އިންޑިއާގެ ވައިގެ ދަތުރުފަތުރައް އިތުރު ކުރިއެރުމެއް

އިންޑިއާގެ ވައިގެ ދަތުރުފަތުރުގެ ސިނާއަތް މިހާރު ވަނީ ހަމައެކަނި ކުރިއެރުމުގެ ފުރުސަތު ދައްކުވައިދިނުމުގެ މަރުހަލާއިން އެތައް ގަދަމަކަށް ކުރިއަރައިގެން ގޮސްފަ އެވެ.

ގަލްފް ނިއުސްއިން ޝާއިއުކުރި ރިޕޯޓެއްގައި ބުނީ އިންޑިއާގެ ވައިގެ ދަތުރުފަތުރުގެ ސިނާއަތަކީ މިހާރު ދުނިޔޭގެ އެންމެ ބާރު ސްޕީޑެއްގައި ކުރިއަރަމުންދާ އެއް އެއާލައިން މާކެޓްތަކުގެ ތެރެއިން އެއް މާކެޓް ކަމަށެވެ.

އިންޑިއާގެ އެތެރޭގެ ވައިގެ ދަތުރުފަތުރުގެ ސިނާއަތް ވަނީ ކޮވިޑް-19 ގެ ކުރިން ހުރި ހިސާބަށްވުރެ 7 އިންސައްތަ އިތުރުވެފަ އެވެ.

އިންޑިއާގެ މަދަނީ ވައިގެ ދަތުރުފަތުރާބެހޭ މިނިސްޓަރު ޖިއޯތިރަދިތްޔަ ސިންދިއާ ވިދާޅުވީ އިންޑިއާގެ އެއާލައިންތަކުން މިހާރު ކޮންމެ ދުވަހަކު 4,500 އަށްވުރެ ގިނަ ފްލައިޓް އޮޕަރޭޓްކުރަމުންދާ ކަމަށެވެ. އަދި މި އަދަދު އަންނަނީ އިތުރުވަމުން ކަމަށްވެސް އޭނާ ވިދާޅުވި އެވެ.

އިންޑިއާގެ ވައިގެ ދަތުރުފަތުރުގެ ސިނާއަތުގެ މި ކުރިއެރުމާއެކު، އެ ގައުމުގެ އެއާޕޯޓްތަކުގެ ހިދުމަތްތައްވެސް ވަނީ ފުޅާވެފަ އެވެ.

މިގޮތުން އިންޑިއާގެ އެއާޕޯޓްތަކުގެ އަދަދު 74 އިން 148 އަށް އިތުރުވެފައިވާއިރު، އިތުރު 80 އެއާޕޯޓެއް އެޅުމުގެ މަސައްކަތް ކުރިއަށްދާ ކަމަށް ރިޕޯޓުގައި ބަޔާންކޮށްފައިވެ އެވެ.

މި ކުރިއެރުމާއެކު، އިންޑިއާގެ ވައިގެ ދަތުރުފަތުރުގެ ސިނާއަތަށް ބޭރުގެ އިންވެސްޓަރުންގެ ޝައުގުވެރިކަންވެސް އިތުރުވެފައިވާކަން ފާހަގަކުރެވެ އެވެ. މިކަމުގެ ސަބަބުން، އިންޑިއާގެ އިގްތިސާދަށް ވަރަށް ބޮޑު ކުރިއެރުމެއް ލިބޭނެ ކަމަށް ބެލެވެ އެވެ.