ޚަބަރު

ސަރުކާރުން ބޭނުންވަނީ ޖަރީމާތަކުގެ އަޑު ކަނޑުވާލަން: ޔާމީން

ޢާއިޝަތު އަރީނާ ، ދެން އޮންލައިން
ކުރީގެ ރައީސް ޔާމީން ނޫސްވެރިންގެ ސުވާލުތަކަށް ޖަވާބު ދެއްވަނީ / ފޮޓޯ:ދެން އިމޭޖްސް

ސަރުކާރުން ބޭނުންވަނީ ޖަރީމާތަކުގެ ވާހަކަ މީހުން ދައްކާތީ އަޑުކަނޑުވާލަން ކަމަށް ކުރީގެ ރައީސް އަބްދުﷲ ޔާމީން ވިދާޅުވެއްޖެ އެވެ.

Ads by STELCO

ރައްޔިތުންގެ މަޖިލީހަށް ހުށަހަޅާފައިވާ މީޑިއާ ބިލާއި ގުޅޭގޮތުން ޕީއެންއެފުން ރޭ ބޭއްވި ޖަލްސާގައި ވާހަކަދައްކަމުން ޔާމީން ވިދާޅުވީ މީޑިއާ އާއި ނޫސްވެރިކަމުގައި މައްސަލައެއް އުޅޭނަމަ، އެ އުޅޭ މައްސަލައެއް ސަރުކާރުން ބުނެދޭންޖެހޭނެ ކަމަށާއި މި ބިލު ހުށަހެޅި މެމްބަރަށް ވެސް، ބިލު ހުށަހަޅަން ޖެހުނު ސަބަބެއް ނޭނގޭ ކަމަށެވެ.

މިހާރު މަޖިލީހަށް ހުށަހަޅާފައިވާ ބިލަކީ ރައީސް ޑރ. މުހައްމަދު ވިދާޅުވެގެން ބަންޑާރަ ނައިބު ތައްޔާރުކުރި ބިލެއް ކަމަށާއި އެގޮތުން މި ބިލު ދިފާއުކުރަން މީޑިއާތަކުގެ ކުރިމައްޗަށް އެރީ ވެސް ބަންޑާރަ ނައިބު ކަމަށް ޔާމީން ވިދާޅުވި އެވެ. އަދި ކުއްލިއަކަށް މީޑިއާތަކާ ގުޅޭ މިފަދަ ބިލެއް ހުށަހަޅަން ޖެހުނީ ކޮން ކަންބޮޑުވުމެއް ހުރެގެން އަދި ކޮން ކަމެއް ގޯސްކޮށް ހިނގާތީކަން ބުނެދޭންޖެހޭ ކަމަށްވެސް ޔާމީން ވިދާޅުވި އެވެ.

"އަޅުގަނޑުގެ ވިސްނުމުގައި މި ޖެހިގެން އުޅޭހާ ވެސް މައްސަލައަކީ، މި ސަރުކާރު ދިފާއެއް ނެތް ގޮތުގައި މިކުރާ ވިޔާނުދާ ކަންތައްތައް، ހިންގާ ބޮޑެތި ޖަރީމާތަކުގެ ވާހަކަ މީހުން ދައްކާތީ އަޑުކަނޑުވާލަން އެބަޖެހޭ. އެހެންވީމަ ހަމައެކަނި ޕްރިންޓު މީޑިއާއެއް ނޫން، ޓީވީ އެކަންޏެއް ނޫން ސޯޝަލް މީޑިއާ ހުރިހާ އެއްޗެއް. މިއީ ހުދުމުހުތާރު ސިފަ،" ޔާމީން ވިދާޅުވި އެވެ.

ރައްޔިތުންގެ ކަންކަމާ ހަވާލުވެގެން ތިބި ފަރާތްތަކުން ގޯސް ހަދާނަމަ އެ ވާހަކަ ދައްކާނެ ކަމަށާއި ސަރުކާރުން މިހާރު މިގޮތަށް އުޅެން ޖެހިފައިވަނީ ފަސްއަޅައި ފޮރުވަންޖެހޭ ކަންކަން ގިނަވުމުން ކަމަށްވެސް ޔާމީން ވިދާޅުވި އެވެ.

Ads by Ooredoo