ފުވައްމަލަކު ޑްރަގު ދެ ބޮޑުން އަލުން ބަންދަށް
ފުވައްމުލަކު ސިޓީގައި ފުލުހުން ކުރިއަށް ގެންދިޔަ މަސްތުވާތަކެތީގެ އޮޕަރޭޝަންގައި، އެ ތަކެތީގެ ވިޔަފާރިކޮށް މަނީލޯންޑާ ކުރުމުގެ ތުހުމަތުގައި ހައްޔަރުކޮށްފައި ވަނިކޮށް ބަންދު އަމުރު ހައިކޯޓުން ބާތިލުކުރުމުން ދޫކޮށްލި ދެ މީހުން މިއަދު ހައްޔަރުކޮށް ކްރިމިނަލް ކޯޓުން އަލުން ބަންދުގެ މުއްދަތު ޖަހައިފި އެވެ.
އެ މައްސަލާގައި ހުސްވި ޑިސެމްބަރު މަހުގެ 9 ވަނަ ދުވަހު ފުލުހުންގެ ހައްޔަރުކުރީ ދޫޑިގަން، ކަރަންކާވިލާ އަހުމަދު ނިއުޝާދު (34އ) އާއި ދޫޑިގަން، ޒަމާނީވިލާ، ހަސަން އާޒިމް (29އ) އެވެ.
ފުލުހުންގެ ތަހުގީގަށް ހޯދިފައިވާ ގޮތުގައި، ފާއިތުވި 5 އަހަރު ތެރޭގައި ނިއުޝާދުގެ ބޭންކު އެކައުންޓް މެދުވެރިކޮށް 21 މިލިއަނަށްވުރެ ގިނަ ރުފިޔާގެ މުއާމަލާތް ހިންގާފައިވެ އެވެ. އަދި ފާއިތުވި 2 އަހަރު ތެރޭގައި އާޒިމްގެ ބޭންކު އެކައުންޓް މެދުވެރިކޮށް 7 މިލިއަނަށްވުރެ ގިނަ ރުފިޔާގެ މުއާމަލާތް ހިންގާފައިވާކަން ވަނީ ފާހަގަކުރެވިފަ އެވެ.
އެ މައްސަލައާ ގުޅިގެން 21 މީހެއްގެ އަދި 2 ކުންފުންޏެއްގެ އެކައުންޓް ކޯޓު އަމުރުގެ ދަށުން ވަނީ ހިފަހައްޓާފައިވެ އެވެ. ހައްޔަރުކުރި މީހުންގެ މައްޗަށް ތުހުމަތު ކުރެވޭ ޖުމުލަ 75 މައްސަލައެއް ތަހުގީގުކޮށް، 65 މައްސަލައެއްގެ ތަހުގީގު ނިންމައި ޕްރޮސިކިއުޓާ ޖެނެރަލްގެ އޮފީހަށް ވަނީ ފޮނުވާފަ އެވެ.
ޝަރީއަތް ނިމެންދެން އާޒިމް އާއި ނިއުޝާދު ބަންދުކުރުމަށް ފުވައްމުލަކު މެޖިސްޓްރޭޓް ކޯޓުން ހުރި ހުކުމް ހައިކޯޓުން ވަނީ މި މަހުގެ 9 ވަނަ ދުވަހު ބާތިލުކޮށްފަ އެވެ.
އެ މީހުން އަލުން ހައްޔަރުކޮށްފައިވާއިރު، ކްރިމިނަލް ކޯޓުން މިއަދު ނެރުނު ކޯޓު އަމުރުގައި ބުނީ އާޒިމްގެ ދޫކޮށްލަން ހައި ކޯޓުން ނެރުނު އަމުރު ބާތިލުކުރި ނަމަވެސް އަލުން ހައްޔަރުކޮށް ބަންދުކުރުމަށް ހުރަހެއް ނެތް ކަމަށެވެ.
އޭނާގެ އެކައުންޓުން 5 މިލިއަން ރުފިޔާ ރޯލްކޮށްފައިވާއިރު، އޭނާ އަކީ ދާއިމީކޮށް ވަޒީފާއެއްގައި އުޅުނު މީހެއްކަން އެނގެން ނެތްކަމަށާއި، އޭނާ އަށް މުސާރައިގެ ގޮތުގައި ލިބުނު ފައިސާއާއި ނުބައްދަލު އަދަދުތަކުން އޭނާގެ އެކައުންޓަށް ފައިސާ ޖަމާވެ އެހެން މީހުންނަށް ފައިސާ ފޯރުކޮށްދީފައިވާ ކަމަށެވެ.
ނިއުޝާދުގެ ބަންދު އަމުރުގައިވާ ގޮތުން ހައިކޯޓު އަމުރު ބާތިލުކުރުމުން އޭނާ މާލެއަށް ގޮސް މާލެކައިރީ ރަށަކަށް ދާން އުޅޭކަމުގެ މައުލޫމާތު ފުލުހުންނަށް ލިބުމާ ގުޅިގެން އޭނާ ހައްޔަރުކުރުމުގެ މަސައްކަތް އަވަސްމިނެއްގައި ކުރިއަށް ގެންދިޔުމަށް ފުވައްމުލަކު ކޯޓުން ފުލުހުން އަމުރު ހޯދާފައިވާ ކަމަށެވެ.
ނިއުޝާދުގެ ބަންދަށް 10 ދުވަސް އަދި އާޒިމްގެ ބަންދަށް ކްރިމިނަލް ކޯޓުން ވަނީ 7 ދުވަސް ޖަހާފަ އެވެ.
Ads by STO
