މާލޭ 36 ގެއެއްގެ 226 މީހަކަށް ވަގުތީ ބޯހިޔާވަހިކަން ދީފި
ރާއްޖެއަށް މިހާރުކުރަމުންދާ ވިއްސާރާގައި ވެރިރަށް މާލެއަށް އިއްޔެ ހުއްޓާނުލައި ބޯކޮށް ވެހުނު ވާރޭގައި 36 ގެއަކަށް ފެންވަދެ ގެއްލުންވެގެން އެ ގެތަކުގެ 226 މީހަކަށް ވަގުތީ ބޯހިޔާވަހިކަން ފޯރުކޮށްދީފި އެވެ.
ނޭޝަނަލް ޑިޒާސްޓަ މެނޭޖްމެންޓު (އެންޑީއެމްއޭއިން) ރޭ 'އެކްސް' ގައި ކުރި ޕޯސްޓެއްގައި ބުނީ މާލޭގައި ފެންބޮޑުވެގެން އެކި އެކި އެހީތަކަށް އެދި 774 ތަަނަކުން ރިޕޯޓްކޮށްފައިވާ ކަމަށެވެ. އޭގެ ތެރެއިން 554 ރިކުއެސްޓަކީ ވެލިބަސްތާ ޖެހުމަށް އެދި ލިބުނު ރިކުއެސްޓް ކަމަށް އެންޑީއެމްއޭއިން ބުންޏެވެ.
ޒަރޫރީ ބޭނުންތަަކަށް ހުރަސް އެޅިގެން ރިޕޯޓް ކުރެވުނު 53 ގެއެއްގެ ރެޕިޑް އެސެސްމެންޓް، ދިވެހި ރެޑްކްރެސެންޓާއި ފުލުހުން ކުރިއަށް ގެންގޮސްފައިވާ ކަމަށް އެންޑީއެމްއޭއިން ބުންޏެވެ.
އެންޑީއެމްއޭއިން ބުނީ ވަގުތީ ބޯހިޔާވަހިކަން ފޯރުކޮށްދިނީ ދިރިއުޅުމަށް ހުރަސްއެޅޭ ހާލަތުގައިވާ 36 ގޭގެ މީހުންނަށް ކަމަށެވެ.
ފެންބޮޑުވެގެން ވެލިބަސްތާޖެހުމުގެ މަސައްކަތް ސިޓ ކައުންސިލާ، ލޯކަލް ގަވަމެންޓް މިނިސްޓްރީއާ ދިވެހި ސްކައުޓުން އަދި އެމްއެންޑީއެފްގެ އިތުރުން އާންމު ފަރުދުން މަސައްކަތްކޮށްފައިވާ ކަމަށް އެންޑީއެމްއޭއިން ބުންޏެވެ.
އެމްއެންޑީއެފުން ހާމަކޮށްފައިވާ ގޮތުން މިއަދު ހެނދުނު 7:45 ހާ ހަމައަށް 17 ޕަންޕެއް ބޭނުންކޮށްގެން މާލެއިން 30،406 ޓަނުގެ ފެން ވަނީ ބޭރުކޮށްފަ އެވެ.
މާލޭގެ އިތުރުން ބޯކޮށްވާރޭވެހި ގެއްލުން ލިބިގެން 8 ރަށަކުން ރިޕޯޓްކޮށްފައިވެ އެވެ.
