ވިސާއެއް ނެތި ރާއްޖޭގައި އުޅޭ ފްރާންސްގެ މުސްލިމް އާއިލާ ޑީޕޯޓްކުރާތީ މުޒާހަރާކުރަނީ
ވިސާއެއް ނެތި ރާއްޖޭގައި އުޅޭ ފްރާންސްގެ މުސްލިމް އާއިލާ ޑީޕޯޓްކުރާތީ މުޒާހަރާކުރަން ޖަމިއްޔާއަކުން ނިންމައިފި އެވެ.
ތ. ވޭމަންޑޫގައި މިހާރު ދިރިއުޅެމުންދާ 6 މީހުންގެ ފްރާންސްގެ އާއިލާ ރާއްޖޭގައި އުޅޭތާ ވަނީ 12 އަހަރުވެފަ އެވެ.
ރޭ އިމިގްރޭޝަން ކޮންޓްރޯލަރު މުހައްމަދު ޝަމްއާން ވަހީދު ވިދާޅުވީ އެ މައްސަލަ ބަލަންފަށައި އެ އާއިލާގެ އިސް ފަރާތް އިމިގްރޭޝަނަށް މިދިޔަ އޮކްޓޫބަރު މަހު ހާޒިރުވެސްކުރި ކަމަށެވެ.
އަދި އެ ފަރާތްތަކުގެ ޕާސްޕޯޓުގެ މުއްދަތު ހަމަވެފައިވާތީ އެ މީހުންގެ ޓްރެވަލް ޑޮކިއުމަންޓްސް ހޯދަމުންދާ ކަމަށާއި އެ ލިޔުންތައް ލިބުނުހާ އަވަހަކަށް އެ އާއިލާ ފޮނުވާލާނެ ކަމަށް ވެސް ޝަމްއާން ވިދާޅުވި އެވެ.
އެހެން ނަމަވެސް ރާއްޖޭގެ ޖަމިއްޔާއެއް ކަމަށްވާ ޔޫތު ފޯ ޔުނިޓީން ބުނީ އެއީ އަނިޔާވެރި ކަމުން ސަލާމަތްވުމަށް ރާއްޖޭގެ ހިޔާވަހިކަން ހޯދި ނިކަމެތި އާއިލާއެއް ކަމަށެވެ.
އެހެންވެ މިރޭ 08:30 ގައި އެ އާއިލާގެ ދިފާއުގައި އާޓިފިޝަލް ބީޗުގައި އިމިގްރޭޝަންގެ ނިންމުމާ ދެކޮޅަށް އިހުތިޖާޖުކުރަން ނިންމާފައިވާ ކަމަށް އެ ޖަމިއްޔާއިން ބުނެފައި އެވެ.
އަދި އެ މީހުންނަށް އެސައިލަމް ދިނުމަށް ވެސް އެ ޖަމިއްޔާއިން ވަނީ ގޮވާލައިފަ އެވެ.
"ދެން" އަށް އެނގިފައިވާ ގޮތުން އެ އާއިލާ ރާއްޖޭގައި އުޅޭތީ 12 އަހަރު ވެއްޖެ އެވެ. އަދި އެ އާއިލާގެ ބައެއް ކުދިން އުފަންވީވެސް ރާއްޖޭގަ އެވެ. އަދި އާއިލާގެ އެންމެ އިސްކޮށް އުޅޭ މީހާ ކުރަނީ މަސްވެރިކަމެވެ.
Ads by STO
