އެމްއެސްއެސްއިން އިންޑިއާ އިން ދެކުނަށް މުދާ އުފުލަން ފަށައިފި
އިންޑިއާ އިން ކަނޑުމަގުން ދެކުނަށް މުދާ ގެނެސް ދިނުމުގެ ހިދުމަތް، މޯލްޑިވްސް ސްޓޭޓް ޝިޕިން (އެމްއެސްއެސް)އިން ފަށައިފިއެވެ.
އިންޑިއާގެ ޓުޓިކޮރިން އިން މުދާ ހިފައިގެން އައި އެމްއެސްއެސް އިން މިއަދު އައި ފުރަތަމަ ބޯޓުގައި 2713.34 މެޓްރިކް ޓަނުގެ މުދާ ގެނެސްފައި ވެއެވެ. މޯލްޑިވްސް ސްޓޭޓް ޝިޕިންގެ މެނޭޖިން ޑިރެކްޓަރު އަބްދުﷲ ސައީދު ވިދާޅުވީ އިންޑިއާ އިން ސީދާ މި ހިސާބަށް މުދާ ގެނެވޭ ގޮތް ވުމަކީ ވިޔަފާވެރިންނަށް ފަސޭހަވެގެން ދާނެ ކަމެއް ކަމަށެވެ.
އިންޑިއާގެ ޓުޓިކޮރިން އިން ގެނައި މުދަލުގެ ތެރޭގައި މޭވާ އާއި ތަރުކާރީގެ ބާވަތްތަކާއި އިމާރާތް ކުރަން ބޭނުން ކުރާ ސާމާނު ހިމެނެއެވެ. މި ހިދުމަތުގެ ސަބަބުން ކަސްޓަމަރުންނަށް ވެސް ކުރިއަށް އޮތް ތަނުގައި މިހާރަށް ވުރެ ހެޔޮ އަގުގައި މުދާ ލިބެން މަގު ފަހި ވެގެން ދާނެ ކަމެއް ކަމަށް ސައީދު ވިދާޅުވިއެވެ.
ސަރުކާރުގެ ޝިޕިން ކުންފުނި، އެމްއެސްއެސް އިން އައްޑު އާއި ހުވަދު އަތޮޅު ހިމެނޭ ގޮތަށް މުދާ ގެންނަން ފެށުމުގެ ގޮތުން ހިތަދޫ ޕޯޓުގައި ވަނީ ހާއްސަ ރަސްމިއްޔާތެއް ބާއްވާފައެވެ. އެ ރަސްމިއްޔާތުގައި އެސްޓީއޯގެ މެނޭޖިން ޑިރެކްޓަރު ހުސައިން އަމްރު އާއި އެމްޕީއެލްގެ މެނޭޖިން ޑިރެކްޓަރު ޝާހިދު އަލީ އަދި އައްޑޫ މޭޔަރު އަބްދުﷲ ސޯދިގު ބައިވެރިވަޑައިގެންނެވިއެވެ.
