މާލޭގެ ވިޔަފާރި ބަނދަރުގައި ހިލޭ ކޮންޓެއިނަރު ބެހެއްޓޭ މުއްދަތު ކުޑަކުރަނީ
މާލޭގެ ވިޔަފާރި ބަނދަރުގައި ހިލޭ ކޮންޓެއިނަރު ބެހެއްޓޭ މުއްދަތު ކުޑަކުރަން ނިންމައިފި އެވެ.
އެމްޕީއެލްގެ ސީއީއޯ މުހައްމަދު ވަޖީހު "ދެން"އަށް ވިދާޅުވީ މިހާރު އެއްވެސް ފީއަކާ ނުލައި 10 ދުވަހު މާލޭގެ ވިޔަފާރި ބަނދަރުގައި ކޮންޓެއިނާއެއް ބެހެއްޓޭ ކަމަށެވެ.
ނަމަވެސް މިއީ އެމްޕީއެލްގެ ޕޯޓު މީގެ 39 އަހަރު ކުރިން ހުޅުވި އިރުވެސް އޮންނަ އުސޫލު ކަމަށް އޭނާ ވިދާޅުވި އެވެ.
އަދި އޭރު ރާއްޖެއަށް މަހަކަށް ގެންނަ ކޮންޓޭނަރަށް ވުރެ މިހާރު މަހަކަށް ގެންނަ ކޮންޓޭނަރު ތިން ގުނަ ކަމަށް ވެސް އޭނާ ވިދާޅުވި އެވެ.
އެހެންވެ ވިޔަފާރި ބަނދަރުގައި އެކަށީގެންވާ ޖާގަ ނުހުންނަ ކަމަށެވެ.
އެެހެންވެ މިހާރު ނިންމާފައި ވަނީ ފިނިކޮށްފައި ބަހައްޓާ ކޮންޓޭނަރު ހިލޭ ފަސް ދުވަހު ބެހެއްޓޭ ގޮތަށް ހަދަން ކަމަށާއި އަދި އެހެނިހެން ކޮންޓޭނަރު ހަތް ދުވަހު ހިލޭ ބެހެއްޓޭ ގޮތަށް ހަދަން ކަމަށް ވަޖީހު ވިދާޅުވި އެވެ.
ނަމަވެސް އެ ބަދަލުތައް ގެންނާނެ ދުވަހެއް ވިދާޅެއް ނުވެ އެވެ.
