ބައެއް ބަދަލުތަކާ އެކު 100 ރުފިޔާގެ އާ ނޫޓެއް ނެރެނީ

"ރަން ދިހަ ފަހެއް" ނޫޓު ސީރީސްގައި ހިމެނޭ 100 ރުފިޔާގެ ނޫޓު ބައެއް ބަދަލުތަކާ އެކު ނެރެން ނިންމައިފި އެވެ.

Ads by STELCO

ރާއްޖޭގެ މިނިވަން ކަމަށް 50 އަހަރު ފުރުމާ ދިމާކޮށް، އާ ނޫޓު ސީރީސްއެއް ތައާރަފުކޮށްފައި ވަނީ 2016 ވަނަ އަހަރުގެ ޖެނުއަރީ މަހުގެ 26 ވަނަ ދުވަހު އެވެ. ޕޮލިމާ ކަރުދާހުގައި އާ ޑިޒައިނަކަށް ހެދި "ރަން ދިހަ ފަހެއް" ނޫޓު ސީރީސް ނެރުމަށް ފަހު، ކުރިން ބޭނުން ކުރަމުން އައި ކަރުދާސް ނޫޓު ބޭނުން ކުރުން ހުއްޓާލި އެވެ.

އެ ސީރީސްގައި ހިމެނެނީ 5، 10، 20، 50، 100، 500 އަދި 1،000 ރުފިޔާގެ ނޫޓެވެ.

މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން އިއްޔެ "އެކްސް" ގައި ކުރި ޕޯސްޓެއްގައި ބުނީ 100 ރުފިޔާގެ ނޫޓު ބައެއް ބަދަލުތަކާ އެކު ނެރެން ހަމަޖެހިފައި ވަނީ މި މަހުގެ 19 ވަނަ ދުވަހު ކަމަށެވެ.

އަލަށް ޗާޕުކުރި ނޫޓުގައި ތާރީހެއްގެ ގޮތުގައި ޖަހާފައި ވަނީ މިދިޔަ އަހަރުގެ ޖުލައި މަހުގެ 7 ވަނަ ދުވަހެވެ. ނޫޓުގައި ސޮއިކުރައްވާފައި ވަނީ ކުރީގެ ގަވަރުނަރު އަލީ ހާޝިމެވެ.

އަލަށް ނެރޭ ނޫޓުގެ ދެ ފަރާތުގައި ދިވެހި ރުފިޔާގެ ނިޝާން ހިމަނާފައިވެ އެވެ. ރުފިޔާގެ ނިޝާން ހިމަނާފައި ވަނީ ނޫޓުގެ މޫނުމަތީގެ ވާތް ފަރާތުގެ މޫނުމަތީ އަގާ އެކު އަދި ނޫޓުގެ ފަހަތުގެ ކަނާތްފަރާތު މަތީގެ މޫނުމަތީ އަގާ އެކުގަ އެވެ.

އެމްއެމްއޭއިން ބުނީ މި ނޫޓާ އެކު މިހާރު ބޭނުން ކުރަމުންދާ 100 ރުފިޔާގެ ނޫޓު ވެސް ދައުރުކުރަމުންދާނެ ކަމަށެވެ.