ބީއެމްއެލްގެ އިތުބާރު ގެއްލޭ ކަމެއް ސަރުކާރުން ކޮށްގެން ނުވާނެ: ސޯލިހު
ސަރުކާރުން ވިޔަސް ބޭންކް އޮފް މޯލްޑިވްސް (ބީއެމްއެލް)އަށް އޮތް އިތުބާރު ގެެއްލޭފަދަ އެއްވެސް ކަމެއް ކޮށްގެން ނުވާނެ ކަމަށް ކުރީގެ ރައީސް އިބްރާހިމް މުހައްމަދު ސޯލިހް (އިބޫ) ވިދާޅުވެއްޖެއެވެ.
ކުރީގެ ރައީސް ސޯލިހް އެކްސްގައި ކުރެއްވި ޕޯސްޓެއްގައި ވިދާޅުވީ ބޭންކް އޮފް މޯލްޑިވްސްއަކީ ވަރަށް ގިނަ އާންމުންނާ ވިޔަފާރިވެރިންގެ ދިރިއުޅުމާ ގުޅިފައިވާ ތަނެއް ކަމަށެވެ.
އަދި އެ ބޭންކަކީ އަބަދުވެސް އެންމެންގެ ފުރިހަމަ އިތުބާރު އޮންނަންޖެހޭ ތަނެއް ކަމަށް ވިދާޅުވިއެވެ.
"ސަރުކާރުންވިޔަސް ބީއެމްއެލްއަށް އޮތް އިތުބާރު ގެެއްލޭފަދަ އެއްވެސް ކަމެއް ކޮށްގެން ނުވާނެއެވެ." ސޯލިހު ވިދާޅުވިއެވެ.
ސޯލިހު ވިދާޅުވީ ބީއެމްއެލްއަށް ކުރާ އިތުބާރު ގެއްލިއްޖެނަމަ އެއީ މުޅި މުޖަތަމައަށް ލިބޭނެ ބޮޑު ދެރައެއް ކަމަށާއި އެއީ ރައްޔިތުންގެ ބޭންކް ކަމަށެވެ.
މިފަހުން ބީއެމްއެލްގެ ބީއެމްއެލްގެ ސީއީއޯ އަދި މެނޭޖިން ޑިރެކްޓަރުގެ މަގާމުގައި ހުންނެވި ކާލް ސްޓުމްކަ ވަނީ މަގާމުން އިސްތިއުފާ ދެއްވާފައެވެ. ބީއެމްއެލްގެ ސީއީއޯ އިސްތިއުފާ ދެއްވާފައި ވަނީ ބީއެމްއެލްއާއި އިދިކޮޅު ފަރާތްތައް ގުޅިގެން މާލީ ބަގާވާތެއް ކުރަން އުޅުނު ކަމަށް ސަރުކާރަށް ނިސްބަތްވާ ފަރާތްތަކުން ތުހުމަތު ކުރަމުންދަނިކޮށެވެ. އަދި ފުލުހުންވެސް ވަނީ ސަރުކާރު ބަދަލުކުރުމަށް މަސައްކަތްތަކެއް ކުރިކަމަށް ބުނާ މައްސަލަ ތަހުގީގު ކުރަން ފަށާފައެވެ.
މީގެއިތުރުން ސަރުކާރުން ވަނީ ބީއެމްއެލްގެ ޗެއާމަންގެ މަގާމަށް، ރައީސްގެ ކެބިނެޓް ސެކްރެޓެރީ، އަހްމަދު އަލީ ހަބީބް އައްޔަން ކުރުމަށްޓަކައި ނަން ފޮނުވައިފައެވެ. މީގެއިތުރުން ބީއެމްއެލްގެ ބޯޑަށް އަލީ އިރުފާން އަދި ޕެންޝަން އޮފީހުގެ ކުރީގެ ސީއެފްއޯ މުހައްމަދު ޝާހިދު އައްޔަނު ކުރުމަށްވެސް ސަރުކާރުން ހުށަހަޅާފައިވެއެވެ. އެމްއެމްއޭ އިން މިފަހުން ގެނައި ބަދަލަކާއެކު ސިޔާސީ މަގާމުތަކުގައި ތިއްބަވާ ފަރާތްތަކަށް ވެސް މާލީ އިދާރާތަކުގެ މަގާމުތައް އަދާކުރެވޭނެއެވެ.
