ބައެއް ގޯޅިތަކުގެ ކަންމަތީގައާއި އާންމު ތަންތަނުގައި ރަތްރޮނގު ދަމައި، ޕާކްކޮށްފިނަމަ ޓޯކުރަން ނިންމައިފި
ބައެއް ގޯޅިތަކާއި މަގުތައް ދިމާވާ ކަންމަތީގައާއި ސްކޫލާއި ޕާކް ފަދަ މީހުން އެއްވެ ހިނގާބިނގާވެ އުޅޭ އާންމު ބައެއް ތަންތަނުގައި ރަތްރޮނގު ދަމައި، އެފަދަ ތަނެއްގައި ޕާކްކުރާ އުޅަނދުތައް ޓޯކުރުމަށް ސަރުކާރުންނާއި މާލެ ސިޓީ ކައުންސިލުން ނިންމައިފި އެވެ.
ޕާކިން އަދި ޓްރެފިކް މައްސަލައާ ގުޅޭ ގޮތުން މަޝްވަރާ ކުރުމަށް މާލޭގެ މޭޔަރު އާދަމް އާޒިމާއި، ޓްރާންސްޕޯޓް މިިނިސްޓަރު މުހައްމަދު އަމީނާއި، ހޯމް މިނިސްޓަރު އަލީ އިހުސާނާއި، ކޮމިޝަނާ އޮފް ޕޮލިސް އަލީ ޝުޖާއުއާއި، އެޗްޑީސީގެ މެނޭޖިން ޑިރެކްޓަރު ފަޒުލް ރަޝީދު ބައްދަލުވުމެއް ބޭއްވި އެވެ.
މި ބައްދަލުވުން ނިމިގެން ބޭއްވި ނޫސްވެރިންގެ ބައްދަލުވުމުގައި މޭޔަރު އާޒިމް ވިދާޅުވީ ޕާކްކުރުން މަނާ ސަރަހައްދުތަކެއް ކަނޑައަޅައި ރަތް ރޮނގު ދަމަން ނިންމީ އެ ތަންތަން ފާހަގަ ކޮށްދީފައި ވެސް ބެހެއްޓުމުގެ ބޭނުމުގައި ކަމަށެވެ.
"ކަންކަން މަތީގަ، މުހިންމު ތަންތަނުގަ އަޅުގަނޑުމެން ރެޑު ލައިން ދަމަން ފަށާނަން، ރެޑު ލައިން ދަމައި ނިމުމުން އެއިން ތަނެއްގައި ޕާކު ކޮށްފިއްޔާ ފުލުހުން އައިސް އެ ތަކެތި ނަގައިގެން ގެންދާނެ،" އާޒިމް ވިދާޅުވި އެވެ.
ހޯމް މިނިސްޓަރު އިހުސާން ވިދާޅުވީ މިއަދުގެ ބައްދަލުވުމުގައި މަޝްވަރާ ކުރުމަށް ފަހު އެފަދަ ނުވަ ސަރަހައްދެއް މިހާރު ވެސް ކަނޑައެޅިފައިވާ ކަމަށެވެ. އަދި ވަރަށް އެ ސަރަހައްދުތައް ހޯމް މިނިސްޓްރީން އާންމު ކުރާނެ ކަމަށް ވެސް އޭނާ ވިދާޅުވި އެވެ.
"ސްކޫލްތަކުގެ ކައިރި، މިސްކިތްތަކުގެ ކައިރި، ގިނަ މީހުން ނުކުމެ އެއްވެ އުޅޭ ތަންތަން، ޖާގަތައް، އެއީ ހިމެނިފައިވާ ތަންތަން،" މިނިސްޓަރު އިހުސާން ވިދާޅުވި އެވެ.
މާލެ ސަރަހައްދަށް "ހައްދެއް ނެތި" ވެހިކަލް އެތެރެކޮށް ތޮއްޖެހުމުގެ މައްސަލައަކީ ގިނަ ބަޔެއްގެ އެންމެ ބޮޑު ޝަކުވާއެއް އޮތް މައްސަލަ އެވެ.
ޓްރާންސްޕޯޓް މިނިސްޓްރީން އެންމެ ފަހުން ބުނެފައިވާ ގޮތުގައި 118،000 އަށް ވުރެ ގިނަ ވެހިކަލް މާލެ ސަރަހައްދަށް ރަޖިސްޓްރީކޮށްފައިވެ އެވެ. އަދި އެހެން ޒޯނުތަކަށް ރަޖިސްޓްރީކޮށްފައިވާ ގިނަ އަދަދެއްގެ ވެހިކަލް ވެސް މާލެ ސަރަހައްދަށް އެތެރެކޮށް ބޭނުންކުރާ ކަން ފާހަގަވެ، ޓޯކުރުމުގެ މަސައްކަތް ވަނީ ފަށާފަ އެވެ.
Ads by STO
