އާއިލާއިން ދެކޮޅު ހެދިއަސް އަތުހަރުގެ ޕޯސްޓްމޯޓަމް ހަދާނަން: މިނިސްޓަރު
އަންހެނެއްގެ ކަރުގައި ވަޅި ޖައްސައި ރަހީނުކުރި މައްސަލާގައި ބަންދުގައި ހުރެ އަމިއްލައަށް މަރުވާން މަސައްކަތްކޮށްގެން ހާލު ދެރަވެ ފަރުވާ ދެމުން ދަނިކޮށް މިއަދު ހަވީރު މަރުވި އާދަމް އަތުހަރުގެ ޕޯސްޓްމޯޓަމް ހަދަން އޭނާގެ އާއިލާއިން ދެކޮޅު ހެދިޔަސް އެ މަސައްކަތް ކުރިއަށް ގެންދާނެ ކަމަށް ހޯމް މިނިސްޓަރު އަލީ އިހުސާން މިރޭ ވިދާޅުވެއްޖެ އެވެ.
މިރޭ 10 ޖަހާއިރު އިސްކަންދަރު ކޮށީގައި ނޫސްވެރިންނާއެކު ފުލުހުންގެ އިސްވެރިންނާއި ހޯމް މިނިސްޓަރު އަލީ އިހުސާން "ނުރަސްމީ" ބައްދަލުވުމެއް ބޭއްވި އެވެ. ވީޑިއޯގެ ގޮތުން އެއްވެސް ކެމެރާއެއް އަދި ފޯނަކުން ފޮޓޮއާއި ވީޑިއޯ ނުނެގޭ ގޮތަށް ކުރިއަށް ގެންދިޔަ އެ ބައްދަލުވުމުގައި ނޫސްވެރިންނަށް ދެ ވީޑިއޯއެއް ދެއްކި އެވެ.
ވީޑިއޯ ދެއްކުމަށް ފަހު މައްސަލައާ ގުޅޭ ނޫސްވެރިންގެ ގިނަ ސުވާލުތަކަށް ޖަވާބު ދެއްވަމުން މިނިސްޓަރު ވިދާޅުވީ ފުލުހުންގެ އިހުމާލު އޮތް ކަމުގެ ތުހުމަތު ވެސް ކުރެވޭ މި ވަރުގެ މައްސަލައެއްގައި ޕޯސްޓްމޯޓަމް ރިޕޯޓު މުހިންމުވާ ކަމަށެވެ.
"ކުރިން ވެސް އެހެން ގައިދީއަކު މަރުވެގެން ވެސް ބުނެފައި ވާނެ، އާއިލާއާ ހަށިގަނޑު ހަވާލުކުރާނީ ޕޯސްޓްމޯޓަށް ހެދުމަށް ފަހު އޭ، އެހެންވީމަ ފުލުހުންނަށް ލިބިދޭ ގާނޫނީ ބާރުގެ ތެރެއިން އަމަލު ކުރާނީ އެހެން،" މިނިސްޓަރު އިހުސާން ވިދާޅުވި އެވެ.
އަތުހަރުގެ އާއިލީ މީހަކު "ދެން އޮންލައިން" އަށް ބުނީ އޭނާގެ ހާލަތު ގޯސްވެ މަރުވެ ދިޔުމުގައި އިހުމާލެއް އުޅޭ ކަމަށް އާއިލާއިން ދެކޭ ކަމަށެވެ. ނަމަވެސް ހަށިގަނޑު ވަޅު ނުލައި ގިނައިރުވުމަށް ނޭދޭތީ އޮޓޮޕްސީ އަދި ޕޯސްޓްމޯޓަމް ހަދަން ހަށިގަނޑު ބޭރަށް ފޮނުވަން ބޭނުން ނުވާ ކަން ވެސް އިދާރާތަކަށް އާއިލާއިން އަންގާފައިވާނެ ކަމަށް އޭނާ ބުންޏެވެ.
އާއިލާއަަށް އަތުހަރުގެ ހާލަތުގެ މައުލޫމާތުތައް ނުލިބި ގޮސްފައިވާތީވެ އެ ކަމުގެ ކަންބޮޑުވުން ވެސް ފާޅުކޮށްފައިވެ އެވެ.
އަންހެނަކު ރަހީނުކޮށްގެން އުޅޭކަމުގެ މައުލޫމާތު ލިބިގެން ފުލުހުން ދިޔުމުން އަތުހަރު ވަނީ އެ އަންހެން މީހާގެ ކަރުގައި ވަޅި ޖައްސައި ފުލުހުންނަށް ފިލަން މަސައްކަތް ކޮށްފަ އެވެ. އަންހެން މީހާ ސަލާމަތްކުރަން އުޅުމުގެ ތެރޭގައި ފުލުހުންގެ ފަރާތުން އަތުހަރަށް އަނިޔާތަކެއް ލިބުނެވެ.
އެހެން ނަމަވެސް އެ އަނިޔާތަަކަށް އޭޑީކޭގައި ފަރުވާ ދިނުމަށްފަހު ދޫކޮށްލުމުން އަތުހަރު ފުލުހުންގެ ބެލުމުގެ ދަށަށް ގެންދިޔަ އެވެ. އޭގެ ފަހުން ހުކުރު ދުވަހު ވެސް އޭނާ ހޮޑު ލެވޭތީއާއި ފިޓު ޖެހިގެން އައިޖީއެމްއެޗަށް ގެންދިޔަ އެވެ. ހަމަ އެ ދުވަހު ހޮސްޕިޓަލުން ދޫކޮށްލުމުން އޭނާ ބަންދުކުރި އެވެ. އަދި ކޯޓުން ޝަރީއަތް ނިމެންދެން ބަންދު ކުރުމުގެ އަމުރެއް އޭނާގެ ޣައިރު ހާޒިރުގައި ހޯދި އެވެ.
އަމިއްލައަށް މަރުވާން އަތުހަރު މަސައްކަތް ކުރީ ރޭގެ ވަގުތެއްގަ އެވެ. ފުލުހުން ބުނީ 23 މިނެޓު ތެރޭގައި ފަރުވާ ދިނުމަށް އޭނާ ހޮސްޕިޓަލަށް ގެންދިޔަ ކަމަށެވެ. މިކަން ފުލުހުން ހާމަ ކުރީ ރޭ 19:42 ގަ އެވެ. އަތުހަރު ވެންޓިލޭޓަރުގައި އޮތްކަން ފުލުހުން ހާމަކުރީ ރޭގެ 21:57 ގަ އެވެ.
ދަން ޖެހެން އުޅުނު މައްސަލަ އެޗްއާރުސީއެމް އާއި ނެޝަނަލް އިންޓެގްރިޓީ ކޮމިޝަނުން ވެސް ދަނީ ތަހުގީގު ކުރަމުންނެވެ.
އެނގިފައިވާ ގޮތުގައި އަތުހަރު ރަހީނުކުރި ކަމަށް ތުހުމަތު ކުރަނީ އޭނާ ލޯބީގެ ގޮތުން ގުޅިގެން އުޅުނު އަންހެނަކަށެވެ. އަދި އެ އަންހެން މީހާއަކީ ފުލުހެއް ކަމަށް މައުލޫމާތު ލިބެ އެވެ.
