ލައިސަންސް ނެތި ދުއްވާނަމަ 15 ދުވަހަށް ވެހިކަލް ހިފަހައްޓަނީ
ލައިސަންސް ނުނަގައި އެއްގަމު އުޅަނދެއް ދުއްވާނަމަ ޖޫރިމަނާ ކުރުމުގެ އިތުރުން ވެހިކަލް 15 ދުވަހުގެ މުއްދަތަށް ހިފެހެއްޓުމުގެ ބާރު ފުލުހުންނަށްދީ އެއްގަމު ދަތުރުފަތުރުގެ ޤާނޫނަށް ގެނެސްފައިވާ އިސްލާހަށް އަމަލު ކުރަން ފަށައިފިއެވެ.
މި ބަދަލު ގެނެސްފައިވަނީ އޮގަސްޓް މަހުގެ 18 ވަނަ ދުވަހު ރައްޔިތުންގެ މަޖިލީހުން ފާސްކުރި ޤާނޫނާ އެކުގައެވެ. ޑިސެމްބަރ މަހުގެ 01 ވަނަ ދުވަހުން ފެށިގެން މިހާރު ދަނީ މިޤާނޫނަށް އަމަލު ކުރަމުންނެވެ.
ލައިސަންސް ނުނަގައި އެއްގަމު އުޅަނދެއް ދުއްވާނަމަ ޖޫރިމަނާ ކޮށް ވެހިކަލް 15 ދުވަހުގެ މުއްދަތަށް ހިފެހެއްޓުމުގެ އިތުރުން ޤަވައިދާ ހިލާފަށް ޕާކް ކުރުމުން ކުރާ ޖޫރިމަނާ -/250 ރުފިޔާ އަށް ވަނީ ކުޑަކޮށްފައެވެ. އަދި އެއް ވެހިކަލެއްގައި ކިތަންމެ ގިނައިން ސްޓިކާ ޖެހި ނަމަވެސް ޖޫރިމަނާއަށް ބަދަލެއް ނާންނާނެއެވެ.
މަޖިލީހުން ފާސްކުރި ޤާނޫނުގައި ވާ ގޮތުން ލައިސަންސް އޮވެގެން ދުއްވަންޖެހޭ ނުވަތަ އޮޕަރޭޓް ކުރަން ޖެހޭ އެއްގަމު އުޅަނދެއް ލައިސަންސް ނުނަގައި ދުއްވާ ފަރާތްތައް، ޤާނޫނުގައި ބަޔާންކުރާ ގޮތުގެމަތިން ޖޫރިމަނާ ކުރުމުގެ އިތުރުން، އެފަރާތުން ދުއްވި އުޅަނދު ގިނަވެގެން 15 (ފަނަރަ) ދުވަހުގެ މުއްދަތަށް ހިފަހައްޓައި، އުޅަނދުގެ ވެރިފަރާތް -/2000 (ދެހާސް) ރުފިޔާއިން ޖޫރިމަނާ ކުރެވޭނެއެވެ.
މީގެ އިތުރުން ލައިސަންސް އޮވެގެން ދުއްވަންޖެހޭ ނުވަތަ އޮޕަރޭޓް ކުރަން ޖެހޭ އެއްގަމު އުޅަނދެއް، ލައިސަންސް ނުނަގައި ދުއްވުމަކީ މަނާކަމެއް ކަމަށާއި އެފަދަ ޢަމަލެއް ކުރި މީހެއްގެ އަދަބަކީ، ފުރަތަމަ ފަހަރަށްނަމަ -/1000 (އެއްހާސް) ރުފިޔާއިން ޖޫރިމަނާ ކުރުމެވެ. ދެވަނަ ފަހަރަށް ނަމަ -/1500 (އެއްހާސް ފަސްސަތޭކަ) ރުފިޔާއިން ޖޫރިމަނާ ކުރުމެވެ. އަދި ދެފަހަރަށްވުރެ ގިނަ ފަހަރަށްނަމަ، އިތުރުވާ ކޮންމެ ފަހަރަކަށް -/2000 (ދެހާސް) ރުފިޔާއިން ޖޫރިމަނާ ކުރުމެވެ.
