ޕެނަމާ ކެނަލް މެދުވެރިކޮށް އެމެރިކާއަށް ޗެކްމޭޓް ކުރަން ޗައިނާ މަސައްކަތްކުރަނީ

ޕެނަމާ ކެނަލްގެ ބާރު ހޯދުމަށް ޗައިނާއިން ކުރަމުންދާ މަސައްކަތްތަކާ ގުޅިގެން އެމެރިކާ އާއި ޗައިނާއާ ދެމެދު ހަލަބޮލިކަން އިތުރުވަމުންދާކަމަށް ބައިނަލްއަގްވާމީ ސިޔާސީ މާހިރުން ފާހަގަކުރަމުންދެ އެވެ.

މި ކެނަލަކީ އެމެރިކާގެ އިގްތިސޯދަށް ވަރަށް މުހިންމު ދައުރެއް އަދާކުރާ ތަނެއްކަމަށްވެފައި، ޗައިނާއިން މިތަނުގެ ބާރު ހޯދުމަށް މަސައްކަތްކުރަމުންދާކަމީ އެމެރިކާއަށް ކަންބޮޑުވުން އުފެދޭ ކަމެކެވެ.

ޕެނަމާ ކެނަލްގެ ވަށައިގެންވާ ސަރަހައްދުތަކުގައި ޗައިނާއިން އިންވެސްޓް ކުރަމުންދާކަމަށް ރިޕޯޓުތަކުން ދައްކަ އެވެ. މީގެ ތެރޭގައި ބަނދަރުތަކާއި، ވިޔަފާރި މަރުކަޒުތައް އަދި އެހެނިހެން އިންފްރާސްޓްރަކްޗާ ތަރައްގީކުރުން ހިމެނެ އެވެ.

މި ހަރަކާތްތަކުގެ ސަބަބުން ޕެނަމާ ކެނަލްގެ މައްޗަށް ޗައިނާގެ ނުފޫޒު އިތުރުވެ، އެމެރިކާގެ ބާރު ކުޑަވެގެންދާނެކަމަށް ބެލެވެ އެވެ.

އެމެރިކާގެ ސަރުކާރުން މިކަމާ ގުޅޭގޮތުން ކަންބޮޑުވުން ފާޅުކޮށް، ޕެނަމާގެ ސަރުކާރަށް އިންޒާރުދީފައިވާކަމަށް ބުނެ އެވެ.

އެމެރިކާގެ ސްޓޭޓް ޑިޕާޓްމަންޓްގެ ބަޔާނެއްގައި ބުނީ ޕެނަމާ ކެނަލްގެ މިނިވަންކަމާއި ތަރައްގީ ދެމެހެއްޓުމަކީ އެމެރިކާގެ ގައުމީ މަސްލަހަތު ހިމާޔަތްކުރުމަށް މުހިންމު ކަމެއް ކަމުގަ އެވެ.

ނަމަވެސް، ޗައިނާގެ ފޮރިން މިނިސްޓްރީން ބުނެފައިވަނީ އެ ގައުމުގެ ހަރަކާތްތަކަކީ ހަމައެކަނި އިގްތިސޯދީ ތަރައްގީއަށް އަމާޒުކޮށްގެން ކުރާ ކަންތައްތަކެއް ކަމަށެވެ. އަދި ޕެނަމާގެ ސިޔާދަތަށް އިހްތިރާމްކުރާ ކަމަށާއި، އެހެން ގައުމުތަކުގެ އިންޓަރެސްޓްތަކަށް ގެއްލުމެއް ދިނުމުގެ ނިޔަތެއް ނެތްކަމަށް ވެސް ބުނެފައިވެ އެވެ.

މި މައްސަލައާ ގުޅިގެން ޕެނަމާގެ ރައީސް ލޯރެންޓީނޯ ކޯޓީޒޯ ވިދާޅުވީ އެ ގައުމުގެ ސިޔާދަތު ހިމާޔަތްކުރުމަށް އަޅަންޖެހޭ ހުރިހާ ފިޔަވަޅެއް އަޅާނެ ކަމަށެވެ. އަދި ބޭރުގެ އެއްވެސް ފަރާތަކަށް ޕެނަމާ ކެނަލްގެ މައްޗަށް ނުފޫޒު ފޯރުވުމުގެ ފުރުސަތު ނުދޭނެކަމަށް ވެސް ވިދާޅުވި އެވެ.

މި ހާދިސާއަކީ ދުނިޔޭގެ ދެ ބޮޑު ބާރުވެރި ގައުމު ކަމުގައިވާ އެމެރިކާއާއި ޗައިނާގެ ދެމެދުގައި އޮތް ވާދަވެރިކަން އިތުރަށް ހަލަބޮލިވެގެންދާނެ ކަމެއްކަމަށް ބެލެވެ އެވެ.