އިންޓަނެޓްގެ އަގަށް ގެނައި ބަދަލުތަކަށް އަންނަ މަހުން ފެށިގެން އަމަލުކުރަން ފަށަނީ
ކޮވިޑް-19އާ ގުޅިގެން އިންޓަނެއްޓުގެ އަގަށް ގެނައި ބަދަލުތަކަށް އަންނަ މަހު އެކަކުން ފެށިގެން އަމަލުކުރަން ފަށާނެ ކަމަށް ސަރުކާރުން ބުނެފިއެވެ.
މިރޭ ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން ކޮވިޑް-19ގެ ތަރުޖަމާނު މަބްރޫކް އަޒީޒް ވިދާޅުވީ އިންޓަނެޓްގެ އަގުތަކާގުޅޭގޮތުން ރާއްޖޭގައި ޓެލެކޮމިއުނިކޭޝަންގެ ޚިދުމަތްތައް ފޯރުކޮށްދޭ ކުންފުނިތަކާއެކު ކުރަންޖެހޭ މަޝްވަރާތައް މިހާރު ކޮށް ނިމިފައިވާކަމަށެވެ. އަދި މިފެށޭ މަހުގެ 1 ވަނަ ދުވަހުން ފެށިގެން ޚިދުމަތަށް އަންނަ ބަދަލުތައް ފެނިގެންދާނެކަމަށް އޭނާ ވިދާޅުވިއެވެ.
މަބްރޫކް ވިދާޅުވީ، މިކަމާގުޅޭ އިތުރު މަޢުލޫމާތުތައް ޓެލެކޮމް ޚިދުމަތްދޭ ކުންފުނިތަކުން ކުރިއަށް އޮތް ދެ ދުވަހެއްތެރޭ އާއްމުންނާއި ހިއްސާކުރާނެކެމަށެވެ.
"އިންޓަނެޓްގެ ޚިދުމަތާގުޅޭގޮތުން ޓެލެކޮމް ކުންފުނިތަކާއެކު ސަރުކާރުގެ ފަރާތުން ކުރަންޖެހޭ މަޝްވަރާތައް މިހާރު ވަނީ ނިމިފައި. އޭޕްރީލް 1 އިން ފެށިގެން ޚިދުމަތަށް އަންނަ ބަދަލުތައް ފެނިގެންދާނެކަމަށް އެބޭފުޅުން ވިދާޅުވެފައިވޭ. މިކަމާގުޅޭ އިތުރު މަޢުލޫމާތު ކުރިއަށް އޮތް ދެ ދުވަހު ޓެލެކޮމް ކުންފުނިތަކުން ހާމަކުރާނެ" މަބްރޫކް ވިދާޅުވިއެވެ.
ރާއްޖޭގައި އިންޓަނެޓްގެ ޚިދުމަތް ފޯރުކޮށްދޭ އަގުތަކަށް ހެޔޮ ބަދަލުތަކެއް ގެނައުމަކީ ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙުގެ މުހިއްމު ރިޔާސީ ވަޢުދުފުޅެކެވެ.
Ads by STO
