"ޕްރޮޖެކްޓް ބައުކަލޯ" އިފްތިތާހުކޮށްފި
ބުޅަލާއި އިންސާނުން އެކުވެރިކަމާ އެކު އުޅެވޭނެ މާހައުލެއް ގާއިމުކުރަން "ޕްރޮޖެކްޓް ބައުކަލޯ"ގެ ނަމުގައި މަޝްރޫއުއެއް މިއަދު އިފްތިތާހުކޮށްފިއެވެ.
މި މަޝްރޫއު އިފްތިތާހުކުރީ މިއަދު ހުޅުމާލޭގައި ބޭއްވި ހާއްސަ ރަސްމިއްޔާތެއްގައެވެ.
މިއީ މަގުމަތީގައި އުޅޭ ބުޅަލުގެ އާބާދީ އިތުރުވަމުންދާ މައްސަލައަށް ހައްލެއް ހޯދުމަށާއި، އާންމު ސަރަހައްދުތަކުގެ ސާފުތާހިރުކަން ދެމެހެއްޓުމަށްޓަކައި ފިޝަރީޒް މިނިސްޓްރީ އާއި، ޖަނަވާރުންގެ ހިމާޔަތުގައި މަސައްކަތްކުރާ ފަރާތްތަކާއި، އިޖުތިމާއީ ޖަމިއްޔާތަކުގެ އިތުރުން ކަމާބެހޭ މުހިންމު ފަރާތްތައް ގުޅިގެން ކުރިއަށްގެންދާ ގައުމީ ފެންވަރުގެ މަޝްރޫއެއްކަމަށް ފިޝަރީޒް މިނިސްޓްރީން ބުންޏެވެ.
މި މަޝްރޫއުގެ ފުރަތަމަ މަރުހަލާ (ޕައިލެޓް ޕްރޮޖެކްޓް) ހުޅުމާލޭގައި ކުރިއަށްގެންދާއިރު، މީގެ މައިގަނޑު މަގުސަދަކީ މުޅި ރާއްޖެއަށް ފުޅާކުރެވޭނެ ފަދަ ނަމޫނާ ނިޒާމެއް ބިނާކުރުން ކަމަށް މިނިސްޓްރީން ބުންޏެވެ.
މި މަޝްރޫއުގެ މައިގަނޑު އަމާޒަކީ ބުޅަލުގެ ވެލްފެއާ އާއި، ސާފުތާހިރުކަމާއި، އާންމުންގެ ހޭލުންތެރިކަން އިތުރުކުރުމުގެ އިތުރުން، އިންސާނީ އުސޫލުތަކުގެ ތެރެއިން މަގުމަތީ ބުޅަލުގެ އާބާދީ ކޮންޓްރޯލްކޮށް، މުޖުތަމައުގައި ބުޅަލާއި އިންސާނުން އެކުވެރިކަމާ އެކު ދިރިއުޅެވޭނެ މާހައުލެއް ގާއިމުކުރުންކަމަށް ވެސް މިނިސްޓްރީން ބުންޏެވެ.
ހުޅުމާލޭގައި ކުރިއަށްގެންދާ މި ޕައިލެޓް މަޝްރޫއުގެ ދަށުން، "ޓްރެޕް-ނިއުޓާ-ރިޓާން" (ޓީ.އެން.އާރް) ޕްރޮގްރާމެއް މެދުވެރިކޮށް ބުޅާ ދަރިމައިވުން ހުއްޓުވުމުގެ މަސައްކަތް ކުރިއަށްދާނެއެވެ
