އޮޅުވާލައިގެން ޔޫރަޕަށް އެތެރެވުމުގައި ރާއްޖޭގެ ނަން ބޭނުންކުރަނީ
އޮޅުވާލައިގެން ޔޫރަޕްގެ ގައުމުތަކަށް އެތެރެވާން ޓްރާންސްޓް ޑެސްޓިނޭޝަނެއްގެ ގޮތުގައި ރާއްޖެ ބޭނުންކުރަމުންދާ ކަމަށް އިމިގްރޭޝަނުން މިއަދު ބުނެފި އެވެ.
އިމިގްރޭޝަނުން ބޭއްވި ޕްރެސް ބްރީފިން އެއްގައި ޑެޕިއުޓީ ޗީފް އިމިގްރޭޝަން އޮފިސާ މުހައްމަދު ޝިފާން ވިދާޅުވީ 3، ޖުލައި ގައި ވިސްޓާ އެއާލައިނުން ރާއްޖެ އައި ބަންގްލަދޭޝްގެ 4 މީހެއްގެ ޕާސްޕޯޓުގައި ނަކަލު ކޮށްފައިވާ ގްރީސްގެ 'ފޭކް'' ސްޓޭމްޕްތަކެއް ޖަހާފައިވާ ކަމަށެވެ.
ބެލެވޭ ގޮތުގައި އެ މީހުން މަސައްކަތްކުރީ ރާއްޖޭގައި މަޑުކުރުމަށް ފަހު ޔޫރަޕްގެ ގައުމަކަށްދާން ކަމަށް އޭނާ ވިދާޅުވި އެވެ. އެއީ ރާއްޖޭގެ އެންޓްރީ ސްޓޭމްޕް ލިބިއްޖެނަމަ އެހެން ގައުމުތަކަށް އެތެރެވާން ފަސޭހަވާނެތީވެ ކަމަށް ވިދާޅުވި އެވެ.
"އަޅުގަނޑުމެންނަށް ބެލިބެލުމުން ޝައްކު ކުރެވެނީ މި މީހުން ރާއްޖެ އެތެރެވެފައި ޔޫރަޕްގެ ގައުމަކަށްދާން މަސައްކަތްކުރާ ކަމަށް، އެއީ ރާއްޖޭގެ އެންޓްރީ ސްޓޭމްޕް ލިބިއްޖެއްޔާ އެބަ ފަސޭހަވޭ އެހެން ގައުމަކަށް ވަންނަން. އެހެންވީމަ ރާއްޖެ ބޭނުން އެބަކުރެވޭ ޓާގެޓް ޑެސްޓިނޭޝަނަކަށް ނުވަތަ ޓާގެޓް ޑެސްޓިނޭޝަނަކަށް" ޝިފާން ވިދާޅުވި އެވެ.
އޭނާ ވިދާޅުވީ މި ސަރުކާރަށް މިވީ 8 މަސް ތެރޭގައި ސައްހަ ނޫން ލިޔެކިޔުންތަކާއި ޝަހުސު އޮޅުވާލައިގެން ރާއްޖެ އެތެރެވާން އުޅުނު 1664 މީހަކު ހުއްޓުވާފައިވާ ކަމަށެވެ.
