ބިދޭސީ މަސައްކަތްތެރިން ގެންގުޅޭ ފަރާތްތަކާ މިނިސްޓަރު ބައްދަލުކުރަނީ
ރާއްޖޭގައި މަސައްކަތްކުރާ ބިދޭސީންނަށް ވަޒީފާދޭ ފަރާތްތަކާއި އެކްސްޕެޓް ބޭނުންކުރާ ފަރާތްތަކާ ހޯމް މިނިސްޓަރު އަލީ އިހުސާން ބައްދަލުކުރައްވަން ނިންމަވައިފި އެވެ.
ހޯމް މިނިސްޓްރީއިން މިރޭ ބުނީ އެ ބައްދަލުވުން ބޭއްވުމަށް ހަމަޖެހިފައިވަނީ މި މަހުގެ 20 ވަނަ ދުވަހު ކަމަށެވެ.
އެ ބައްދަލުވުމުގައި ބައިވެރިވާން ބޭނުންވާ ފަރާތްތަކުން މި މަހުގެ 19 ވަނަ ދުވަހުގެ މެންދުރު 12 ގެ ކުރިން ފޯމެއް ފުރުމަށް އެ މިނިސްޓްރީން އެދެ އެވެ.
ހޯމް މިނިސްޓްރީން ބުނީ ބައްދަލުވުން ބޭއްވުމަށް ހަމަޖެހިފައިވާ ތަނާއި ގަޑި، ބައިވެރިވާ ފަރާތްތަކަށް ވަކިން އެންގޭނެ ކަމަށެވެ.
އެކްސްޕެޓް ބޭނުންކުރާ ފަރާތްތަކާ މިނިސްޓަރު ބައްދަލުކުރެއްވުމަށް ނިންމަވާފައިވަނީ ހޯމް މިނިސްޓްރީން އިމިގްރޭޝަންއާ ގުޅިގެން ގަވާއިދާ ހިލާފަށް ރާއްޖޭގައި އުޅެމުންދާ ބިދޭސީން ޑީޕޯޓްކުރުމުގެ އޮޕަރޭޝަނެއް ފަށާފައި ވަނިކޮށެވެ.
އެ އޮޕަރޭޝަނުގައި ގިނަ އަދަދެއްގެ ބިދޭސީއިން މިހާތަނަށް ޑީޕޯޓްކޮށްފައިވެ އެވެ.
