މިފްކޯއަށް އަހަރު ދުވަހުގެ މުއްދަތަށް ޗީފް އިންޓާނަލް އޮޑިޓަރެއް ހޯދަނީ
މޯލްޑިވްސް އިންޑަސްޓްރިއަލް ފިޝަރީޒް ކޮމްޕެނީ (މިފްކޯ) އަށް އަހަރު ދުވަހުގެ މުއްދަތަށް ޗީފް އިންޓާނަލް އޮޑިޓަރެއް ހޯދުމަށް އިއުލާނުކޮށްފި އެވެ.
މިފްކޯއިން އާދިއްތަ ދުވަހު ކުރި އިއުލާނުގައި ބުނީ ޗީފް އިންޓާނަލް އޮޑިޓަރުގެ މަގާމަށް މީހަކު ހޯދަނީ ކުންފުނީގެ އޮޑިޓް ޗާޓަރު ތައްޔާރު ކުރުމަށާއި އެ ކުންފުނީގެ ހިންގުމާ ގުޅޭ ހުރިހާ ކަމެއް ދަނީ ރަނގަޅަށްތޯ އިވެލުއޭޓް ކުރުމަށް ކަމަށެވެ. ރިސްކް މެނޭޖްމަންޓް އަދި ގަވަނެންސް ފްރޭމް ވޯކް ހިނގާ ގޮތް އިވެލުއޭޓް ކުރުމާއި އޮޑިޓަށް ބޭނުންވާ ކަންތައް ފާހަގަކޮށް އިންޓާނަލް އޮޑިޓުގެ އަހަރީ ޕްލޭން ތައްޔާރު ކުރުމުގެ އިތުރުން ތައްޔާރު ކުރެވޭ އޮޑިޓް ޕްލޭނާ އެއްގޮތަށް އޮޑިޓް ކުރުމުގެ މަސައްކަތް ކުރިއަަށް ގެންދިއުން ވެސް އޮޑިޓަރުގެ ޒިންމާތަކުގެ ތެރޭގައި ހިމެނެ އެވެ.
މަގާމުގެ އިތުރު މަސްއޫލިއްޔަތުތަކުގެ ތެރޭގައި:
- އެކްސްޓާނަލް އޮޑިޓް ކުރިއަށް ގެންދަނީ އެންމެ ހަރަދު ކުޑަކޮށް އެންމެ އެދެވޭ ގޮތަށްތޯ ކަށަވަރުކުރުން
- އިންފޮމޭޝަން ސިސްޓަމް ކުންފުނީގެ މަގުސަދުތަކާ އެއްގޮތަށް ގެންދޭތޯ ކަށަވަރު ކުރުން
- އޮޑިޓް ކުރިއަށްދާ ގޮތުގެ ރިޕޯޓު މެނޭޖްމަންޓަށް ހުށަހަޅަމުން ގެންދިއުން
- އޮޑިޓް ކުރުމަށް ކުރެވުނު މަސައްކަތުގެ މައްޗަށް ބިނާކޮށް، އޮޑިޓް ރިޕޯޓު ތައްޔާރު ކުރުން
- އޮޑިޓް ނިމުމުން އޮޑިޓް ރިޕޯޓް ކުންފުނީގެ ބޯޑަށް އަދި މެނޭޖްމަންޓަށް ހުށަހެޅުން
- ކުންފުނީގެ މަސައްކަތްތައް ހިނގަނީ ގާނޫނާ އަދި ގަވާއިދާ އެއްގޮތަށްތޯ ބެލުން
- ކުންފުނީގައި މަކާރާއި ހިޔާނާތުގެ ކަމެއް ހިނގާނަމަ މައްސަލަތައް ބަލާ އެކަން ތަހުގީގު ކުރެވެނީ ރަނގަޅަށްތޯ ބެލުން
އިއުލާނުގައިވާ ގޮތުން މަގާމަށް ޝަރުތު ހަމަވާނީ އެކައުންޓިން އެންޑް ފައިނޭންސްގެ ދާއިރާއިން މާސްޓާސް ޑިގްރީ ނުވަތަ ބެޗްލާސް ޑިގްރީ ހާސިލު ކޮށްފައިވާ ނަމަ އެވެ. ސީއައިއޭ، އޭސީސީއޭ، ސީއައިއެމްއޭ ނުވަތަ ސީޕީއޭ ސެޓްފިކެޓް އޮތް ފަރާތްތަކަށް އިސްކަން ދެވޭނެ ކަމަށް ވަނީ ބުނެފަ އެވެ.
ފަސް އަހަރު ނުވަތަ ދިހަ އަހަރުގެ އިންޓާނަލް އޮޑިޓްކުރުމުގެ ތަޖުރިބާ ހުރުން ނުވަތަ ބޮޑު ކުންފުންޏެއްގެ އެކްސްޓާނަލް އޮޑިޓަރެއްގެ ނުވަތަ ފައިނޭންޝަލް ކޮންޓްރޯލަރެއްގެ މަގާމުގެ ތަޖުރިބާ ހުންނަންވާނެ ކަމަށެވެ. އަދި އޮޑިޓް ރިޕޯޓް ކޮންސޮލިޑޭޓްކޮށް ހުލާސާކުރަން އެނގޭ ފަރާތަކަށް ވާންވާނެ ކަން ވެސް ވަނީ ފާހަގަކޮށްފަ އެވެ.
މަގާމަށް ޝައުގުވެރިވާ ފަރާތްތަކުން އިއުލާނުގައި ބުނެފައިވާ ލިޔުންތައް އެ ކުންފުނީގެ ހެޑް އޮފީހުގެ ރިސެޕްޝަނަށް ނުވަތަ އީމެއިލް މެދުވެރިކޮށް ހުށަހެޅޭނެ ކަމަށް މިފްކޯއިން ބުނެ އެވެ. ވަޒީފާއަށް އެދޭ ލިޔުންތައް އަންނަ ހޯމަ ދުވަހުގެ މެންދުރުފަހު 2:00 ކުރިން ހުށަހެޅުމަށް އެ ކުންފުނިން އެދެ އެވެ.
