ޝިޔާމްގެ ގައިގައި ތަޅާލުމަށް ރައީސް ނަޝީދު އެންގެވި: އިދިކޮޅު
ރޭ ރައްޔިތުންގެ މަޖިލީހުގައި ކުރިޔަށްދާ ޖަލްސާގެ ތެރެއިން ހިނގި ހަމަނުޖެހުމުގައި، ނައިފަރު ދާއިރާގެ މެމްބަރު، އަހުމަދު ޝިޔާމް އަށް ހަމަލާދިނުމަށް ރައީސް މުހައްމަދު ނަޝީދު އެންގެވި ކަމަށް އިދިކޮޅު ކޯލިޝަނުން ބުނެފިއެވެ.
ރޭ ދަންވަރު 1:30 ގައި ބޭއްވި ޖަލްސާގައި ގާނޫނު އަސާސީއަށް ގެންނަ އިސްލާހުގެ މަސައްކަތް އިދިކޮޅު ކޯލިޝަނުން ލަސް ކުރީ ކަމަށް ވިދާޅުވެ މަޖިލީހުގެ ރައީސް ނަޝީދު ވާހަކަދެއްކެވުމުން ނައިފަރު ދާއިރާގެ މެމްބަރު އަހުމަދު ޝިޔާމް ވަނީ ޖަލްސާގައި އަޑުގަދަ ކުރައްވާފައެވެ. އެއާއެކު ރައީސް މުހައްމަދު ނަޝީދު ވަނީ ޝިޔާމްގެ ނަން އިއްވާ މަޖިލީހުގެ ތަޅުން ދޫކުރައްވާ ވަޑައިގަތުމަށް އަންގަވާފައެވެ.
ނަމަވެސް އެކަމަށް ޝިޔާމް ދެކޮޅު ހެދުމުން ސަރުކާރަށް ތާއީދުކުރާ މެމްބަރުން އޭނާ ތަޅުމުން ނެރެން މަސައްކަތް ކޮށް އެ މެމްބަރުންނާ ދެމެދު ކޮންމެވެސް ވަރެއްގެ ކުރިމަތިލުންތަކެއް ވަނީ ހިނގާފައެވެ.
އެކަމާ ގުޅިގެން އިދިކޮޅުން ނެރުނު ބަޔާނެއްގައި ބުނީ މަޖިލީހުގެ ރައީސްގެ އެންގެވުމަށް އެމްޑީޕީ މެމްބަރުންނާއި ސަރޖަންޓް އޮފް އާމްސް ގުޅިގެން ޝިޔާމްގެ ހަށިކޮޅަށް އަތްލާ ވަރަށް ބޮޑަށް އަނިޔާކޮށްފައިވާ ކަމަށާއި އެކަން ހަރުކަށި އިބަރާތުން ކުށްވެރިކުރާ ކަމަށެވެ. އަދި މި މައްސަލަ ބަލައި ފިޔަވަޅު އަޅަން ފުލުހުންނަށް ވެސް އިދިކޮޅުން ވަނީ ގޮވާލާފައެވެ.
"ޝިޔާމް ނިޒާމާ ބެހޭ މައްސަލައެއް ނެންގެވުމުން އެ މައްސަލައަށް ފުރުސަތު ދެއްވުމެއް ނެތި، މަޖިލީހުގެ ގަވާއިދާ ހިލާފަށް ވަގުތުން ނަން އިއްވާ އަދި މަޖިލީހުން ނެރުމަށާއި، އަދި އެމަނިކުފާނުގެ ގައިގައި ތަޅާލުމަށް ރައްޔިތުންގެ މަޖިލީހުގެ ރައީސް ވިދާޅުވި އަޑު އެއްސެއްވި ކަމަށް އެތަނުގައި ތިއްބެވި މެމްބަރު ހެކިވޭ" އެ ބަޔާނުގައި ބުނެފައިވެއެވެ.
އަދި އެ އަނިޔާތަކުގެ ސަބަބުން ޝިޔާމްގެ ހާލު ވަރަށް ބޮޑަށް ސީރިއަސްވެ، މިވަގުތު އިތުރު ފަރުވާ އަށް ހޮސްޕިޓަލަށް ގެންދެވިފައިވާ ކަމަށް ވެސް އިދިކޮޅުން ބުނެއެވެ.
Ads by STO
