ޖަމާއަތުގައި ނަމާދު ކުރުން މެދުކަނޑާލަން އެންގި މުއްދަތު އިތުރުކޮށްފި
މާލޭ ސަރަހައްދާއި ރިސޯޓުތަކުގައި ފަރުޟު ނަމާދު ތަކާއި ހުކުރު ނަމާދު ޖަމާއަތް މިސްކިތުގައި ނުކުރުމަށް ނިންމާފައިވާ ނިންމުން އިތުރު ކުރުމަށް އިސްލާމިކް މިނިސްޓްރީން ނިންމައިފިއެވެ.
އިސްލާމިކް މިނިސްޓްރީން މިއަދު ނެރުނު ބަޔާނެއްގައި ބުނެފައިވަނީ، ކޮވިޑް-19 ރާއްޖެއިން ފެނިފައިވާތީ މިހާރުގެ ހާލަތަށް ބަލައި، އިތުރަށް މިވައިރަސް ރާއްޖޭގައި ފެތުރުން ހުއްޓުވުމަށް ޓަކައި އަޅާ ރައްކާތެރި ކަމުގެ މުހިންމު ފިޔަވަޅެއްގެ ގޮތުން، އިސްލާމީ ފަތުވާދޭ އެންމެ މަތީ މަޖިލީހާއި ދީނީ އިލްމުވެރިންގެ ލަފާގެ މަތިން، މި މަހުގެ 18 ވާ ބުދަ ދުވަހުގެ މެންދުރު ނަމާދުން ފެށިގެން މާލެ، ހުޅުމާލެ، ވިލިމާލެ، އަދިހުރިހާ ރިސޯޓްތަކެއްގައި ފަރުޟު ނަމާދު ތަކާއި ހުކުރު ނަމާދުގެ ޖަމާއަތް މިސްކިތުގައި ނުހެދުމަށް ނިންމާފައި އޮތް އޮތުން އޭޕްރީލް ހަތަރެއް ވާ ހޮނިހިރު ދުވަހުގެ އަސްރު ނަމާދުގެ ނިޔަލަށް ކުރިއަށް ގެންދިއުމަށް ނިންމާފައިވާ ކަމަށެވެ.
ހެލްތު ޕްރޮޓެކްޝަން އެޖެންސީ (އެޗްޕީއޭ)އިން، މީހުން ދިދިއުޅޭ އިތުރު ރަށެއް މޮނިޓަރިންގެގެ ޙާލަތަށް ގެނެސްފިނަމަ، އެރަށެއްގައި ޖަމާޢަތުގައި ނަމާދުކުރުމާއި ހުކުރު ނަމާދު ނުކުރުމަށްވަނީ އަންގާފައެވެ. އެނިންމުމަކީ އެއްވަގުތެއްގައި ގިނަބަޔަކު އެއްތަނަކަށް ޖަމާވުން ރައްކާތެރި ނޫންކަމަށް އެޗްޕީއޭއިން ކަނޑައަޅާފައިވާތީ ނިންމާފައިވާ ނިންމުމެކެވެ.
މިސްކިތްތަކުގައި ޖަމާޢަތުގައި ނަމާދުކުރުން ކުރިއަށް ނުގެންދިޔަނަމަވެސް، ވަކި ވަކިން ތިބެގެން ނަމާދުކުރެވޭނެއެވެ. އަދި މިސްކިތްތަކުގައި ވަކިވަކިން ނަމާދުކުރާއިރު މީހާގެ ވަށައިގެން 6 ފޫޓު ދުރުމިން ބަހައްޓައިގެން ނަމާދުކުރުމަށް އިރުޝާދުދެއެވެ.
Ads by STO
