިރު، 2022 ވަނަ އަހަރުގެ ފައިދާއިން ހިއްސާއަކަށް ބަހާފައި ވަނީ 77 ރުފިޔާ އެވެ.

އެސްޓީއޯއަށް އާމްދަނީގެ ގޮތުގައި 2023 ވަނަ އަހަރު 16.4 ބިލިއަން ރުފިޔާ ވަނީ ލިބިފަ އެވެ. އޭގެ ކުރީ އަހަރު ލިބުނީ 18.2 ބިލިއަން ރުފިޔާ އެވެ. މިދިޔަ އަހަރު ޓެކުހަށް ކެނޑުމަށްފަހު އެ ކުންފުންޏަށް ސާފު ފައިދާގެ ގޮތުގައި 818 މިލިއަން ރުފިޔާ ލިބުނުއިރު، 2022 ވަނަ އަހަރު ލިބިފައި ވަނީ 728 މިލިއަން ރުފިޔާ އެވެ. ހިންގުމުގެ ފައިދާގެ ގޮތުގައި 1.3 ބިލިއަން ރުފިޔާ އެސްޓީއޯއަށް 2023 ވަނަ އަހަރު ލިބުނެވެ. އޭގެ ކުރީ އަހަރު ލިބިފައި ވަނީ އެއް ބިލިއަން ރުފިޔާ އެވެ.

މި ޖަލްސާގައި އަލަށް އެކުލަވާލާފައިވާ ރާއްޖޭގެ ކުންފުނީގެ ގާނޫނާ އެއްގޮތަށް އެސްޓީއޯގެ ހިންގާ ގަވާއިދަށް ބަދަލު ގެނެސް ވަނީ ފާސްކޮށްފަ އެވެ. އަދި އެ ކުންފުނީގެ ޑިރެކްޓަރުންގެ ބޯޑުގައި އާންމު ހިއްސާދާރުން ތަމްސީލު ކުރާ ޑިރެކްޓަރު އިންތިހާބު ކުރުން ވެސް ކުރިއަށް ގެންދިޔަ އެވެ. އެ މަގާމަށް އެސްޓީއޯގެ ހިއްސާދާރުން ހޮވާފައި ވަނީ މއ. ޓިއުލިޕްވިލާ، މުހައްމަދު އަހުސަން ސަލީމެވެ.

މިރޭގެ ޖަލްސާގައި ކުރިއަށް އޮތް އަހަރަށް އެސްޓީއޯގެ އެކްސްޓާނަލް އޮޑިޓަރެއްގެ ގޮތުގައި ޑެލޮއިޓް އައްޔަން ކުރުމަށް ވަނީ ފާސްކޮށްފަ އެވެ.