ސްޓެލްކޯގައި ކޯލް ސެންޓަރެއް ގާއިމްކޮށް ހޮޓްލައިން ނަންބަރަކަށް 1545
މާލެ ސަރަހައްދާއި މާލެ ކައިރި ބައެއް އަތޮޅުތަކުގެ ރަށްރަށަށް ކަރަންޓުގެ ހިދުމަތް ފޯރުކޮށްދޭ ސްޓޭޓް އެލެކްޓްރިކް ކޮމްޕެނީ (ސްޓެލްކޯ) ގައި ކޯލް ސެންޓަރެއް ގާއިމުކޮށްފި އެވެ.
މިއަދު މެންދުރުފަހު ސްޓެލްކޯގެ ސޯޝަލް މީޑިއާ ހެންޑަލްތަކުގައި ލައިވް ޕްރިމިއާއެއްގެ ގޮތުގައި ކޯލް ސެންޓަރުގެ ހޮޓްލައިން ނަންބަރު 1545 ވަނީ ތައާރަފުކޮށްފަ އެވެ.
"ސްޓެލްކޯއިން ފޯރުކޮށްދެމުންދާ ހުރިހާ ޚިދުމަތަކާއި ގުޅުންހުރި މަޢުލޫމާތާއި، ކަރަންޓު ބިލްތަކާއި ގުޅުންހުރި ޝަކުވާތަކާއި، ކުންފުންޏާއި ގުޅުންހުރި އެނޫންވެސް ކަންކަމުގައި ސްޓެލްކޯގެ ހޮޓްލައިން ބޭނުން ކުރެވޭނެ،" ސްޓެލްކޯގެ މެނޭޖިން ޑިރެކްޓަރު ހުސައިން ފަހުމީ އެކްސްގައި ލިޔުއްވި އެވެ.
ސްޓެލްކޯއިން ބުނީ އެ ކުންފުނީގެ ޚިދުމަތްތައް އިތުރަށް ފުރިހަމަ ކުރުމަށް ޓަކައި، ސްޓެލްކޯ ކެއާގެ ޚިދުމަތާ އެކު ވައިބާ، ވަޓްސްއެޕް އަދި ޓެލެގްރާމް މެދުވެރިކޮށް ސްޓެލްކޯގެ ކޮންޓެކްޓް ސެންޓަރާއި މުޢާމަލާތު ކުރެވޭނެ އިންތިޒާމު ވެސް މިހާރު ހަމަޖައްސާފައިވާ ކަމަށެވެ.
