ލިލީ ފިލްމު ބަލާލުމުގެ އެންމެ ފަހު ފުރުސަތު، އާދީއްތަ ދުވަހުގެ މެންދަމު ޝޯއެއް ބާއްވަނީ
މުޅިން ވެސް ހައުސްފުލް ޝޯތަކެއް ދައްކަމުން އަންނަ ލިލީ ފިލްމުގެ ޑިމާންޑު ބޮޑުވެ، އެންމެ ފަހު ޝޯއެއްގެ ގޮތުން އާދީއްތަ ދުވަހުގެ މެންދަމު ޝޯއެއް ބާއްވަން ނިންމައިފިއެވެ.
މިހާރު އޮލިމްޕަސް ސިނަމާގައި ދައްކަމުންދާ ދިވެހި ފިލްމު "ލިލީ" ގެ މިހާތަނަށް ދެއްކި 11 ޝޯވވެސް ވަނީ ހައުސްފުލްވެފައެވެ.
މިފިލްމު އުފެއްދި ކްރިއޭޓިވް ނެޓްވޯކުން ބުނީ އާދީއްތަ ދުވަހުގެ ރޭގެ ޝޯ ވެސް ފުލްވެ، ދަންވަރުުގެ ޝޯއަށް މިހާރު ހުޅުވާލައިފައިވާ ކަމަށެވެ.
ޓިކެޓު ވިއްކަނީ އޮލިމްޕަސް ޓިކެޓު ކައުންޓަރުގެ އިތުރުން 7505079 ގެ ވައިބަރ މެދުވެރިކޮށެވެ. މީގެ އިތުރުން ފިލްމުގެ ރަސްމީ ވެބްސައިޓު www.book.lilythemovie.com އިންވެސް ޓިކެޓު ގަނެވޭނެ އެވެ.
އަޒްހާން އިބްރާހިމް ލިޔެ ޑައިރެކްޓު ކޮށްފައިވާ ދިވެހި ފިލްމު "ލިލީ" އަކީ މައިވަންތަކަމުގެ ލޯބިން މަހުރޫމުވެ ހެދިބޮޑުވަމުން އައި ކުއްޖެއްގެ ދިރިއުޅުން ބަދަލުވެގެން ދާގޮތް ދައްކައިދޭ އަސަރުގަދަ ފިލްމެކެވެ. މި ފިލްމުގައި ރާއްޖޭގައި ހިނގާ އެކި ކުށްތަކަށް ތަފާތު ނަޒަރަކުން ވަނީ އަލިއަޅުވާލައިފަ އެވެ.
ފިލްމު ބަލާފައި ނިކުންނަ ގިނަ މީހުން ބުނަނީ މިއީ މިއަހަރުގެ އެންމެ ރީތި ފިލްމު ކަމަށެވެ. އަދި ވާހަކައިގެ އަސަރުގަދަ ކަމާއި ގެނަސްދީފައިވާލެއް ހިތްގައިމުކަން ބެލުންތެރިން ފާހަގަކުރި އެވެ.
"ފިލްމު ނިމެންދެން އިންނަން ޖެހުނީ ނޭވާ ހިފަހައްޓާލައިގެން. ހިތް ފަޅައިގެން ހިނގައްޖެ" ބެލުންތެރިޔަކު ބުންޏެވެ.
ފިލްމުގެ މައި ތަރިންގެ ތެރޭގައި ހިމެނެނީ އައިޝާ އަލީ، އަހުމަދު ޝާރިފް، މުހައްމަދު އިޝްފާން، މަރިޔަމް ޝިމާ، އަހުމަދު ނިމާލް، މަރިޔަމް ހަލީމްގެ އިތުރުން އަލީ ފާރޫޤު އެވެ. މީގެ އިތުރުންވެސް ގިނަ އެކްޓަރުން މިފިލްމުން ފެނެ އެވެ. އެގޮތުން ޅ. ހިންނަވަރުގެ ގިނަ ބަޔަކުވެސް މި ފިލްމުގެ އެކި ރޯލުތަކުން ފެނެ އެވެ. ބޮޑު ރޯލަކުން އެލީޝާ ސަނީމް އަދި ހަދީޖާ އަބޫބަކުރު މުޅިން އަލަށް ވަނީ ތައާރަފުވެސް ކޮށްފަ އެވެ.
