ޖުލައި-ޑިސެމްބަރު ގެ ނިޔަލަށް ޕާކިސްތާނަށް 385 ބިލިއަން ރުޕީސްގެ ގެއްލުން
2024 ވަނަ އަހަރުގެ ޖުލައި މަހުން ފެށިގެން ޑިސެމްބަރު މަހުގެ ނިޔަލަށް ޕާކިސްތާނަށް ލިބުނު އާމްދަނީ 385 ބިލިއަން ރުޕީސް ދަށްވެފައިވާ ކަމަށް އޭއާރުވައި ނިއުސް އިން ބުނެފި އެވެ.
އޭއާރުވައި ނިއުސް އިން ބުނި ގޮތުގައި ޕާކިސްތާނުން މި ފަރަގު ނައްތާލުމަށް މިނީ ބަޖެޓެއް ތަންފީޒު ކުރަން އިންޓަނޭޝަނަލް މަނިޓަރީ ފަންޑް (އައިއެމްއެފް) އިން ލަފާ ދިން ނަމަވެސް ޕާކިސްތާނުގެ ބޮޑުވަޒީރު ޝަހްބާޒް ޝަރީފް ވަނީ އެ ހުށަހެޅުން ދޮގުކުރައްވައިފަ އެވެ.
އޭގެ ބަދަލުގައި އޭނާ ވަނީ ޕާކިސްތާނުގެ ފެޑެރަލް ބޯޑް އޮފް ރެވެނިއު (އެފްބީއާރު) އަށް އެ އުނިކަން ފޫބެއްދުމަށް އިތުރު ފިޔަވަޅުތަކެއް އެޅުމަށް އަންގަވައިފަ އެވެ.
މިކަމާ ގުޅިގެން އެފްބީއާރުއިން ވަނީ އާންމުންގެ އަތުން އާ ޓެކްސްތަކެއް ނުނަގައި އާމްދަނީ އިތުރުކުރުމަށް ފުޅާ ދާއިރާއެއްގައި ޕްލޭނެއް ހުށަހަޅައި، ޓެކުހާއި ޑިއުޓީގެ އާމްދަނީ އިތުރުކުރުމަށް ބަނދަރުތަކުގައި ތާށިވެފައި ހުރި ކޮންޓެއިނަރުތަކާއި ޝިޕްމަންޓްތައް ކްލިއަރެންސް ކުރުމަށް އިސްކަން ދިނުމާއި، އަތުލައިގަތް މުދާ އަވަހަށް ބީލަމަށް ލުން ހިމެނޭ ކަމަށް ބައެއް ފަރާތްތަކާ ހަވާލާދީ އޭއާރުވައި ނިއުސް އިން ބުންޏެވެ.
މީގެ އިތުރުން ޓެކުހަށް މަކަރު ހެދުން ހުއްޓުވުމަށް ކުރެވޭ މަސައްކަތްތައް ހަރުދަނާކުރުމާއި، ޓެކްސް ނުނަގާ ދާއިރާތަކުން ޓެކްސް ނެގުން އިތުރުކުރުމަށް ވެސް މި ޕްލޭންގައި އަލިއަޅުވާލާފައިވެއެވެ. އަދި ކޯޓުތަކުގައި ނުނިމި ހުރި ޓެކްސްއާ ގުޅުންހުރި މައްސަލަތައް އަވަސްކުރާނެ ކަމަށް އޭއާރުވައި ނިއުސް އިން ބުންޏެވެ.
އެފްބީއާރުގެ އަމާޒަކީ އައިއެމްއެފްގެ ވަފުދު ޕާކިސްތާނަށް ކުރާ ދަތުރުގެ ކުރިން މި ފިޔަވަޅުތައް ތަންފީޒުކުރުން ކަމަށާއި ޖެނުއަރީ މަހު ޓެކްސް ނެގުމުގައި 960 ބިލިއަން ރުޕީސްގެ ޗެލެންޖިން ޓާގެޓެއް ކަނޑައަޅާފައިވާ ކަމަށް އޭއާރުވައި ނިއުސް އިން މައުލޫމާތު ދެއެވެ.
އާމްދަނީ ގެއްލޭ މިންވަރު ކުޑަކުރުމުގެ ގޮތުން އޮލްޓަނޭޓިވް ޕްލޭން މާޗް މަހުގެ ތެރޭގައި މުޅިން ތައާރަފް ކުރެވޭނެ ކަމަށް ބެލެވެ އެވެ.
