ޑްރެޖަރު އިތުރުކޮށް، ރަސްމާލެ މަޝްރޫއު އަވަސްކުރަނީ
މި ސަރުކާރުގެ ބޯހިޔާވަހިކަމުގެ އެންމެ ބޮޑު މަޝްރޫއު، ރަސްމާލެ ހިއްކުމުގެ މަސައްކަތުގެ ސްޕީޑު މި އަހަރު ތިން ގުނަ ބާރުވާނެ ކަމަށް ރައީސް ޑރ މުހައްމަދު މުއިއްޒު މިއަދު ވިދާޅުވެއްޖެ އެވެ.
ހުސްވި 2024 ވަނަ އަހަރު އަތޮޅުތަކާ ރަށްތަކާ ސިޓީތަކުގެ ލޯކަލް ކައުންސިލުތަކާ ބައްދަލުކުރެއްވުމަށް ރައީސް ފަށްޓަވައިގެން ކުރިޔަށްގެންދަވާ ސިލްސިލާ ދަތުރުފުޅުތަކުގެ ތެރެއިން މިއަހަރު ކުރައްވާ އެންމެ ފުރަތަމަ ދަތުރުފުޅުގައި ކ ގުޅިއަށް ވަޑައިގެން އެމަނިކުފާނު ވިދާޅުވީ ސަރުކާރުން ބޭނުންވި ސްޕީޑުގައި އެ ރަސްމާލެ މަޝްރޫއުގެ މަސައްކަތް ކުރިއަށް ގެންދެވިފައިނުވާ ކަމަށެވެ. އެހެން ދިމާވީ މި ސަރުކާރަށް "ވާރުތަ" ވި އިގްތިސާދުގެ ތެރެއިން ކުރިމަތިވި ދަތިތައް ހައްލުކުރަން ޖެހިގެން ކަމަށް ވިދާޅުވި އެވެ.
އެކަމަކު އެކަންތައްތަކުން އަރައިގަނެ ގުޅީ ކައިރީގައި އޮންނަ ރަސްމާލެ ހިއްކުމުގެ މަސައްކަތް ބާރު ސްޕީޑުގައި ކުރިއަށް ގެންދަން ނިންމާފައިވާކަން ރައީސް ހާމަކުރެއްވި އެވެ.
އިތުރު ބައެއް ކޮމްޕެނީތަކުން އެތަނަށް ޑްރެޖަރު މޮބިލައިޒް ކުރުވައިގެން އެއްފަހަރާ އެތައް މަޝްރޫއުތަކެއް އެތައް ފަރާތެއްގެ މަސައްކަތެއް ފެށުމަށް މަސައްކަތްކުރަނީ. އެހެންވީމަ ސްޕީޑު ދެގުނަ އަދި ތިން ގުނަ އަށް ބާރުވާނެ
ފުށިދިއްގަރު ފަޅު ހިއްކައިގެން ކުރިއަށްގެންދާ ރަސްމާލެ މަޝްރޫއުއަކީ ގެދޮރުވެރިކަމުގެ އިތުރުން އިގްތިސާދީ ގޮތުން ރާއްޖެއަށް ދިމާވެފައިވާ މައްސަލަތަކަށް ލިބޭނެ ހައްލެއްކަން ފާހަގަކުރައްވާ، މި އަހަރަކީ ބޯހިޔާވަހިކަމުގެ އަހަރު ކަމަށް ރައީސް ވިދާޅުވާ ވިދާޅުވުން ތަކުރާރުކުރެއްވި އެވެ.
ރަސްމާލެ މަޝްރޫއުގެ ސްޕީޑު ހަލުވިވާނެ ކަމަށް ރައީސް ވިދާޅުވެފައިވާއިރު، ސްރީލަންކާގެ ކެޕިޓަލް މެރިން އެންޑް ސިވިލް ކޮންސްޓްރަކްޝަން ކޮމްޕެނީ (ސީއެމްސީސީ) އާ ހަވާލުކޮށްގެން ރަސްމާލެ ހިއްކަންފެށީ ޑިސެމްބަރު 18، 2023 ގަ އެވެ. އެކަމަކު އެ ކުންފުނިން މަސައްކަތް ފެށުމަށް ފަހު ކުރިއަށް ގެންދަން ބޭނުންވާ ފައިސާ ނުހޯދިގެން މަޝްރޫއު މަޑުޖެހުމަށް ފަހު އަލުން ފަށައިގަތީ ހުސްވި އަހަރުގެ ނޮވެމްބަރު މަހު އެވެ.
