ލިސްޓު އާންމުކުރި ފަހުން ފީ ދެއްކި 20 ކުންފުންޏެއްގެ ނަން އާންމުކޮށްފި
ބިދޭސީ މުވައްޒަފުންގެ ވޯކް ޕާމިޓާއި ކޯޓާ ފީ ނުދައްކާ އަދި އޭގެ ޖޫރިމަނާ ވެސް ހިމެނޭ ގޮތަށް 100،000 ރ. އަށް ވުރެ މަތިން ދައްކަން ޖެހޭ ކުންފުނިތަކުގެ ލިސްޓު ސަރުކާރުން އާންމުކުރި ފަހުން ފީ ދެއްކި 20 ކުންފުންޏެއްގެ ނަން މިރޭ އާންމުކޮށްފި އެވެ.
މި ލިސްޓު ސަރުކާރުން އާންމުކުރީ މިދިޔަ މަހު 24 ގަ އެވެ. އެއީ ފުރަތަމަ ފަަހަރަށް ބިދޭސީންގެ ފީ ނުދައްކާ ކުންފުނިތައް އާންމު ކުރި ފަހަރެވެ. މިނިސްޓްރީން އާންމުކުރި ލިސްޓުގައި 1026 ކުންފުންޏެއް ހިމެނޭއިރު، މިލިއަނަކަށް ވުރެ ގިނަ ރުފިޔާ ދައްކަން ޖެހޭ ކުންފުނިތަކުގެ އަދަދު 100 އަށް ވުރެ ގިނަ އެވެ.
ހޯމް މިނިސްޓްރީން އަންގާރަ ދުވަހުގެ ދަންވަރު ބުނި ގޮތުގައި ލިސްޓު އާންމުކުރި ފަހުން 182 މިލިއަން ރުފިޔާ ލިބިފައިވާ ކަމަށެވެ. އަދި ބިދޭސީންގެ ފީން ދައުލަތަށް ދައްކަން ޖެހޭ ހުރިހާ ފައިސާއެއް ދެއްކި 20 ކުންފުންޏެއްގެ ނަން ހޯމް މިނިސްޓްރީން މިރޭ އާންމުކުރި އެވެ.
ހޯމް މިނިސްޓްރީން ބުނީ އެ ކުންފުނިތަކަކީ ގަވާއިދުން ފީ ދައްކަމުންދާ ކުންފުނިތަކެއް ކަމަށެވެ. ނަމަވެސް ފީ ނުދައްކާ ކުންފުނިތަކުގެ ލިސްޓުގައި އެ ކުންފުނިތައް ހިމެނުނީ، އެ ވަގުތަށް ދައްކަން ޖެހޭ ފައިސާއިން 100،000 ރުފިޔާ ނުދައްކާ އޮތުމުން ކަމަށް ހޯމް މިނިސްޓްރީން ބުންޏެވެ.
ހޯމް މިނިސްޓްރީން އާންމު ކުރި ލިސްޓުގައި މި ސަރުކާރަށް ނިސްބަތްވާ ބައެއް ވަރުގަދަ ވިޔަފާރިވެރިންގެ ކުންފުނިތައް ވެސް ހިމެނެ އެވެ. އަދި ފާހަގަކޮށްލެވޭ އެހެން ވަރުގަދަ ވިޔަފާރިވެރިންގެ ނަންތައް ވެސް ހިމެނެ އެވެ.
އޭގެ ތެރޭގައި ރައްޔިތުންގެ މަޖިލީހުގެ އޭދަފުށި ދާއިރާގެ މެންބަރު އަހުމަދު ސަލީމް (ރެޑްވޭވް) ގެ ރެޑްވޭވް ކުންފުންޏާއި، މާމިގިލި ދާއިރާގެ މެންބަރު ގާސިމް އިބްރާހީމްގެ ވިލާ ކުންފުނިތަކާއި، މަޝްހޫރު ޔުނިވާސަލް އެންޓަޕްރައިޒަސްގެ ނަން ފާހަގަކޮށްލެވެ އެވެ.
