މިދިޔަ ކުއާޓަރުގައި އެސްޓީއޯއަށް ސާފު ފައިދާގެ ގޮތުގައި 148 މިލިއަން
މިދިޔަ ކުއާޓަރުގައި އެސްޓީއޯއަށް ސާފު ފައިދާގެ ގޮތުގައި 148 މިލިއަން ރުފިޔާ ލިބިއްޖެ އެވެ.
މި އަހަރުގެ ދެވަނަ ކުއާޓަރުގެ ހިސާބުތައް އެސްޓީއޯއިން މިހާރު އާންމުކޮށްފައިވާއިރު، މި ކުއާޓަރުގައި ޖުމްލަ އާމްދަނީގެ ގޮތުގައި 3.5 ބިލިއަން ރުފިޔާ އެ ކުންފުންޏަށް ވަނީ ލިބިފަ އެވެ. މިއީ އަހަރުގެ ފުރަތަމަ ކުއާޓަރާ އަޅާބަލާއިރު 23 އިންސައްތައިގެ ދަށް ވުމެކެވެ.
އެސްޓީއޯއިން ބުނީ ޖުމްލަ އާމްދަނީ ދަށްވުމުގެ މައިގަނޑު ސަބަބަކީ އެ ކުންފުނީގެ މައިގަނޑު ވިޔަފާރި ކަމަށްވާ ތެލުގެ ވިޔަފާރީގެ އަގުތަކަށް ދުނިޔޭގެ ބާޒާރުގައި އައި ބަދަލާ ގުޅިގެން، ރާއްޖޭގެ މާކެޓުގައި ތެޔޮ ވިއްކާ އަގުތަކަށް ހެޔޮ ބަދަލުތަކެއް ގެނެވުމާ ގުޅިގެން ކަމަށެވެ. ތެލުގެ އަގުތައް ދަށް ކުރުމާ އެކު، ޖުމްލަ ފައިދާ ފުރަތަމަ ކުއާޓާރާ އަޅާބަލާއިރު 16 އިންސައްތައިން ދަށްވެ، ޖުމްލަ ފައިދާގެ ގޮތުގައި ލިބިފައި ވަނީ 515 މިލިއަން ރުފިޔާ އެވެ.
ކުންފުނީގެ ޖުމްލަ ފައިދާ ދަށް ވިނަމަވެސް ހިންގުމުގެ ހަރަދު ނިސްބަތުން ދަށް ވުމާ އެކު، ހިންގުމުގެ ފައިދާގެ ގޮތުގައި ދެވަނަ ކުއާޓަރުގައި އެސްޓީއޯއަށް 203 މިލިއަން ރުފިޔާ ލިބިފައިވެ އެވެ.
ޓެކުހަށް ކެނޑުމުގެ ކުރިން މި ކުއާޓަރުގެ ސާފު ފައިދާއަކީ 177 މިލިއަން ރުފިޔާ އެވެ. މި ކުއާޓަރުގެ ސާފު ފައިދާގެ ގޮތުގައި ޓެކުހަށް ކެނޑުމަށްފަހު ވަނީ 148 މިލިއަން ރުފިޔާ ލިބިފަ އެވެ. މިއީ ފުރަތަމަ ކުއާޓަރާ އަޅާބަލާއިރު 24 އިންސައްތައިގެ ދަށް ވުމެކެވެ.
