"ފްލެގް ގާލް" ރާއްޖެއަށް ޒިޔާރަތްކޮށްފި
ބަންގްލަދޭޝްގެ ދިދަ ހިފައިގެން ދުނިޔޭގެ ގިނަ ގައުމުތަކަށް ދަތުރުކުރަމުން އަންނަ "ފްލެގް ގާލް"ގެ ގޮތުގައި މަޝްހޫރުކަން ހޯދާފައިވާ ނަޖުމުއްނަހާރު ރާއްޖެއަށް ޒިޔާރަތްކޮށްފިއެވެ.
ދުނިޔޭގެ ރެކޯޑް ފޮތުގެ ޖާގަ ހޯދާފައިވާ ނަޖުމުއްނަހާރުގެ އަމާޒަކީ ދުނިޔޭގެ ސުލްހަ އަދި އަންހެނުންނާއި ކުޑަކުދިންނާއި ކުޑަކުދިން ކުރިއެރުވުމަށް ހޭލުންތެރިކަން އިތުރުކުރުމުގެ ގޮތުން 200 ގައުމަކަށް ޒިޔާރަތް ކުރުމެވެ. ރާއްޖެއަކީ އޭނާ ޒިޔާރަތްކުރި 144 ވަނަ ގައުމެވެ.
"ފްލެގް ގާލް" ގޮތުގައި ނަޖުމުން މަޝްހޫރުވީ މި ދަތުރުތަކުގައި ބަންގުލަދޭޝްގެ ގައުމީ ދިދަ ހިފައިގެން އޭނާ އުޅޭތީ އެވެ. އޭނާ ދަތުރު ފެށިތާ މިހާރު 20 އަހަރު ވެއްޖެ އެވެ. ނަޖުމުއްނަހާރު މިހާރު ކުރަމުން އަންނަ މަސައްކަތަކީ ދުނިޔޭގެ ގައުމުތަކުގެ ޒުވާނުން ގުޅުވައިދިނުމަށް "އިންސްޕިރޭޝަން ގްލޯބަލް ޕްލޭޓްފޯމް" އެއް ގާއިމުކުރުމުގެ މަސައްކަތެވެ.
ނަޖުމުން ނަހާރު އިއްޔެ ރާއްޖެ އައުމާއިއެކު ޓޫރިޒަމް މިނިސްޓްރީންނާއި ވިޒިޓް މޯލްޑިވްސް އިން ވަނީ ނަޖުމުން އަށް، ވެލާނާ އިންޓަނޭޝަނަލް އެއާޕޯޓުން މަރުހަބާ ކިޔައިފައެވެ.
ނަޖުމުނަހާރުގެ މި މަސައްކަތްތައް ބައިނަލްއަގުވާމީ ޖަމާއަތްތަކުން ބަލައިގަނެ ހިތްވަރު ދިނުމުގެ ގޮތުން އިނާމުތަކާއި ޝަރަފުތައް ވަނީ އޭނާއަށް އަރުވައިފައެވެ. އެގޮތުން "ދަ ޕޯސް ޓޯޗް ބެއާ އެވޯޑް" ސަކްސެސްފުލް ވިމެން އެވޯޑް އަދި "ރެޑްކްރެސެންޓް މޯޓިވޭޝަނަލް އެވޯޑް" ވަނީ ލިބިފައެވެ.
