ޕީއެންސީ އިންތިހާބުގެ ލިސްޓުގެ ޝަކުވާބޮޑުވެ، މުރާޖާކުރަނީ
ސަރުކާރު ހިންގާ، ޕީޕަލް ނޭޝަނަލް ކޮންގްރެސް (ޕީއެންސީ) ގެ އެތެރޭގެ އިންތިހާބުގެ ކެންޑިޑޭޓުންގެ ލިސްޓުގެ ޝަކުވާ ބޮޑުވެ، މުރާޖާކުރަމުންދާ ކަމަށް އެ ޕާޓީން ބުނެފި އެވެ.
ޕީއެންސީން 'އެކްސް' ގައި މިއަދު ކުރި އިއުލާނެއްގައި ބުނީ އިއްޔެ އާންމު ކުރެވުނު ދާއިރާތަކުގެ އިންތިހާބުގައިި ވާދަކުރުމަށް ހުށަހެޅި ފަރާތްތަކުގެ ތެރެއިން ޝަރުތުތަކާއި، އިޖުރާއަތު ފުރިހަމަވެފައިވާ ކެންޑިޑޭޓުންގެ ލިސްޓުގައި އިދާރީ މައްސަލަތައް ހުރިކަމަށް ފާހަގަކުރެވިފައިވާ ކަމަށެވެ.
އެ މައްސަލަތައް މުރާޖައާ ކުރުމަށްފަހު ޝަރުތުތަކާއި، އިޖުރާއަތު ފުރިހަމަވާ ކެންޑިޑޭޓުންގެ ފުރިހަމަ ލިސްޓު ހޮނިހިރު ދުވަހުގެ ކުރިން އާންމުކުރާނެ ކަމަށް ޕީއެންސީން ބުންޏެވެ.
އެ އިންތިހާބު އެންމެ ފުރަތަމަ ބާއްވަން އުޅުނީ މި މަހުގެ 9 ވަނަ ދުވަހުގަ އެވެ. ނަމަވެސް މި މަހުގެ 23 ވަނަ ދުވަހުގައި ބާއްވާ ގޮތައް އިންތިހާބު ފަސްކުރި އެވެ.
ސަބަބެއްކަމަށް ޕީއެންސީން ބުނެފައިވަނީ އެއީ ޖުމްހޫރީ ދުވަހާއި ގުޅިގެން މި މަހުގެ 10 ވަނަ ދުވަސް ރަސްމީ ބަންދު ދުވަހެއްގެ ގޮތުގައި ރައީސް ޑރ. މުހައްމަދު މުއިއްޒު ކަނޑައެޅުމާ ގުޅިގެން ހަފްތާ ބަންދަށް ގިނަ ބަޔަކު ރަށުން ބޭރަށް ދަތުރުކުރާތީ ކަމަށެވެ. އަދި އެ ބަދަލު ގެނެސްފައިވަނީ ކެންޑިޑޭޓުންނާއި ޕާޓީގެ ގިނަ އަދަދެއްގެ މެންބަރުން އެދުމުގެ މަތިން ކަމަށްވެސް އެ ޕާޓީން ވަނީ ބުނެފަ އެވެ.
އެންމެފަހުން ބޭއްވި މަޖިލިސް އިންތިހާބުގައި ޕްރޮގްރެސިވް ކޮންގްރެސް ކޯލިޝަނުގެ ފަރާތުން ކެންޑިޑޭޓުން ވާދަކުރައްވާފައި ވަނީ ކޮންގްރެސް ޕާޓީގެ ޓިކެޓުގަ އެވެ. ޕާޓީން ވާދަކުރާނެ ކެންޑިޑޭޓުން ހޮވުމަށް ބޭއްވި އެތެރޭގެ ޕްރައިމަރީގައި ދެ ޕާޓީގެ މެންބަރުންނަށް ވޯޓު ދިނުމުގެ ފުރުސަތު ދިނެވެ.
އެހެންނަމަވެސް 23 ގައި ބާއްވާ އިންތިހާބުގައި ވޯޓު ދިނުމުގެ ހައްގު ލިބޭނީ ޕީއެންސީގެ މެންބަރުންނަށް އެކަންޏެވެ.
ޕީއެންސީ އިންތިހާބުގައި ސްޓިއަރިން ކޮމިޓީތަކަށް މެމްބަރުންނާއި ދާއިރާތަކަށް ރައީސުންނާއި ނައިބު ރައީސުން ހޮވާނެ އެވެ. އަދި ޒުވާނުންގެ ހަރަކާތުގެ ރައީސުންނާއި އަންހެނުންގެ ހަރަކާތުގެ ރައީސާއިން އިންތިހާބު ކުރެވޭނެ އެވެ. އިންތިހާބުގައި މި މަގާމުތަކަށް 2،095 މެމްބަރުން އިންތިހާބު ކުރާނެ އެވެ.
މަޖިލިހުގެ މެންބަރުންގެ ގޮތުގައި އެ ޕާޓީ ތަމްސީލުކުރައްވާ މެންބަރުން ތިއްބެވި ދާއިރާތަކުގެ ރައީސުންނަށް ވާނީ މެންބަރުންނެވެ. އެ ދާއިރާތަކަށް ހޮވާނީ ނައިބު ރައީސުންނެވެ. އަދި އެ ނޫން ދާއިރާތަކަށް ރައީސުންނާއި ނައިބު ރައީސުން ހޮވާނެ އެވެ.
ކޮންމެ ރަށަކާއި ސިޓީއަކުން ސްޓްއަރިން ކޮމިޓީއެއް ހޮވާއިރު، އާބާދީއަށް ބަލާނެ އެވެ. އެގޮތުން އާބާދީގައި 3،000 މީހުންނަށް ވުރެ މަދުން މީހުން ދިރިއުޅޭ ރަށްރަށުގައި ހޮވާނީ ހަތް މެންބަރުންގެ މައްޗަށް އެކުލެވޭ ކޮމިޓީ އެކެވެ. އަދި 3،000 އަށް ވުރެ ގިނަ މީހުން ދިރިއުޅޭ ރަށްރަށުންނާއި ސިޓީތަކުގެ ދާއިރާތަކުން ކޮންމެ ދާއިރާއަކަށް ނުވަ މެންބަރުންގެ މައްޗަށް އެކުލެވޭ ކޮމިޓީއެއް އިންތިހާބު ކުރާނެ އެވެ.
Ads by STO
