ފަޒީސް ހިޖާމާ ކްލިނިކަށް ހެލްތުން ހުއްދަ ދީފި
ހެލްތު މިނިސްޓްރީން ފަޒީލާ އުސްމާންގެ "ފަޒީސް ހިޖާމާ ކްލިނިކް" ރަޖިސްޓްރީކޮށްދީފި އެވެ.
ކުރިން ހުއްދަ ނެތި ހިންގަމުން ދަނިކޮށް، ހެލްތު މިނިސްޓްރީން އަންގައިގެން ބަންދުކުރި "ފަޒީސް ހިޖާމާ ތެރަޕީ" އަލުން ހުޅުވުމަށް އެތަނުގެ ވެރިޔާ ދަނީ މަސައްކަތް ކުރަމުންނެވެ.
ފޭސްބުކްގައި މިކަމުގެ އަދާހަމަ ހާމަކުރަމުން ފަޒީލާ ވިދާޅުވި ގޮތުގައި ކްލިނިކް ރަޖިސްޓްރީ ކުރެވުނު ނަމަވެސް، ހިދުމަތް ފެށުމަށް ބޭނުންވާ ލައިސަންސް އަދި ނުލިބޭތީ ހިޖާމާގެ ހިދުމަތް އަދި ނުފަށާ ކަމަށެވެ. އޭނާ ވިދާޅުވީ ލައިސަންސް ހޯދުމަށް މަސައްކަތް ކުރަމުންދާ ކަމަށެވެ.
ކުރިން ފަޒީލާއަށް އަމާޒުވެފައިވާ ފާޑުކިޔުންތަކުގެ ތެރޭގައި އެކަށީގެންވާ ތަމްރީނެއް ނެތި ހިދުމަތް ދެމުންދިއުން ހިމެނެ އެވެ. އެހެންނަމަވެސް، ފަޒީލާ ވިދާޅުވެފައިވަނީ ބައިނަލްއަގުވާމީ ފެންވަރުގެ ތަމްރީނުތަކެއް ފުރިހަމަކޮށްފައިވާ ކަމަށެވެ.
ފަޒީލާގެ ހިޖާމާ ކްލިނިކް ހުއްޓުވާ، އެކަން ކުރަން ހުއްދަ ނުދޭތީ އެ މައްސަލައިގައި ފަޒީލާ ވަނީ ޝަރުއީ ކޯޓަށް ވެސް މައްސަލަ ހުށަހަޅާފަ އެވެ.
