ނިޔާވި އީން: ގޭޓްވޭގެ ކުޅިވަރު ޝަހުސިއްޔަތެއް
ސްރީލަންކާގެ ވެރިރަށް ކޮލަމްބޯގެ ގޭޓްވޭ ކޮލެޖުގައި ކިޔަވަމުންދިޔަ ދިވެހި ދަރިވަރަކު ނިޔާވެއްޖެ އެވެ.
ނިޔާވީ އެ ކޮލެޖުގައި ކިޔަަވަމުން ދިޔަ މާލެ، ވ. ދިހާން، ޒުލައިހާ އީން މުހައްމަދު (19އ) އެވެ.
އޭނާ އަކީ ބްރެއިން ޓިއުމާ ޕޭޝަންޓެކެވެ. އީންގެ ސިކުނޑީގައި ބްރެއިން ޓިއުމަރެއް ހުރިކަން އެނގުނީ މީގެ 5 އަހަރު ކުރިންނެވެ. ނިޔާވުމާ ހަމަޔަށް އީންގެ ސިކުނޑީގެ 7 އޮޕަރޭޝަނެއް ވަނީ ކޮށްފަ އެވެ.
"ރޭޑިއޭޝަންގެ ދެ ވައްތަރުދީފައި، އެންމެ ފަހުން ދިނީ ޕްރޮޓޯން ބީ.. މީގެ 3 މަސް ކުރިން ބޮލަށް ފެތުރުނީ" އީންގެ ބައްޕަ މުހައްމަދު ނާހިދު "ދެން" އާ ވާހަކަ ދައްކަމުން ބުންޏެވެ. އީން ނިޔާވީ ލަންކާ ހޮސްޕިޓަލުގައި، ރޭ ރާއްޖެ ގަޑިން 10:06 ހާއިރު އެވެ.
ގޭޓްވޭގެ ފަހުރު، އާއިލާގެ ތަނބު
ނާހިދު "ދެން" އަށް ބުނީ އޭނާގެ އަންހެން ދަރިފުޅަކީ ކިޔެވުމުގެ އިތުރަށް ގޭޓްވޭގެ ކުޅިވަރުގެ ހަރަކާތްތަކުގައި ގިނަ ވަނަތަކެއް ހޯދި ދަރިވަރެއް ކަމަށެވެ. ގްރޭޑް 9 އަކާ ހަމަޔަށް އެކި ކުޅިވަރުތަކުން ގޭޓްވޭ އަށް 58 މެޑަލް ހޯދާފަ އެވެ. ނާހިދު ބުނީ އޭނާގެ ދަރިފުޅަކީ މުރާލީ، ހީވާގީ އަދި ނަމޫނާ ދަރިއެއް ކަމަށެވެ.
"ކަރާޓީ، ޓެނިސް، ފުޓްބޯޅަ، ނިޔާވިއިރު އީން އަކީ ކޮލެޖުގެ ހައުސްގެ ވައިސް ކެޕްޓަން'' މި ފަހުން ކޮލެޖު ސްޕޯޓްސް މީޓްގައި ވަނަތަކަށް ހޮވުނު ދަރިވަރުންނަށް އެވޯޑް ހަވާލުކޮށްދިނީ ވެސް އީން އެވެ.
ބޮޑު ބޭބެ އިބްރާހިމް ފައިސަލް (އިބޫ) ސިފަކުރި ގޮތުގައި އީން އަކީ އާއިލާ ތެރޭގައި ގުޅުން ބަދަހިކޮށްދޭ އެންމެ މުހިއްމު އެކަކެވެ. އާއިލާ ތެރޭގައި ޖެހޭ މައްސަލަތައް ހައްލުކުރުމަށް އީން އަކީ މުހިއްމު ރޯލެއް އަދާކުރި ކުއްޖެއް ކަމަށް އިބޫ ބުންޏެވެ.
"އަޅުގަނޑުމެންގެ އާއިލާގައި މިހާތަނަށް ހުރި އޯލް ރައުންޑާ" އިބޫ ކިޔައިދިނެވެ.
އީންގެ ޅިޔަނު ޔާސިރު ސިފަކުރި ގޮތުގައި އީން އަކީ އާއިލާގެ އެންމެންގެވެސް ލޯބި ލިބިފައިވާ ކުއްޖެކެވެ. އޭނާގެ ވަކިވުމަކީ އާއިލާއަށް ފޫނުބެއްދޭނެ ވަރުގެ ގެއްލުމެކެވެ.
".. އީން ވަކިވުމަކީ އަޅުގަނޑުމެންނަށް ބޮޑު ގެއްލުމެއް، އެންމެ ފަހުވަގުތާ ޖެހެންދެންވެސް ޝަކުވާ އެއް ކަރުނަތިއްކެއް ނުބާލުވާ" ޔާސިރު ބުންޏެވެ.
އީން ނިޔާވުމުގެ ހިތާމާގަ ގޭޓްވޭ ކޮލެޖުން ފޭސްބުކް ގައި ކުރި ޕޯސްޓެއްގައި ބުނީ އީން އަކީ މީހުންނަށް އޯގާތެރި އަދި ހިތްވަރުގަދަ ދަރިވަރެއް ކަމަށެވެ.
View this post on Instagram
އީންގެ ވަކިވުމަކީ މުޅި ކޮލެޖަށްވެސް އޭގެ ދާއިމީ އަސަރުކުރާނެ ކަމެއް ކަމަށް އެ ކޮލެޖުން ލިޔުނު ތައުޒިޔާގެ މެސެޖުގައި ބުންޏެވެ. އޭނާ ނިޔާވުމުގެ ހިތާމާގައި ސްކޫލު މިއަދު ބަންދެވެ.
އީންގެ ޖަނާޒާ ބޭއްވީ އަސުރު ނަމާދަށް ފަހު ކޮލަމްބޯ މުސްލިމް ބުރިއަލް ގްރައުންޑް، މާލިގާވައްޓަ ގްރައުންޑްގަ އެވެ. އީންގެ ޖަނާޒާގައި ކޮލެޖުން ގާޑް އޮފް އޮނާއެއް އެރުވި އެވެ.
Ads by STO
