އިންޑިއާއާއި ދެކުނު ކޮރެއާގެ ގުޅުން އައު ހަރުފަތަކަށް: ވިޔަފާރީގެ އަމާޒަކީ 2030 ގެ ނިޔަލަށް 50 ބިލިއަން ޑޮލަރު
އިންޑިއާއާއި ދެކުނު ކޮރެއާއިން ހަކަތަ، މުހިންމު މަޢުދަންތައް، ސެމީކޮންޑަކްޓަރ، އުޅަނދުފަހަރު ބަނުން އަދި ކުރިއަރާފައިވާ ޓެކްނޮލޮޖީ ފަދަ މުހިންމު ދާއިރާތަކުން އިސްތިރާތީޖީ ގުޅުން ބަދަހިކުރުމަށް އަލުން އިގުރާރުވެއްޖެއެވެ. ދެ ޤައުމުގެ އަމާޒަކީ 2030 ވަނަ އަހަރާ ހަމައަށް ދެޤައުމުގެ ދެމެދުގައި ކުރެވޭ ވިޔަފާރީގެ މިންވަރު 50 ބިލިއަން ޑޮލަރަށް އިތުރުކުރުމެވެ. މީގެ އިތުރުން ދެ ޤައުމުގެ ދެމެދުގައި އޮތް ސަގާފީ ގުޅުންތައް ވަރުގަދަކުރުމަށް ވެސް މި އެއްބަސްވުމުގައި ހިމަނާފައިވެއެވެ.
އިންޑިއާގެ ބޮޑުވަޒީރު ނަރެންދުރަ މޯދީ ވިދާޅުވީ، ދެކުނު ކޮރެއާގެ ރައީސް ލީ ޖޭ މިއުންގް ކުރެއްވި މި ދަތުރުފުޅަކީ ޗިޕް އުފެއްދުމުން ފެށިގެން ބިޔަ އުޅަނދުފަހަރު ބަނުމާ ހަމައަށް، އަދި ހުނަރުވެރިންނާއި ޓެކްނޮލޮޖީގެ އިތުރުން ހަކަތައާއި ތިމާވެށީގެ ދާއިރާއިން "މުސްތަޤުބަލަށް އަމާޒުކުރެވޭ ބައިވެރިވުމަކަށް" އެޅުނު ފިޔަވަޅެއް ކަމަށެވެ. މޯދީ ފާހަގަކުރެއްވި ގޮތުގައި، ދެ ޤައުމުން ގުޅިގެން މަސައްކަތް ކުރާނީ ގުޅިފައިވާ ތަނަވަސްކަމާއި ދިގު މުއްދަތުގެ ތަރައްޤީ ކަށަވަރު ކުރުމަށެވެ.
ޔޫރަޕާއި މެދުއިރުމަތީގައި ހިނގަމުންދާ ހަނގުރާމަތަކާއި ހަމަނުޖެހުންތަކުގެ ތެރެއިން، އިންޑިއާއާއި ދެކުނު ކޮރެއާއިން ގުޅިގެން ދުނިޔެއަށް ދެނީ ސުލްހައާއި ހަމަޖެހުމުގެ މެސެޖެއް ކަމަށް މޯދީ ވިދާޅުވިއެވެ. އަދި އިންޓަރނޭޝަނަލް ސޯލާ އެލަޔަންސް އާއި އިންޑޯ-ޕެސިފިކް އޯޝަންސް އިނިޝިއޭޓިވް ފަދަ އިސްނެގުންތަކުގައި ދެކުނު ކޮރެއާއިން ބައިވެރިވުމަށް އޭނާ މަރުޙަބާ ވިދާޅުވިއެވެ. މިއީ ސުލްހަވެރި އަދި އެންމެން ބައިވެރިވާ އިންޑޯ-ޕެސިފިކް ސަރަޙައްދެއް ބޭއްވުމަށް ދެ ޤައުމުން ގެންގުޅޭ އެއްގޮތް ވިސްނުން ހާމަކޮށްދޭ ކަމެއް ކަމަށް ޚަލީޖް ޓައިމްސްއިން ރިޕޯޓުކޮށްފައިވެއެވެ.
ރައީސް ލީ ވިދާޅުވީ، ސަރަޙައްދީ ސުލްހައާއި ދުނިޔޭގެ ހަމަޖެހުމަށްޓަކައި ދެ ޤައުމުން ގާތުން މަސައްކަތް ކުރުމަށް އެއްބަސްވެފައިވާ ކަމަށެވެ. ވަކިން ޚާއްޞަކޮށް، މެދުއިރުމަތީގެ އެންމެ ފަހުގެ މަސްރަޙަށް އަންނަ ބަދަލުތަކާ ގުޅޭގޮތުން ދެބޭފުޅުން މަޝްވަރާ ކުރެއްވިއެވެ. އޭނާ ވިދާޅުވި ގޮތުގައި އެ ސަރަޙައްދުގައި ސުލްހަ ގާއިމުކުރުމަކީ ދުނިޔޭގެ ސަލާމަތާއި އިޤްތިޞާދީ ހަމަޖެހުމަށް ކޮންމެހެން ބޭނުންތެރި ކަމެކެވެ.
މީގެ އިތުރުން، ހަކަތައާއި މުހިންމު މުދާ މެދުނުކެނޑި ފޯރުކޮށްދިނުމުގައި އެއްބާރުލުން އިތުރުކުރުމަށް ދެފަރާތުން އެއްބަސްވިއެވެ. އަދި ދެ ޤައުމުގެ ދެމެދުގައި އޮންނަ އިޤްތިޞާދީ އެއްބަސްވުން (CEPA) އިތުރަށް ހަރުދަނާކޮށް، ވިޔަފާރިވެރިންނަށް ފަހި ފުރުޞަތުތަކެއް ހޯދައިދިނުމަށް ކުރެވޭ މަޝްވަރާތައް އަވަސްކުރުމަށް ވެސް ވަނީ ނިންމާފައެވެ.
މިހާރު އިންޑިއާއާއި ދެކުނު ކޮރެއާގެ ދެމެދުގައި ކުރެވޭ ވިޔަފާރީގެ އަގަކީ ގާތްގަނޑަކަށް 27 ބިލިއަން ޑޮލަރެވެ. ނަމަވެސް، 2030 ގެ ނިޔަލަށް މި އަދަދު 50 ބިލިއަން ޑޮލަރަށްވުރެ މައްޗަށް ޖެއްސުމަށް ދެ ލީޑަރުން ވަނީ އެއްބަސްވެފައެވެ. މިކަމަށް މަގުފަހިކުރުމަށްޓަކައި މާލީ ދާއިރާގެ ފޯރަމެއް އުފެއްދުމާއި، ސިނާޢީ ގުޅުންތައް ބަދަހިކުރުމަށް ކޮމިޓީއެއް އެކުލަވައިލުން ހިމެނެއެވެ.
ދެކުނު ކޮރެއާގެ ކުންފުނިތައް، ޚާއްޞަކޮށް ކުދި އަދި މެދު ފަންތީގެ ވިޔަފާރިތައް އިންޑިއާއަށް ޝައުޤުވެރިކުރުވުމަށްޓަކައި "ކޮރެއަން އިންޑަސްޓްރިއަލް ޓައުންޝިޕް" އެއް ހެދުމަށް ވެސް އިންޑިއާއިން ވަނީ އިޢުލާންކޮށްފައެވެ. އަދި އާޓިފިޝަލް އިންޓެލިޖެންސް، ސެމީކޮންޑަކްޓަރ އަދި އައިޓީގެ ދާއިރާއިން ގުޅުން ބަދަހިކުރުމަށް "ޑިޖިޓަލް ބްރިޖެއް" ގާއިމުކުރުމަށް ވެސް ވަނީ ނިންމާފައެވެ.
ސަގާފީ ގުޅުންތަކުގެ ދާއިރާއިން ބަލާއިރު، މުމްބާއީގައި "ކޮރެއާ ސެންޓަރެއް" ގާއިމުކުރުމަށް ވަނީ ހަމަޖެހިފައެވެ. މިއީ ކޭ-ޕޮޕް (K-pop) އާއި ސަގާފީ ހަރަކާތްތަކަށް ޚާއްޞަ ދާއިމީ މަރުކަޒަކަށް ވާނެއެވެ. މީގެ އިތުރުން ކޭ-ޕޮޕް އާއި ބޮލީވުޑް ގުޅިގެން މަސައްކަތް ކުރުމަށް ވެސް ވަނީ ރޭވިފައެވެ. ބޮޑުވަޒީރު މޯދީ ފާހަގަކުރެއްވި ގޮތުގައި އިންޑިއާގައި ކޮރެއާގެ ސަގާފަތް އަދި ކޮރެއާގައި އިންޑިއާގެ ފިލްމުތަކަށް އޮންނަ މަޤުބޫލުކަން ދަނީ އިތުރުވަމުންނެވެ. އަދި 2028 ވަނަ އަހަރު ބޮޑު "އިންޑިއާ-ކޮރެއާ ފްރެންޑްޝިޕް ފެސްޓިވަލް" އެއް ބޭއްވުމަށް ވެސް ދެ ޤައުމުން ވަނީ ނިންމާފައެވެ.
