"ފަސްކުރި" ދޯނީގެ ވެރިޔާގެ އާދޭސް ޖާބިރަށް: މި ނޫން ދުނިޔެއެއް ވާކަން ހަނދުމަކޮށް އިންސާފާއި ހަމަހަމަކަމަށް ލޯބި ކުރައްވާ!
ލ.ވަޑިނޮޅު ކައިރިން އެން ހިފަން އުޅެނިކޮށް ބަޔަކު އަރާ ހިފެހެއްޓި "ފަސްކުރި" ދޯނީގެ ވެރިފަރާތުން އެ ހާދިސާއާ ގުޅޭ ގޮތުން ބަޔާނެއް ނެރެފިއެވެ.
ފަސްކުރި ދޯންޏަކީ ލ.ގަން ތުނޑީ އިހްރާމްގެ އިދުރީސް ޙުސައިން އަތުން ، ޑީއާރުޕީގެ ލީޑަރު ޢަބުދުﷲ ޖާބިރު ބައްލަވައި ގަނެފައިވާ ދޯންޏެކެވެ. ދޯނީގެ އަގަކަށް ހަތް މިލިއަން ކަނޑައެޅިއިރު އެ ފައިސާ ދެއްކުމަށް އެއްބަސް ވެފައި ވަނީ މަހުން މަހަށް ބަހާލައިގެންނެވެ. ނަމަވެސް މިހާތަނަށް ދޯނީގެ ވެރިފަރާތަށް އަދި ލިބިފައި ވަނީ ހަތްލައްކަ ރުފިޔާ ކަމަށް މައުލޫމާތު ލިބެއެވެ.
ފަސްކުރި ދޯންޏަށް ބަޔަކު އަރާ ހިފެހެއްޓި މައްސަލައެއްގައި ފުލުހުން ވަނީ މިހާރު ބަޔަކު ހައްޔަރު ކޮށްފައެވެ.
ފަސްކުރި ދޯނި ގަތުމުގެ މުއާމަލާތަށް ފައިސާ ދައްކާފައި ނުވާތީ ދޯނީގެ ވެރިފަރާތް ކަމަށްވާ އިދުރީސް ހުސެއިން ލ.ގަމު މެޖިސްޓްރޭޓް ކޯޓަށް ހުށަހެޅި މައްސަލައަކާ ގުޅިގެން އެ ކޯޓުން ވަނީ ދޯނީގެ ވެރިފަރާތާއި ދޯނި ހަވާލުކުރުމަށް އަންގައި ވަގުތީ އަމުރެއް ވެސް ނެރެފައެވެ.
މި ކަންކަމާ ގުޅިގެން އިދުރީސް ޙުސައިން އާންމުކުރި ބަޔާނެއްގައި އޭނާއާ މެދު އިހްސާންތެރި ވުމަށް އަބުދުﷲ ޖާބިރު އަރިހުން އެދިފައި ވެއެވެ.
"މަނިކުފާނާ އަޅާބަލާއިރު އަޅުގަނޑަކީ ނިކަމެއްޗެއް، ފައިސާއާއި ސިޔާސީ ނުފޫޒެއް ނެތް، ނަމަވެސް މި ނޫން ދުނިޔެއެއްވާކަން ހަނދުމަ ކުރައްވައި އިންސާފާއި ހަމައަށް ލޯބި ކުރެއްވުމަށް ނުހަނު އާދޭހާއެކު ދަންނަވަން" އިދުރީސް ބުނެފައި ވެއެވެ.
މީގެ އިތުރުން ޝަރުއީ ކޯޓަކުން ދޯނީގެ މައްސަލަ ވީހާވެސް އަވަހަށް ހަމަޖައްސާ އާއިލާއަށް ތަކްލީފް ނުޖެއްސުމަށް އެދެމުން ، މީޑިއާއާ ޕޮލިހުން ވެސް ކަމުގެ ހަގީގަތް ބެލުމަށް އެދިފައި ވެއެވެ. އަދި މިމަހުގެ 25 ވަނަ ދުވަހުގެ ރޭ ހިނގި ހާދިސާއަކީ ބިރު ދެއްކުމުގެ ހާދިސާއެއް ނޫން ކަމަށާއި އޭނާގެ ރައްޓެހިންނާ ހެޔޮ އެދޭ މީހުން ދޯންޏަށް ގޮސް ސުލްހަ ވެރިކަމާއެކު ވާހަކަ ދައްކާ ދޯނި ހަވާލު ކުރުމަށް އެދުމުން އެކަމަށް އެއްބަސްވި ކަމަށް އިދުރީސް ބުނެފައިވެއެވެ. ނަމަވެސް ދޯނީގެ ފަޅުވެރިއަކު ހަގީގަތާ ޚިލާފު މައުލޫމާތު "އައްޑޫ އޮންލައިން"އަށް ދީކަމުގެ ޙަގީގަތް އޮޅުވާލީ ކަމަށް އިދުރީސް ފާހަގަ ކުރެއެވެ.
އިދުރީސް ބުނެފައިވާ ގޮތުގައި ދޯނި ވިއްކާލުމުގެ މުއާމަލާތް ހިނގާފައި ވަނީ މިދިޔަ އަހަރުގެ ޖެނުއަރީ މަހުގައެވެ. އަދި ހަތްލައްކަ ރުފިޔާ ލިބުނު ފަހުން ބާކީ ފައިސާ ހޯދުމަށް އެކި ގޮތްގޮތުން މަސައްކަތް ކޮށްފައިވާނެ ކަމަށާއި ނަމަވެސް ފޯނަށް ޖަވާބު ނުދެއްވުމާއި އެކަމަށް އެއްބާރުލުން ނުލިބުމުގެ ސަބަބުން ، އެއްބަސްވުމުގެ މުއްދަތު ހަމަވިއިރު ވެސް ބާކީ ފައިސާ ލިބިފައި ނުވާކަމަށް އިދުރީސް ހާމަކޮށްފައި ވެއެވެ.
