ޝަމީމްގެ އިސްތިއުފާ ސިޓީ މަޖިލީހަށް ނުލިބޭ، ވަކިކުރަން ފާސްކޮށްފި
ޕްރޮސެކިއުޓަ ޖެނެރަލް (ޕީޖީ) ހުސައިން ޝަމީމްގެ އިސްތިއުފާ ސިޓީ ރައްޔިތުންގެ މަޖިލީހަށް ނުލިބޭތީ ވޯޓަށް އަހައި އޭނާ މަގާމުން ވަކިކުރަން މިރޭގެ ޖަލްސާގައި ފާސްކޮށްފި އެވެ.
ގިނަ ތުހަމަތުތަކެއް އަމާޒުކޮށް ޖުޑީޝަރީ ކޮމިޓީން މައްސަލަ ބެލުމަށް ފަހު މަޖިލީހުގެ ތަޅުމަށް މިރޭ އޭނާ ވަކިކުރަން ހުށަހެޅި ހުށަހެޅުން ފާސްކުރީ 65 މެންބަރުންގެ ވޯޓުންނެވެ. ނުފެންނަ ކަމަށް ވޯޓު ދެއްވީ ނުވަ މެންބަރެކެވެ. ވަކި ގޮތަކަށް ވޯޓު ދެއްވަން ބޭނުން ނުވާ ކަމަށް އެއް މެންބަރަކު ވޯޓު ދެއްވި އެވެ.
ޝަމީމް މަގާމުން އިސްތިއުފާ ދެއްވީ، އޭނާ މަގާމުން ވަކިކުރަން ޖުޑީޝަރީ ކޮމީޓީން ނިންމި ނިންމުން ތަޅުމަށް ހުށަހަޅަން މިރޭ ޖަލްސާ ފަށައި ކުރިއަށް ދަނިކޮށެވެ.
އެ ވަގުތު މަޖިލީހުގެ ބައެއް މެންބަރުން މަޖިލީހުގެ ރިޔާސަތަށް އެ ކަން ސަމާލު ކަމަށް ވެސް ގެނަ އެވެ. ނަމަވެސް މަޖިލީހުގެ ރިޔާސަތުގައި އިންނެވި މަޖިލީހުގެ ނައިބު ރައީސް އަހުމަދު ނާޒިމް ވިދާޅުވީ ބަހުސް ކުރަން އެދުނު މެންބަރުން ވާހަކަ ދައްކަވައި ނިންމުނު އިރު ވެސް އެ ސިޓީ މަޖިލީހަށް ނުލިބޭ ކަމަށެވެ.
ވޯޓު ނެގުމަށް ފަހު ވެސް އިސްތިއުފާގެ ސިޓީ ރައީސް އޮފީހަށް ލިބިފައިވޭތޯ ސާފު ކުރުމަށް ގުޅުމުން ވެސް ސިޓީ ލިބިފައި ނެތް ކަމަށް ރައީސް އޮފީހުން މައުލޫމާތު ދިން ކަމަށް ދިއްގަރު ދާއިރާ ތަމްސީލްކުރައްވާ މެންބަރު ނާޒިމް ވިދާޅުވި އެވެ.
ޝަމީމް ޖަވާބުދާރީވުމަށް ކޮމިޓީއަށް ހާޒިރުކުރީ ވެސް މިއަދެވެ. އެ ކޮމިޓީ ކުރިއަށް ގެންދިޔައީ މީޑީއާއާއި އާންމުން ނުވަދެވޭ ގޮތަށް ސިއްރުކޮށްގެނެވެ. ކޮމިޓީ މެންބަރުންގެ ވޯޓަކުން ކޮމިޓީއެއް ސިއްރުކުރުމަކީ ކޮމިޓީ މެންބަރުންނަށް ލިބިދޭ ބާރެކެވެ.
ޕްރޮސެކިއުޓަ ޖެނެރަލްގެ ގާނޫނު ބުނާ ގޮތުން، ޕްރޮސެކިއުޓަ ޖެނެރަލްގެ މަގާމު ފުރުއްވާ ބޭފުޅަކު އެ މަގާމަށް ގާބިލް ނޫން ކަމަށް ނުވަތަ މަގާމާ އެކަށޭނަ ނޫން ކަމެއް ކުރި ކަމަށް މަޖިލީހުގެ ކޮމިޓީއަކަށް ފެނިއްޖެ ނަމަ އެ މައްސަލައެއް މަޖިލީހުގެ ކަމާ ގުޅުން ހުރި ކޮމިޓީއަކަށް ބެލޭނެ އެވެ.
އަދި އެ ކޮމިޓީއަށް އެ ކަން ފެނިގެން ރައްޔިތުންގެ މަޖިލީހުގެ ތަޅުމަށް ހުށަހަޅައި، ވޯޓުގައި ބައިވެރިވެ މެންބަރުންގެ އަގުލަބިއްޔަތުން ވަކި ކުރުމަށް ފާސްކުރުމުން މަގާމުން ވަކިވީ ކަމަށް ވެސް ޕްރޮސެކިއުޓަ ޖެނެރަލްގެ ގާނޫނުގައި ބަޔާންކޮށްފައިވެ އެވެ.
ޕީޖީގެ މަގާމު ހުސްވުމުން އާ ޕީޖީއެއް އައްޔަން ކުރަން ގާނޫނުން ދީފައިވާ މުއްދަތަކީ 30 ދުވަހެވެ. އެ މުއްދަތުގެ ތެރޭގައި އެ ކަމަށް ހުޅުވާލައި، އަދި ރައީސްޖުމްހޫރިއްޔާއަށް ފެންނަ ނަންތައް މަޖިލީހަށް ފޮނުވުމަށް ފަހު، މަޖިލީހުން އެއިން ނަމެއް ފާސްކުރަން ޖެހެ އެވެ.
ނަމަވެސް މިރޭގެ ޖަލްސާއަށް ފަހު މަޖިލިސް ވަނީ ޗުއްޓީއަށް ގޮސްފަ އެވެ.
