ދެ ކިލޯގެ ޑުރަގު އެތެރެކޮށްގެން ހައްޔަރުކުރި މީހުންގެ ތެރޭގައި މެލޭޝިއާގެ އަންހެނަކު ހިމެނޭ
ދެ ކިލޯގެ ޑުރަގު އެތެރެކޮށްގެން ހައްޔަރުކުރި މީހުންގެ ތެރޭގައި މެލޭޝިއާގެ އަންހެނަކު ހިމެނޭކަމަށް ފުލުހުން ބުނެފިއެވެ.
މިދިޔަ ހޮނިހިރު ދުވަހު ފުލުހުން ހިންގި އޮޕަރޭޝަނެއްގައި ތިން މީހަކު އެ މައްސަލައިގައި ހައްޔަރުކުރިއެވެ.
އެ މީހުންގެ ވަނަވަރު ފުލުހުން މިއަދު އާންމުކޮށްފައިވާ އިރު ހައްޔަރުކުރި މެލޭޝިއާގެ އަންހެން މީހާއަކީ ރަންޖިނި ޖީވަނަންތަން، މެލޭޝިއާ، (38އ)އެވެ. އޭނާ ހައްޔަރުކުރީ ވެލާނާ އިންޓަނޭޝަނަލް އެއާޕޯޓުންނެވެ.
އަދި އެ މައްސަލައިގައި ދެން ޝާމިލުވާ ގދ. ވާދޫ / ފުރުސަތު، ލޫތު އިބްރާހީމް (29އ)އާއި ގއ. ދާންދޫ / ސަންލައިޓްވިލާ، އަހުމަދު ރިޝްމާހް (21އ)ހައްޔަރުކުރީ ކޮންޓްރޯލް ޑެލިވަރީ ޖައްސައިގެން މާލޭގެ ގެސްޓު ހައުސްއަކުންނެެވެ.
އެ މީހުންގެ ބަންދާމެދު ގޮތެއް ނިންމުމަށް ކްރިމިނަލް ކޯޓަށް ހާޒިރުކުރުމުން ރަންޖިނި ޖީވަނަންތަންއާއި ލޫޠު އިބްރާހީމް 15ދުވަަހަށް އަދި ރިޝްމާހް ފަސްދުވަހަށް ބަންދުކުރުމަށް ވަނީ އަމުރުކޮށްފައެވެ.
