ޕޭމަންޓް ލިންކެއް ހިމަނައި ވޭޕްގެ ޖޫރިމަނާގެ މައުލޫމާތު އެސްއެމްއެސް ކުރަނީ
ވޭޕްއާ ގުޅޭ ޖޫރިމަނާތައް ޕޭމަންޓް ލިންކަކާއެކު މޮބައިލް ފޯނަށް ފޮނުވަމުންދާނެ ކަމަށް ފުލުހުން މިއަދު ބުނެފި އެވެ.
ދުންފަތް ކޮންޓްރޯލްކުރުމުގެ ގާނޫނަށް ގެނައި އިސްލާހާއެކު އިއްޔެއިން ފެށިގެން ވޭޕް ކުރުމާއި ވޭޕްގެ ތަކެތި ވިއްކުމާއި އަދި ބެހުން ވެސް މަނާވާނެ އެވެ. އަދި އެކަންކޮށްފިނަމަ ޖޫރިމާނާ ކުރެވޭނެ އެވެ.
ފުލުހުން ނެރުނު ބަޔާނުގައި ބުނީ އެ އިސްލާހުތައް ތަންފީޒުކޮށް އެ ގަވައިދާ ހިލާފުވާ ފަރާތްތައް ޖޫރިމަނާކުރާނެ ކަމަށެވެ.
ފުލުހުން ބުނީ އެ ގޮތުން ޖޫރިމަނާ ކުރެވޭ ފަރާތްތަކަށް އެކަމުގެ މައުލޫމާތު މޯބައިލް ފޯނުގެ ޒަރިއްޔާއިން ކުރު މެސެޖެއް މެދުވެރިކޮށް ފޮނުވާނެ ކަމަށެވެ. އަދި އެ މެސެޖުގައި، ޖޫރިމަނާ ދެއްކުމަށް ވާރު ޕޭގެ ޕޭމަންޓް ލިންކެއް ހިމެނިފައިވާނެ ކަމަށް ފުލުހުން ބުނެފައިވެ އެވެ.
"ވީމާ، ދުންފަތް ކޮންޓްރޯލުކުރުމާ ބެހޭ ގާނޫނަށް ގެނެވުނު އިސްލާހަށް ހުރިހާ ފަރާތްތަކުންވެސް ފުރިހަމައަށް އަމަލުކުރެއްވުމަށާއި، މި ގާނޫނު ތަންފީޒުކުރުމުގައި ދިވެހި ފުލުހުންގެ ޚިދުމަތަށް ފުރިހަމަ އެއްބާރުލުން ދެއްވުމަށް އިލްތިމާސްކުރަމެވެ. އަޅުގަނޑުމެން އެންމެންގެ ވެސް އަމާޒަކަށް ވާންވާނީ ދުންފަތުގެ އިސްތިއުމާލުކުރުމުން ދުރުހެލިވެފައިވާ ދުޅަހެޔޮ މުޖުތަމައެއް ބިނާކުރުމެވެ."ފުލުހުން ބުނެފައިވެ އެވެ.
އާދިއްތަ ދުވަހު އަމަލުކުރަން ފެށި އިސްލާހުގެ ދަށުން ވޭޕްއާ ގުޅޭ ކަންކަން ކޮށްފިނަމަ ބޮޑެތި އަދަދުތަކުން ޖޫރިމަނާކުރެވޭނެ އެވެ.
އަދަބުތައް:
- އީ- ސިނގިރޭޓާއި ވޭފްކުރުމަށް ބޭނުންކުރާ އާލާތްތަކާއި އެ އެއްޗެއްސާއެކު ބޭނުންކުރުމަށް ތައްޔާރުކޮށްފައިވާ އުފެއްދުންތައް ރާއްޖޭގައި ވިއްކުން - 20,000ރ ޖޫރިމާކޮށް, ވިއްކި ކޮންމެ އީ-ސިނގިރޭޓް ނުވަތަ ވޭޕްކުރުމަށް ބޭނުންކުރާ އާލާތަކަށް 10,000ރ މަގުން ޖޫރިމަނާކުރުން.
- އީ- ސިނގިރޭޓާއި ވޭފްކުރުމަށް ބޭނުންކުރާ އާލާތްތަކާއި އެ އެއްޗެއްސާއެކު ބޭނުންކުރުމަށް ތައްޔާރުކޮށްފައިވާ އުފެއްދުންތައް ރާއްޖޭގައި ހިލޭ ބެހުން - 10,000ރ ޖޫރިމަނާކުރުން.
- އީ- ސިނގިރޭޓާއި ވޭފްކުރުމަށް ބޭނުންކުރާ އާލާތްތަކާއި އެ އެއްޗެއްސާއެކު ބޭނުންކުރުމަށް ތައްޔާރުކޮށްފައިވާ އުފެއްދުންތައް ރާއްޖޭގައި ބޭނުންކުރުން - 5000ރ ޖޫރިމަނާކުރުން.
- އެފަދަ އެއްޗެއް ވިއްކީ ނުވަތަ ހިލޭ ބެހީ ކުޑަކުއްޖަކަށް ނަމަ - 10,000ރ ޖޫރިމަނާކުރުމުގެ އިތުރުން އެ ފަރާތެއް 50,000ރ ޖޫރިމަނާކުރުން.
އެވަރަށް ބެލޭނެބާ