ދަތް އުނގުޅާ ބޭސް، ދަތް އުނގުޅަން ނޫނަސް އެތައް ބޭނުމެއް ހިފޭ އެއްޗެއް
ދަތް އުނގުޅާ ބޭހަކީ އަޅުގަނޑުމެންގެ ދިރިއުޅުމުގައި ވަރަށް ބޭނުންތެރި އެއްޗެކެވެ. އެ އެއްޗަކާއި ނުލާ އަޅުގަނޑުމެންނަށް މިއަދު ނޫޅެވޭ އެއްޗެކެވެ. ކުރީ ޒަމާނުގައި އަޅުގަނޑުމެންގެ ކާބަފައިން ދަތް އުނގުޅުމަށް ޓަކައި ދޮންވެލި ބޭނުން ކުރި ނަމަވެސް މިއަދު އަޅުގަނޑުމެންނަށް އެގޮތެއް ކަމަކު ނުދެއެވެ. އެއީ މައްސަލައެއް ވެސް ނޫނެވެ. ޒަމާނީ ބަދަލުތަކަށް އަޅުގަނޑުމެން ވެސް ހޭނެން ޖެހޭނެއެވެ.
ދަތް އުނގުޅާ ބޭހަކީ އަޅުގަނޑުމެން ދަތް އުނގުޅަން ނޫނަަސް ބޭނުން ކުރެވިދާނެ އެއްޗެކެވެ. ދަތް އުނގުޅުމުގެ އިތުރުން ވެސް އެތައް ބޭނުން ތަކެއް ހިފޭ އެއްޗެކެވެ. އެގޮތުން ދަތް އުނގުޅާ ބޭސް ބޭނުން ކޮށްގެން ކުރެވިދާނެ 5 ކަމަކަށް ބަލާލާނަމެވެ.
1- ގަހަނާތައް ސާފު ކުރުން
ތިބާގެ އަތުގައި އަޅާފައިވާ އަނގޮޓި ނުވަތަ ތިބާގެ ކަންފަތުގައި ލައިފައިވާ ގަހަނާ ވިދާ ބަބުޅާ އެއްޗަކަށް ހަދާލަން ބޭނުން ހެއްޔެވެ؟ އަތުގައި އަޅާފައިވާ އަނގޮޓީގައި އިން އެހުން ވިދާ ބަބުޅާތައް ބަލާލަން ބޭނުން ހެއްޔެވެ؟ މިކަން ކުރުމަށްޓަކައި ހޯދަންވީ މަޑު ދަތް އުނގުޅާ ބުރުހަކާއި ދަތް އުނގުޅާ ބޭސްކޮޅެކެވެ. މި ގޮތަށް ކަންތައް ކުރުން ބޮޑަށް ރަނގަޅީ ރިހި ގަހަނާގައެވެ. ކުޑަކުޑަ ދަތް އުނގުޅާ ބޭސް ކޮޅަކާއެކު ގަހަނާގައި ހާކާލުމުން ތިބާގެ ގަހަނާތައް ވިދާ ބަބުޅާތަން ފެނިގެން ދާނެއެވެ.
2- މޫނުގައި ނަގާ އޮށާޅަ އާއި ފިތް ގަނޑުތަކަށް ފަރުވާއެއް
މޫނުގައި މަދިރި ހަފާ ތަންތަނުގައި ބޮޑެތި ފިތްގަނޑުތައް ނަގާ ހެއްޔެވެ؟ ނުވަތަ މޫނުގައި ވަރަށް ގިނައިން އޮށާޅަ ނަގާ ހެއްޔެވެ؟ ދަތް އުނގުޅާ ބޭހުން ތިކަމުގެ ފަރުވާ ވެސް ހޯދިދާނެއެވެ. ކޮންމެ ރެޔަކު ވެސް ނިދަން އޮށޯތުމުގެ ކުރިން އެތަންތަނުގައި ކުޑަކުޑަ ދަތް އުނގުޅާ ބޭސްކޮޅެއް ހާކާލާށެވެ. އަދި މުޅި ރޭ އެގޮތަށް ބަހައްޓާށެވެ. ގިނަ ދުވަސްތަކެއް ނުވެ ނަތީޖާ ފެންނަން ފަށާފާނެއެވެ.
3- "ނެއިލް ޕޮލިޝް" ފިލުވުން
ނިޔަފަތީގައި ކުލަ ޖެއްސުމަކީ މިއަދު ގިނަ ބަޔަކު ކުރާ ކަމެެކެވެ. ޒީނަތްތެރިވުމުގެ ގޮތުން މިކަން ގިނައިން ކޮށް އުޅެނީ އަންހެން ކުދިންނެވެ. ނަމަވެސް ބައެއް ފަހަރަށް ކުލަ ޖެއްސުމަށްފަހު އެކުލަ ފިލުވުމަށްޓަކައި ވަރަށް ހާލުގައި ބައެއް ކުދިން އުޅޭ މަންޒަރުވެސް ފެނެއެވެ. ބުރުހެއްގައި ދަތް އުނގުޅާ ބޭސް ލުމަށްފަހު އަވަހަށް ނިޔަފަތިތަކުގައި ހާކާށެވެ. އަދި އެއަށްފަހު ތާފަނާ ފެނަށް އަތް ލައިގެން އިރުކޮޅަކު މަޑުކޮށްލާށެވެ. އިސާހިތަކު އެ ކުލަތައް ފިލާފާނެއެވެ.
4- ފާރުގައި ހުންނަ ކުރެހުންތައް ފިލުވާލުން
ގޭގައި ކުޑަކުދިން އުޅޭ ހެއްޔެވެ؟ އެކުދިންގެ އަތުގައި ފަންސޫރެއް ނުވަތަ ކުލަ ފަންސޫރެއް ޖެހިއްޖެނަމަ ފާރުގައި ކުރުހަން ފަށާ ދޯއެވެ. އަދި އެކަމުގެ ސަބަބުން ފާރު ވަރަށް ބޮޑަށް ހަޑިވޭ ދޯއެވެ. ސާފު ކުރުމަށް ޓަކައި ކޮންމެ ފަހަރަކު ކުލަ ލާކަށް ނުޖެހެއެވެ. ބުރުހެއްގައި ދަތް އުނގުޅާ ބޭސް ލުމަށްފަހު ކުރުހާފައި އެ ހުރި ތަންތަނުގައި އަވަހަށް ހާކާށެވެ. އަދި އެއަށްފަހު ތެތް ފޮތިގަނޑަކުން ފޮހެލާށެވެ. އޭރުން އެ ކުރެހުންތައް ފިލާނެއެވެ.
5- އަތް ދޮވުން
ދަތް އުނގުޅާ ބޭޙުން އަތް ދޮންނަ ވާހަކަ ދެއްކުމުން އަޅުގަނޑަކީ މޮޔައެކޭ ހިތަށް އަރައިފި ދޯއެވެ. ނަމަވެސް އެހެނަކުން ނޫނެވެ. ބައެއް ފަހަރަށް އަތް ދޮވުމަށް ޓަކައި ވެސް ދަތް އުނގުޅާ ބޭސް ބޭނުން ކުރަން ޖެހިދާނެއެވެ. ފިޔާ، ލޮނުމެދު އަދި އިނގުރު ފަދަ ތަކެތި ގެންގުޅުމަށްފަހު އަތުން ވަަސް ބަލާލާށެވެ. އަތުގައި ވަރަށް ނުބައި ވަހެއް ހުރޭ ދޯއެވެ. އެ ވަސް ފިލުވަން ސައިބޯނި އެކަނި ބޭނުން ކޮށްގެން ނުފުދޭ ފަހަރު އަންނާނެއެވެ. އެއޮތީ ދަތް އުނގުޅާ ބޭހުގެ ބޭނުން ޖެހިފައެވެ. ދަތް އުނގުޅާ ބޭހުން އަތް ދޮވެލުމުން އެ ވަސްތައް ދާނެކަން ގައިމެވެ.
Ads by STO
