އައްޑޫ 5 ގެއެއްގެ ފުރާޅު އެއްލާލުމާ ގުޅިގެން 17 މީހުންނަށް ވަގުތީ ބޯހިޔާވަހިކަން
ވިއްސާރައިގެ ސަބަބުން އައްޑޫ ސިޓީ މަރަދޫ ގެއެއްގެ ފުރާޅުއެއްލާލުމާ ގުޅިގެން އެގޭގެ 17 މީހަކު އެހެން ގެއަކަށް ބަދަލުކޮށްފި އެވެ.
ނޭޝަނަލް ޑިޒާސްޓާ މެނޭޖްމަންޓް އޮތޯރިޓީ (އެންޑީއެމްއޭ) އިން "އެކްސް" ގައި މިއަދު ކުރި ޕޯސްޓެއްގައި ބުނީ ވައިގަދަވެ، ގެއެއްގެ ފުރާޅު އެއްލާލުމާ ގުޅިގެން އެ ގޭގެ ފަރާތްތަކަށް އެހީތެރިކަން ފޯރުކޮށްދިނުމުގެ މަސައްކަތް އަައްޑޫ ކައުންސިލާ ގުޅިގެން ކުރަމުންދާ ކަމަށެވެ.
އެގޮތުން އެގޭގެ 12 އަހަރުން ދަށުގެ 4 ކުދިންނާއި 13 މީހަކު އެ އާއިލާގެ ގެއަކަށް ބަދަލުކޮށްފައިވާ ކަމަށް އެންޑީއޭއެމް އިން ބުންޏެވެ.
މޯލްޑިވްސް ނެޝަނަލް ޑިފެންސް ފޯސް (އެމްއެންޑީއެފް) އިން ބުނީ މިހާރު ރާއްޖެއަށް ކުރަމުންދާ ވިއްސާރާގައި އައްޑޫގެ 5 ގެއެއްގެ ފުރާޅު ވަޔާއ އެއްލާލުމާ ގުޅިގެން އެމްއެންޑީއެފް ސަދަން އޭރިއާ ކޮމާންޑްގެ، ސިފައިން އެހީތެރިކަން ފޯރުކޮށްދީފައިވާ ކަމަށެވެ.
އެއީ އައްޑޫ ސިޓި މަރަދޫގެ ގެއަކާއި މަރަދޫފޭދޫގެ ގެއެއްގެ އިތުރުން ފޭދޫގެ ދެ ގެއަކާއި ހުޅުދޫގެ ގެއެއް ކަމަށް އެމްއެންޑީއެފްއިން ބުނެ އެވެ.
އެމްއެންޑީއެފްއިން ބުނީ އެ 5 ގޭގެ ފުރާޅު އެެއްލާލުމާ ގުޅިގެން ފުރާޅު މަގުމަތިން އެއްފަރާތްކޮށް، ފުރާޅު ހެދުމުގައި އެހީތެރިކަން ފޯރުކޮށްދީފައިވާ ކަމަށެވެ.
އެ ހާދިސާގައި އެއްވެސް މީހަކަށް އަނިޔާއެއް ލިބިފައެއް ނުވާ ކަމަށް އެމްއެންޑީއެފުން ބުންޏެވެ.
ރާއްޖެ އަށް މިހާރު ކުރަމުންދާ ވިއްސާރައަކީ ރާއްޖޭގެ އިރުން ބޭ އޮފް ބޭންގަލްގައި އުފެދިފައިވާ ކޮޅުގަނޑަކާއި ރާއްޖޭގެ ދުރުން ރާއްޖޭގެ އިރުދެކުނުގައި އުފެދިފައިވާ ކޮޅިގަނޑާ ގުޅިގެން ކުރަމުންދާ ވިއްސާރައެކެވެ.
އެ ކޮޅިގަނޑުގައި ބުދަ ދުވަހުން ފެށިގެން 5 ދުވަސް ވަންދެން މޫސުން ގޯސްވާނެ ކަމަށް މެޓުން ބުނެފައިވެ އެވެ.
މިއަދު އިރުއޮއްސި 6:30 ޖެހުމާ ހަމައަށް މޫސުން ގޯސްވާނެކަމަށް ލަފާކޮށް މުޅިރާއްޖެއަށް ވަނީ ވައިޓް އެލާޓް ނެރެފަ އެވެ.
Ads by STO
