ނައިރޯބީ މަރުވުމުން ދެރަވޭ! ކޯވިޑް ބަލީގައި އެތައް ހާސް މީހުން ކޮންމެ ދުވަހަކު މަރުވޭ!
މިހާރު ދުނިޔޭގެ އެކި ހިސާބުތަކުގައި ހަލުވިކަމާއިއެކު ފެތުރެމުން އަންނަ ކޯވިޑް 19 ވައިރަހުގެ ސަބަބުން މުޅި ދުނިޔެ މިވަނީ ބިރުވެރިކަމެއްގެ ތެރޭގައެވެ. އެކި ގައުމުތަކުން މި ބަލި ޖެހުނު މީހުންގެ އަދަދު 1448564 އަށް ވުރެ މަތިވެފައިވާއިރު، މި ނުރައްކާތެރި ބަލީގައި މަރުވި މީހުންގެ އަދަދު ވަނީ 83416 އަށްވުރެ މަތިވެފައެވެ. ދުނިޔޭގެ ސިއްހަތު ޖަމިއްޔާއިން މިވަނީ ކޯވިޑް 19 އަކީ ދުނިޔެއަށް ބަލި މަޑުކަމެއްގެ ގޮތުގައި ކަނޑައަޅާފައެވެ.
ދުނިޔޭގެ އެކި ހިސާބުތަކުން މި ބަލީގައި މަރުވި 80 ހާހަށްވުރެ ގިނަ މީހުންގެ އާއިލާތަކުން ދަނީ ކޯވިޑް 19 ޖެހިގެން މަރުވި ގާތް ލޯބިވާ ފަރާތްތައް މަތިން ހަނދާން ކޮށް ކަރުނަ އަޅަމުންނެވެ. މުޅި ދުނިޔެ ކޯވިޑް 19 ގެ ބިރުވެރިކަމުގައި އޮތްއިރު، ބައެއް ދިވެހިންގެ ހިތްތައް ފަަޅައިގެންދިޔައީ ނެޓްފްލިކްސް އޮރިޖިނަލް އެއްކަމަށްވާ މަނީ ހެއިސްޓް ސީރީޒްގައި ފެނިގެންދާ ހިތްހެޔޮ އަދި މަޖާ ކެރެކްޓަރއެއް ކަަމަަށްވާ ނައިރޯބީ މަރުވުމުންނެވެ.
މިމަހުގެ 3 ވަނަ ދުވަހު މަނީ ހެއިސްޓްގެ 4 ވަނަ ސީޒަން ނެޓްފްލިކްސްގައި ރިލީޒް ކުރުމާއި ގުޅިގެން މުޅި ފޭސްބުކް ނިއުސްފީޑް ފުރިގެން ދިޔައީ އެ ޑްރާމާގެ ވާހަކަތަކުންނެވެ. މަނީ ހެއިސްޓްގެ 3 ވަނަ ސީޒަން ، ނައިރޯބީ ގަޔަށް ވަޒަން އަރާ ހިސާބުން ނިންމާލުމުން ނައިރޯބީއަށް ދެން ވާގޮތެއް ބެލުމަށް އެތައް ބަޔަކު ތިބީ ކެތްމަދުވެފައެވެ. 4 ވަނަ ސީޒަން ފުރަތަމަ ފެށިގެންދިޔައީ ނައިރޯބީ ގަޔަށް އެރި ވަޒަން ނެގި ހިސާބުންނެވެ. އެހެން ނަމަވެސް 4 ވަނަ ސީޒަން ނިމުނީ ނައިރޯބީ މަރުވާ ހިސާބުންނެވެ.
ސީރީޒްގައި ނައިރޯބީ މަރުވި ހިސާބުން ފޭސްބުކްގެ ފީޑްތައް ފުރާލީ އެކަމާއި މީހުން ހިތާމަ ފާޅުކުރި މެސެޖްތަކުންނެވެ. އެންމެ ދެރަވެގެން ސްޓޭޓަސް ޖެހި ގޮތުން ހީވީ ބަނޑުއަޅައި ވިހޭ ދަރި މަރުވިހެންނެވެ. ނައިރޯބީ މަރުވުމުން އެކަމާ ދެރަވެގެން އެއް ބައި މީހުންނަށް ނުވެސް ނިދެއެވެ. މަނީ ހެއިސްޓް ނުބަލާ މީހުން ވެސް، އެ ބެލި މީހުން ހިތާމަ ކުރި ވަރުން ދެރަވާނެއެވެ. ވާނީވެސް އެހެންތާއެވެ. މުޅި ފޭސްބުކް ފުރާލީ ނައިރޯބީ މަރުވުމުގެ ހިތާމައިންނެވެ.
އަޅުގަނޑުގެ އުފެދެނީ ހަމަ އެންމެ ސުވާލެކެވެ. ސީރީޒްއެއްގެ ހިޔާލީ ކެރެކްޓަރ އެއް މަރުވުމުން ތިވަރަށް ހިތުގައި ޖެހުނުއިރު، ކޯވިޑް 19 ޖެހިގެން ދުނިޔޭގެ އެކި ހިސާބުތަކުން އެތައް ސަތޭކަ މީހުން ކޮންމެ ދުވަހަކު މަރުވާއިރު ދެރަނުވޭ ހެއްޔެވެ؟ ކޯވިޑް 19 ޖެހިގެން ބައި ލައްކައަށް ވުރެ ގިނަ މީހުން މަރުވުމުން އެކަމުގެ ހިތާމައިގައި މީސްމީޑިއާ ފުރާނުލީ ކީއްވެބާއެވެ؟ ފަހަރުގައި މި ނުރައްކާތެރި ބަލިމަޑުކަމުގެ ބިރުވެރިކަން ދިވެހިންނަށް ނުވިސްނެނީއެވެ.
