ދުންފަތުގެ އިސްތިއުމާލު ނުކުރެވޭ ތަންތަން އިތުރުކުރެވޭ ގޮތަށް އާ ގަވައިދެއް އެކުލަވާލަނީ
ދުންފަތުގެ ދުމުން މުޖުތަމައު ރައްކާތެރިކުރުމަށް ދުންފަތުގެ އިސްތިއުމާލު ނުކުރެވޭ ތަންތަން އިތުރުކުރެވޭ ގޮތަށް އާ ގަވައިދެއް އެކުލަވާލުމުގެ މަސައްކަތް ކުރަމުންދާކަން ހެލްތު މިނިސްޓްރީން ކުރަމުން ހާމަކޮށްފި އެވެ.
ހެލްތު މިނިސްޓްރީ އާއި ޓީވީ މޯލްޑިވްސް ގުޅިގެން ގެނެސްދޭ "ދަފަރާ" ޕެނަލް ޑިސްކަޝަންގައި ހެލްތު މިނިސްޓްރީގެ ޑެޕިއުޓީ މިނިސްޓަރު އިސްމާއިލް ޒާހިރު ވިދާޅުވީ އެ ގަވާއިދަށް ކޮމެންޓްތައް ލިބި މިހާރު ޑްރަފްޓް ނިމިފައިވާ ކަމަށެވެ.
އެ ގަވައިދު ގެޒެޓް ކުރުމުން ދުންފަތުގެ އިސްތިއުމާލުކުރެވޭނެ ތަންތަނާއި ނުކުރެވޭނެ ތަންތަނަށް ބޮޑެތި ބަދަލުތަކެއް އަންނާނެ ކަމަށް ޒާހިރު ވިދާޅުވި އެވެ.
އެގޮތުން މިހާރު ދުންފަތުގެ އިސްތިއުމާލު ނުކުރެވޭނެ ކަމަށް ކަނޑައަޅާފައިވާ ތަންތަން އިތުރުވެ ދުންފަތުގެ އިސްތިއުމާލު ކުރެވޭނެ ތަންތަންވެސް ކަނޑައެޅިގެންދާނެ ކަމަށް އޭނާ ވިދާޅުވި އެވެ.
ޒާހިރު ވިދާޅުވީ ގަވައިދު އާއްމުކުރާ ހިސާބުން ގާނޫނު ތަންފީޒުކުރާ އިދާރާތަަކަށް ވެސް އެ ގާނޫނު ތަންފީޒުކުރުމަށް ކުރަންޖެހޭ ކަންކަން ފަސޭހަވެގެންދާނެ ކަމަށެވެ.
ދުންފަތުގެ އިސްތިއުމާލުކުރުން މަނާތަންތަން މިހާރު ވެސް ކަނޑައަޅައި އެކަން އެންގުމަށް ނޯޓިސް ވެސް ތަންތަނުގައި ހަރުކޮށްފައި ހުރެ އެވެ.
އެ ތަންތަނުގައި ދުންފަތުގެ އިސްތިއުމާލުކުރުމުން ޖޫރިމަނާކުރެވޭ ގޮތަށް ގަވައިދުގައި އޮތަސް އެކަން ތަންފީޒުކުރަނީ ވަރަށް މަދުންނެވެ.
ދުންފަތް ކޮންޓްރޯލް ކުރުމަށް ގާނޫނަށް ގެނެވުނު އިސްލާހާ ގުޅިގެން އަތޮޅުތަކުގައި އާންމުން ހޭލެންތެރިކުރުމަށް، ކައުންސިލްތަކާއި، އަންހެނުންގެ ތަރައްގީއަށް މަސައްކަތް ކުރާ ކޮމިޓީ، އަދި ޖަމިއްޔާތަކާ ގުޅިގެން މިނިސްޓްރީން މިހާރު ދަނީ ކުރަމުން ނެވެ.
އަދި ސަރުކާރުގެ މުޢައްސަސާތަކުގެ ކަމާގުޅޭ ފަރާތްތައް އަހުލުވެރި ކުރުމާއި އެފަރާތްތަކާ ގުޅިގެން މަސައްކަތްތަކެއް ކުރެވެމުންދާކަމަށް ވެސް ޒާހިރު ވިދާޅުވި އެވެ.
