ޔޫއޭއީ އިން ކޮވިޑް-19 އަށް ފައްސިވީ ދިވެއްސެއް ކަމަކަށް ނުބެލެވޭ: ސަރުކާރު
ޔޫއޭއީ އިން ކޮވިޑް-19 އަށް ފައްސިވި މީހުންގެ ތެރޭގައި ދިވެއްސެއް ހިމެނޭ ކަމަށް އެ ގައުމުން ބުނި ނަމަވެސް އެއީ ދިވެއްސެއް ކަމަކަށް ނުބެލެވޭކަމަށް ސަރުކާރުން ބުނެފިއެވެ.
މިއަދު ބޭއްވި ނޫސްވެރިންގެ ބައްދަލުވުމުގައި ކޮވިޑް-19ގެ ތަރުޖަމާނު މަބްރޫކް އަޒީޒް ވިދާޅުވީ މިހާތަނަށް ލިބުނު ރަސްމީ މައުލޫމާތުން އެނގޭ ގޮތުގައި ޔުއޭއީ އިން ފައްސިވި މީހާ އަކީ ދިވެއްސެއް ނޫން ކަމަށެވެ. ބޮޑަށް ބެލެވެނީ މޯލްޑިވްސް އާއި މޯލްޑޯވާ އޮޅުނީ ކަމަށް އޭނާ ވިދާޅުވި އެވެ.
"ރަސްމީ ފަރާތްތަކުން ލިބުނު ނަމަށް ބަލާއިރު އެއީ އިރުމަތީ ޔޫރަޕްގެ ގައުމުތަކުގައި ބޭނުންކުރާ ނަމެއް. އެއީ ރާއްޖޭގެ ނަމެއް ނޫން. އެ މައުލޫމާތަށް ބަލާނަމަ ޔޫއޭއީގައި ދިވެއްސަކު ކޮރޯނާވައިރަސް އަށް ޕޮޒިޓިވްވީ ކަމަށް ނުބެލެވޭ." މަބްރޫކް ވިދާޅުވިއެވެ.
ރާއްޖެއިން ބޭރުގައި މިހާތަނަށް ރަސްމީ ކޮށް އެއްވެސް ދިވެއްސަކު ކޮވިޑް-19 އަށް ފައްސިވި ކަމުގެ މައުލޫމާތެއް ލިބިފައެއް ނުވެއެވެ. ނަމަވެސް އިއިނގިރޭސިވިލާތުގައި މަސައްކަތްކުރައްވާ ޑޮކްޓަރެއްގެ އަނބިކަނބަލުން ވައިރަހަށް ފައްސިވި ކަމަށް އެ ޑޮކްޓަރު ވަނީ އަމިއްލަ ފޭސްބުކް ޕޯސްޓެއްގައި ބުނެފައެވެ.
