ރޮނާލްޑޯއާއި މެސީއަށް ވެސް މިފަހަރު އެއްވަނައެއް ނުލިބުނު!
ފާއިތުވެދިޔަ 15 އަހަރަށް ބަލާއިރު ކުޅިވަރު އެތްލީޓުންގެ ތެރެއިން އެންމެ ބޮޑު އާމްދަނީއެއް ލިބޭ ދެ އެތްލީޓުންނަކީ ލަޔަނަލް މެސީއާއި ކްރިސްޓިއާނޯ ރޮނާލްޑޯއެވެ. މި ދެ ކުޅުންތެރިން ފަހަތަށް ޖައްސާލައި އެހެން އެތްލީޓަކަށް ކުރި ލިބުނީ މަދު ފަހަރެއްގައެވެ.
މިދިޔަ އަހަރު ދުނިޔޭގެ އެންމެ ބޮޑު އާމްދަނީއެއް ލިބުނު ފިރިހެން ކުޅުންތެރިންގެ ލިސްޓުގެ އެއްވަނަ މެސީއާއި ރޮނާލްޑޯ ފަހަތަށް ޖައްސާލުމަށްފަހު ހޯދީ ރޮޖަރ ފެޑެރާއެވެ. މަޝްހޫރު މަޖައްލާ ފޯބްސްއިން ހޮވާ އަހަރުގެ އެންމެ ބޮޑު އާމްދަނީއެއް ލިބުނު ކުޅިވަރު އެތްލީޓުންގެ ތެރެއިން އެއްވަނަ ޓެނިސް ކުޅުންތެރިޔާ ރޮޖަރ ފެޑެރާއަށް ލިބުނީ 106.3 މިލިއަން ޑޮލަރާއިއެކުގައެވެ. ފެޑެރާ މި ލިސްޓަށް އެރި އެންމެ ބޮޑު ސަބަބަކީ އިޝްތިހާރުތަކުން ލިބުނު އާމްދަނީ އިތުރު ވުމުންނެވެ.
ލިސްޓުގެ ދެވަނައިގައި އޮތީ ޔުވެންޓަސްގެ ފޯވާޑް ކްރިސްޓިއާނޯ ރޮނާލްޑޯއެވެ. އޭނާއަށްވަނީ މިދިޔަ އަހަރެއްހާ ދުވަހު 105 މިލިއަން ޑޮލަރުގެ އާމްދަނީއެއް ލިބިފައެވެ. ރޮނާލްޑޯއާއި ވާދަވެރި މެސީއަށް ތިންވަނަ ލިބުނީ 104 މިލިއަން ޑޮލަރާއިއެކުގައެވެ. މެސީއަކީ މިދިޔަ އަހަރު މި ލިސްޓުގެ އެއްވަނައިގައި އޮތް އެތްލީޓެވެ. ލިސްޓުގެ ހަތަރުވަނައިގައި އޮތީ ބްރެޒިލްގެ ތަރި ނޭމާއެވެ. ނޭމާއަށް ލިބިފައިވަނީ 95 މިލިއަން ޑޮލަރެވެ. ފަސްވަނައިގައި އޮތީ އެމެރިކާގެ މަޝްހޫރު ބާސްކެޓްތަރި ލެބްރޮން ޖޭމްސްއެވެ. އޭނާއަށް ލިބިފައިވަނީ 88.2 މިލިއަން ޑޮލަރެވެ.
ގަދަ ދިހައެއްގައި ދެން ހިމެނެނީ ބާސްކެޓްބޯޅަ ދެ ތަރިންކަމަށްވާ ސްޓެފަން ކަރީ، ކެވިން ޑުރާންޓް، ގޮލްފް ލެޖެންޑް ޓައިގަ ވުޑްސް، އެމެރިކަން ފުޓްބޯޅަ ކުޅުންތެރިންކަމަށްވާ ކާރކް ކަޒިންސް އަދި ކާޒަން ވެންޓްސްއެވެ. ގަދަ ފަންސާހުގައި އެންމެ ގިނައިން ހިމެނެނީ ބާސްކެޓްބޯޅަ ކުޅުންތެރިންނެވެ. 16 ބާސްކެޓް ކުޅުންތެރިއަކު މި ލިސްޓުގައި ހިމެނޭއިރު، އެންމެ ބޮޑު އާމްދަނީއެއް ލިބުނު ބޮކްސަރަކީ ޓައިސަން ފިއުރީއެވެ.
ވިޔަފާރި މަޖައްލާ ފޯބްސްއިން އަހަރުގެ އެންމެ ބޮޑު އާމްދަނީއެއް ލިބޭ އެތްލީޓް ހޮވަނީ ކުޅުންތެރިންގެ މުސާރައާއި އިނާމު ފައިސާގެ އިތުރުން އިޝްތިހާރުތަކުން ލިބޭ ފައިސާއަށް ބަލައިގެންނެވެ.
Ads by STO
