ތައިލެންޑުގައި ބަންދުކޮށްފައިވާ އުއިގަރުންނާމެދު ކަންބޮޑުވުން ފާޅުކޮށްފި
ތައިލެންޑުގައި ބަންދުކޮށްފައިވާ އުއިގަރު މުސްލިމުން ޗައިނާއަށް ފޮނުވާލުމުގެ ނުރައްކާ އޮތްކަމަށް ބުނެ ޖަޕާނުގައި ތިބި އެކްޓިވިސްޓުން ކަންބޮޑުވުން ފާޅުކޮށްފިއެވެ.
ޖަޕާނުގެ ވެރިރަށް ޓޯކިޔޯގައި ހުންނަ ތައިލެންޑު އެމްބަސީ ކުރިމަތީގައި މިދިޔަ ހޯމަ ދުވަހު ބޭއްވުނު މުޒާހަރާއެއްގައި، އުއިގަރު މުސްލިމުންނަށް އަވަސް ރައްކާތެރިކަމެއް ހޯދައިދިނުމަށް ގޮވާލާފައިވެ އެވެ.
މި މުޒާހަރާގައި ބައިވެރިވި ފަރާތްތަކުން ބުނެފައިވަނީ، ތައިލެންޑުގައި ބަންދުކޮށްފައިވާ އުއިގަރުން ޗައިނާއަށް ފޮނުވާލައިފިނަމަ، އެމީހުންނަށް އަނިޔާވެރި އަދަބުތަކާ ކުރިމަތިލާން ޖެހިދާނެ ކަމަށެވެ.
މުޒާހަރާގައި ބައިވެރިވި އެކްޓިވިސްޓުންގެ ތެރެއިން އެކަކު ކަމަށްވާ ހިދާޔަތުﷲ އޮގުޒާ ވިދާޅުވީ ތައިލެންޑުގައި ބަންދުކޮށްފައިވާ އުއިގަރުންނަށް ރައްކާތެރިކަން ހޯދައިދިނުމަށް ބައިނަލްއަޤްވާމީ މުޖުތަމަޢުން އަވަސް ފިޔަވަޅުތަކެއް އަޅަންޖެހޭ ކަމަށެވެ. އަދި މި މައްސަލައަކީ އިންސާނީ ޙައްޤުތަކުގެ މައްސަލައެއްކަމަށް ވިދާޅުވެފައިވެއެވެ.
ތައިލެންޑު ސަރުކާރުން މިހާތަނަށް މިކަމާ ގުޅޭގޮތުން އެއްވެސް ބަޔާނެއް ނެރެފައެއް ނުވެއެވެ. ނަމަވެސް އދ. ގެ ރެފިއުޖީ އެޖެންސީ (ޔޫއެންއެޗްސީއާރު) އިން ވަނީ ތައިލެންޑުގައި ބަންދުކޮށްފައިވާ އުއިގަރުންނަށް ރައްކާތެރިކަން ފޯރުކޮށްދިނުމަށް ގޮވާލާފައެވެ.
މި މައްސަލައަކީ ބައިނަލްއަގްވާމީ ސަމާލުކަން ލިބެމުންދާ މައްސަލައަކަށްވެފައި، އިންސާނީ ޙައްޤުތަކަށް މަސައްކަތްކުރާ ޖަމްޢިއްޔާތަކުން ވަނީ ތައިލެންޑު ސަރުކާރަށް ގޮވާލާފައި، އުއިގަރުންނަށް ރައްކާތެރިކަން ފޯރުކޮށްދީ، އެމީހުންގެ ޙައްޤުތައް ރައްކާތެރިކުރުމަށެވެ.
