"ހަރުކަށި ލޮކްޑައުން" އަކަށް ދާކަށް މަޝްވަރާއެއް ނުކުރޭ: ސަރުކާރު
މާލޭގައި މިހާރު އަމަލު ކުރަމުންދާ ލޮކްޑައުން ހަރުކަށި ކުރުމުގެ ވިސްނުމެއް ނެތް ކަމަށް ސަރުކާރުން ވިދާޅުވެއްޖެެއެވެ.
މިހާރު ކުރިޔަށްދާ ނޫސްވެރިންގެ ބައްދަލުވުމުގައި ކޮވިޑް-19ގެ ތަރުޖަމާނު މަބްރޫކް އަޒީޒް ވިދާޅުވީ، މާލޭގައި އެއްވެސް މީހަކަަށް ނުނިކުމުވޭ ގޮތަށް އަދި ޑެލިވެރ ނުކުރެވޭ ގޮތަށް ލޮކްޑައުން ކުރުމަށް މަޝްވަރާ ކުރަމުން ނުދާ ކަމަށާއި އެ މެސެޖަކީ ސައްޙަ މެސެޖެއް ނޫން ކަމަށެވެ.
"ވައިބާގައި ދައުރުވާ މެސެޖެއް އެއީ މާލޭގެ އެއްވެސް މީހަކަށް ނުނުކުމެވޭ ގޮތަށް އަދި އެއްވެސް ޑެލިވަރީއެއް ނުކުރެވޭ ގޮތަށް ލޮކްޑައުން ހަމަޖައްސާ ވާހަކަ. އެކަމަކު އެކަހަލަ އެއްވެސް ކަމެއްގެ މަޝްވަރާއެއް ނުކުރެވޭ." މަބްރޫކް ވިދާޅުވިއެވެ.
މަބްރޫކް ވިދާޅުވީ މި އަންނަ އުޅޭ ބޮޑު ޕީކަށް ތައްޔާރުވުމުގެ ގޮތުން ފުުރަބަންދުގެ ހާލަތު އޮތީ ގެންނަން ޖެހޭ ވަރަށް ގެނެވިފައިވާ ކަމަށާއި އިތުރަށް ފިޔަވަޅެއް އެޅުމުގެ ކުރިން މިސްރާވު އެސެސް ކުރުމަށްފަހު ފިޔަވަޅުތައް އަޅާނެ ކަމަށެވެ.
"މިފަދަ ކަމެއް ކުރުމުގެ މަޝްވަރާއެއް އެއްވެސް ކޮމެޓީއެއްގައި އެއްވެސް މޭޒެއް މަތީ، މިކަމާއި ގުޅިގެން ސަރުކާރުގެ މަޝްވަރާތަކުގެ ތެރޭގައި ކުރެވިފައެއް ނުވޭ". މަބްރޫކް ވިދާޅުވިއެެވެ.
ރާއްޖެއިން ފައްސިވި މީހުންގެ އަދަދު މިހާރު ވަނީ 785 އަށް އަރާފައެވެ. މީގެ ތެރޭގައި ހިމެނެނީ 257 ދިވެހިންނާއި 528 ބިދޭސީންނެވެ.
ރާއްޖެއިން ބައްޔަށް ފައްސިވި މީހުންގެ ތެރެއިން 29 މީހުން ބަލިން ރަނގަޅުވެފައިވާއިރު، ތިން މީހަކު ވަނީ މަރުވެފައެވެ.
