މިދިޔަ މަހު ރާއްޖެއިން މުދާ އެކްސްޕޯޓްކުރި މިންވަރު %222 އިތުރުވެއްޖެ
މިދިޔަ މަހު ރާއްޖެއިން މުދާ އެކްސްޕޯޓްކުރި މިންވަރު 222 އިންސައްތަ އިތުރުވެއްޖެއެވެ.
މޯލްޑިވްސް ކަސްޓަމްސް ސަރވިސްގެ ތަފާސްހިސާބުތައް ދައްކާގޮތުން މިދިޔަ އަހަރުގެ ޖުލައިމަހު ރާއްޖެއިން 65 މިލިޔަން ރުފިޔާގެ މުދާ އެކްސްޕޯޓުކޮށްފައިވާއިރު، މި އަހަރުގެ ޖުލައި މަހު މި ޢަދަދުވަނީ 210 މިލިޔަން ރުފިޔާ އަށް އިތުރުވެފައެވެ.
ތަފާސްހިސާބުތައް ދައްކާގޮތުން މިއަހަރުގެ ފުރަތަމަ 7 މަސްދުވަހުގެ ތެރޭގައި ރާއްޖެއިން އެކްސްޕޯޓް ކުރެވުނު މުދާ ފާއިތުވި އަހަރުގެ ފުރަތަމަ 7 މަސްދުވަހާ އަޅާބަލާއިރު ވަނީ 52 އިންސައްތަ އިތުރުވެފައެވެ. އެގޮތުން 2024 ވަނަ އަހަރުގެ ފުރަތަމަ 7 މަސްދުވަހު ދިވެހިރާއްޖެއިން 945 މިލިޔަން ރުފިޔާގެ މުދާ އެކްސްޕޯޓް ކޮށްފައިވާއިރު، މި އަހަރުގެ ފުރަތަމަ 7 މަސްދުވަހު މި ޢަދަދުވަނީ 1.4 ބިލިޔަން ރުފިޔާ އަށް އިތުރުވެފައެވެ.
ދިވެހިރާއްޖޭގެ އެކްސްޕޯޓް މައިގަނޑު ގޮތެއްގައި ބިނާވެފައިވަނީ މަހުގެ ބާވަތްތަކުގެ މައްޗަށްކަމަށްވާއިރު، ވޭތުވެދިޔަ 7 މަސްދުވަހުގެެތެރޭގައިވެސް ރާއްޖެއިން އެންމެ ގިނައިން އެކްސްޕޯޓްކޮށްފައިވަނީ ގަނޑުކުރި އަދި ފިނިކުރި ކަނޑުމަހާއި، މަހުން އުފައްދާފައިވާ ތަފާތު ބާވަތްތައްކަން ފާހަގަކޮށްލެވެއެވެ. އަދި މިތަކެތި އެންމެ ގިނައިން އެކްސްޕޯޓްކޮށްފައިވާ ޤައުމުތަކަކީ ތައިލެންޑް (809.44 މިލިޔަން ރުފިޔާ) އަދި އިނގިރޭސިވިލާތް (252.46 މިލިޔަން ރުފިޔާ) އެވެ.
ކަސްޓަމްސްގެ ތަފާސްހިސާބުތައް ދައްކާގޮތުން ޖުލައިމަހު ރާއްޖެއަށް ވަނީ 4.5 ބިލިޔަން ރުފިޔާގެ މުދާ އެތެރެކޮށްފައެވެ.
ރާއްޖެއަށް އެންމެ ގިނައިން މުދާ އެތެެރެކޮށްފައިވާ ޤައުމުތައް:
ޗައިނާ: 712 މިލިޔަން ރުފިޔާގެ މުދާ
އިންޑިއާ: 704 މިލިޔަން ރުފިޔާގެ މުދާ
ޔޫއޭއީ: 622 މިލިޔަން ރުފިޔާގެ މުދާ
އޮމާން: 513 މިލިޔަން ރުފިޔާގެ މުދާ
ސިންގަޕޫރު: 432 މިލިޔަން ރުފިޔާގެ މުދާ
އިމްޕޯޓް އެކްސްޕޯޓުން ދައުލަތަށް ލިބުނު އާމްދަނީއަށް ބަލާއިރު ޖުލައިމަހު އާމްދަނީ ހުރީ 295 މިލިޔަން ރުފިޔާގައެވެ. މިދިޔަ އަހަރުގެ ޖުލައި މަހު އިމްޕޯޓު އެކްސްޕޯޓުން ދަޢުލަތަށް ވަނީ 364 މިލިޔަން ރުފިޔާ ލިބިފައެވެ.
