ޗައިނާގައި ނޭވާލުމުގެ ނިޒާމާ ގުޅުންހުރި ބަލިތައް އިތުރު
ޗައިނާގައި ނޭވާލުމުގެ ނިޒާމާ ގުޅުންހުރި ބަލިތައް އިތުރުވަމުންދާކަމަށް ޔޫރަޕިއަން ސެންޓާ ފޯ ޑިޒީޒް ޕްރިވެންޝަން އެންޑް ކޮންޓްރޯލް (އީސީޑީސީ) އިން ރިޕޯޓުކޮށްފި އެވެ.
މި ރިޕޯޓުގައި ބުނީ މި ބަލިތައް ފެތުރެމުންދަނީ ހާއްސަކޮށް ކުޑަކުދިންގެ މެދުގައި ކަމަށެވެ.
އީސީޑީސީގެ ވެބްސައިޓުގައި ޝާއިއުކޮށްފައިވާ މައުލޫމާތުގައި ބުނީ މި ބަލިތަކުގެ ތެރޭގައި ނިއުމޯނިއާ އަދި އެހެނިހެން ނޭވާލުމުގެ ނިޒާމާ ގުޅުންހުރި އިންފެކްޝަންތައް ހިމެނޭ ކަމަށެވެ. އަދި މި ބަލިތައް އިތުރުވަމުންދާކަމަށް ފުރަތަމަ ފާހަގަކުރެވުނީ ޗައިނާގެ އުތުރު ސަރަހައްދުގައި ކަމަށްވެސް ވެބްސައިޓުގައިވެ އެވެ.
ނަމަވެސް މިހާރު ގައުމުގެ އެހެން ސަރަހައްދުތަކަށްވެސް ފެތުރެމުންދާކަމަށް ބެލެވެ އެވެ.
ޗައިނާގެ ސިއްހީ އިދާރާތަކުން މި ކަމާ ގުޅޭގޮތުން ފިޔަވަޅުތަކެއް އަޅަމުންދާކަމަށް އީސީޑީސީގެ ރިޕޯޓުގައި ފާހަގަކޮށްފައިވެ އެވެ. މީގެ ތެރޭގައި ބަލި ފެތުރޭ މިންވަރު ދެނެގަތުމަށް ކުރެވޭ މަސައްކަތްތަކާއި، ބަލިން ރައްކާތެރިވުމަށް އާންމުންނަށް ދެވޭ އިރުޝާދުތައް ހިމެނޭކަމަށްވެސް އީސީޑީސީ އިންވެސް ބުންޏެވެ.
ނޭވާލުމުގެ ނިޒާމާ ގުޅުންހުރި ބަލިތަކުން ރައްކާތެރިވުމަށްޓަކައި އަތްދޮވުމާއި، ކެއްސާއިރު އަނގަޔާއި ނޭފަތް ނިވާކުރުން ފަދަ ރައްކާތެރިކަމުގެ ފިޔަވަޅުތައް އެޅުމަށް ސިއްހީ އިދާރާތްތަކުން އާންމު ރައްޔިތުންނަށް އިލްތިމާސްކުރެ އެވެ.
