މަތީ ގްރޭޑްތަކުގެ ކިޔެވުން އަންނަ މަހު ފަށަން ނިންމައިފި
ކޮވިޑް19އާ ގުޅިގެން މާލެ ސަރަހައްދު ސުކޫލުތަކުގެ ކިޔެވުން މެދުކަނޑާލާފައި އޮތުމަށް ފަހު ، މަތީ ގްރޭޑްތަކުގެ ކިޔެވުން އަންނަ މަހުގެ ހަތަރު ވަނަ ދުވަހު ފަށަން އެޑިޔުކޭޝަން މިނިސްޓްރީން ނިންމައިފިއެވެ.
މިނިންމުން ހާމަ ކުރަމުން އެ މިނިސްޓްރީން ބުނިގޮތުގައި އަންނަ މަހު ކިޔެވުން ފެށުމަށް ނިންމާފައި ވަނީ ގްރޭޑް 9 އިން ގްރޭޑް 12 ގެ ދަރިވަރުންނަށެވެ.
ކޮވިޑާ ގުޅިގެން މާލެ ސަރަހައްދުގެ ސުކޫލުތައް ތިން މަހެއްހާ ދުވަހު ބަންދު ކުރިއެވެ. އޭގެ ފަހުން ޖޫން މަހު ވެސް ސުކޫލުތައް ހުޅުވީ މަތީ ގްރޭޑްތަކުގެ ދަރިވަރުންނަށެވެ. ނަމަވެސް އެޗްޕީއޭއިން ދިން ލުއިތަކާއެކު ކޮވިޑް ފެތުރޭ މިންވަރު އިތުރުވާން ފެށުމުން އަނެއްކާ ވެސް ސުކޫލުތައް ބަންދު ކުރީއެވެ.
ކޮވިޑް19 އާ ގުޅިގެން ދަރިވަރުންގެ ކިޔެވުމަށް މިއައި ބޮޑު ބަދަލާއެކު އެކަޑަމިކް ކަލަންޑަރަށް ވެސް އެޑިޔުކޭޝަން މިނިސްޓްރީން ވަނީ ބަދަލު ގެނެސްފައެވެ. އެގޮތުން އަހަރުން އަހަރަށް ނިމެމުން ދިޔަ ތައުލީމީ އަހަރު މިހާރު ވަނީ އެއް އަހަރުގެ ޖޫން އިން އަނެއް އަހަރުގެ އޮގަސްޓަށް ބަދަލު ކޮށްފައެވެ. މިއަހަރުގެ ދެވަނަ ޓާމް އަންނަ އަހަރުގެ ޖެނުއަރީ 10 ގައި ފަށާއިރު ތައުލީމީ އަހަރު ނިމޭނީ ޖޫން 24 ގައެވެ.
